කම්කරු උපදේශක සභාවේ පත්වීම් ගැන නඩු මගට බැසීමේ සැලසුමක්

0
16

රනිල් වික්‍රමසිංහ රජය විසින් ජාතික කම්කරු උපදේශක සභාවෙන් ඉවත් කරන ලද වෘත්තීය සමිති සම්මේලනයක නායිකාවක්, නව රජය විසින් ඉහල පෙලේ උපදේශක මණ්ඩලයකට පත් කිරීම සම්බන්ධයෙන් එම සම්මේලනය තුලින්ම අභියෝගයක් මතුවී තිබේ.

එක්සත් කම්කරු සම්මේලනයට අනුබද්ධ නිමි භාණ්ඩ, ඇඟලුම් හා රෙදිපිලි සේවක සංගමයේ (TGCWU) ප්‍රධාන සංවිධායිකා ලලිතා රංජනී දෙද්දුව කුමාර මෙන්ම පාලක ජාතික ජන බලවේගයේ හවුල්කාර ඩාබිඳු සාමුහික සංගමයේ චමිලා තුෂාරි ද ජාතික කම්කරු උපදේශක සභාවේ නව කම්කරු නියෝජිතවරියන් ලෙස මෙවර පත්කොට ඇත.

පත්වීම් සිදු කරනු ලබන්නේ කම්කරු අමාත්‍යවරයා විසිනි. සමාජීය හා කම්කරු ප්‍රතිපත්ති මෙන්ම ජාත්‍යන්තර කම්කරු ප්‍රතිපත්තිවලට අදාළව ආණ්ඩුවේ, හාම්පුතුන්ගේ හා කම්කරුවන්ගේ ජාතික මට්ටමේ උපදේශනය හා සහයෝගිතාව එම ත්‍රෛපාක්ෂික උපදේශක සභාවේ ප්‍රකාශිත අරමුණයි.

විසිපස් වසරකට ආසන්න ඉතිහාසයක් සහිත ජාතික කම්කරු උපදේශක සභාවට කාන්තාවන් දෙදෙනකු අලුතින් පත් කිරීම සම්බන්ධයෙන් සුබ පතන සභාවේ මුල්ම කම්කරු කාන්තා නියෝජිතවරිය තමන් නායකත්වය දරන එක්සත් කම්කරු සම්මේලනය (එකස) ජාතික කම්කරු උපදේශක සභාවෙන් මෙවරත් ඉවත් කිරීම සම්බන්ධයෙන් විරෝධතාවය පළ කරමින් අධිකරණ ක්‍රියාමාර්ග වෙත යොමුවීමේ සුදානම ප්‍රකාශයට පත් කොට තිබේ.

“කෙසේ වෙතත්, කාන්තා නායකත්වයෙන් යුතුවාක් මෙන්ම ඉහත වෘත්තීය සමිති දෙකේම ඉන්නා සාමාජිකාවන්ට වැඩි කාන්තා නියෝජනයක් සහිත එක්සත් කම්කරු සම්මේලනය ජාතික කම්කරු උපදේශක සභාවෙන් බැහැර කළේ කුමන පදනමකින්දැ,” යි එකස නායිකා ස්වස්තිකා අරුලිංගම් සමාජ මාධ්‍ය ඔස්සේ විමසා ඇත්තීය.

“මම 15 වැනිදා වෙනකල් බලලා නීතිමය පියවර ගන්නවා. ඒක ජාතික ජන බලවේගයේ විශ්වසනීයත්වයට බලපානවා විතරක් නොවේ, මගේත් සහභාගිත්වයෙන් ගොඩනගන ලද කාන්තා මූලික වෘත්තීය සමිති සහයෝගීතාවය සදහටම බිඳ දමනු ඇත.”

2021 වසරේ ජුලි මස 13 වැනිදා පැවැත්වු ජාතික කම්කරු උපදේශක සභාවට එක්සත් කම්කරු සම්මේලනය නියෝජනය කරමින් නීතිඥ ස්වස්තිකා අරුලිංගම් පත්කිරීමෙන් පසු එම සභාවට කාන්තාවන් පත් වු දෙවැනි අවස්ථාව මෙයයි.

2023 වසරේ කම්කරු ඇමැතිවරයා වූ මනුෂ නානායක්කාර විසින් ජාතික කම්කරු උපදේශක සභාවෙන් ප්‍රධාන පෙලේ වෘත්තීය සමිති හතරක් ඉවත් කරමින් කියා සිටියේ ඔවුන් අවශ්‍ය සාමාජිකත්වය සම්පුර්ණ කර නොමැති බවයි.

නිදහස් වෙළඳ කලාප හා පොදු සේවා සේවක සංගමය, ලංකා වෙළෙඳ, කාර්මික හා පොදු කම්කරු සංගමය [CMU], ලංකා වතු සේවක සංගමය මෙන්ම එක්සත් කම්කරු සම්මේලනය ද එසේ ඉවත් කරන ලද කම්කරු සංවිධානයි.

එම බැහැර කිරීමට එරෙහිව නිවේදනයක් නිකුත් කළ සංවිධාන 55ක් සහ ක්‍රියාධාරීන් 150ක් උපදේශක සභාවේ එකම කාන්තා නියෝජනය අස් කිරීමේ ‘අසාමාන්‍ය’ තීන්දුව ගත බවට අමාත්‍යවරයාට දැඩි ලෙස චෝදනා කළේය.

“මනුෂ නානායක්කාර විසින් ජාතික කම්කරු උපදේශක සභාවෙන් එකස ඉවත් කළ අවස්ථාවේ පාර්ලිමේන්තු මන්ත්‍රිනී ලක්මාලි හේමචන්ද්‍ර ඇතුළුව අද ජාජබ සමග අසුන් ගෙන සිටින ගැහැනු සහ පිරිමි කිහිප දෙනෙක්ම එකස උපදේශක සභාවට ඇතුල් කරගැනීමට සහාය දක්වන ලිපියට අත්සන් කළෝය. හුදෙක් බලයේ සිටින නිසාම ඒ අත්සන් කළ’වුන් ගේ ස්ථාවරය වෙනස් විය යුත්තේ නොවේ,” යි ස්වස්තිකා අරුලිංගම් මුහුණු පොතේ වැඩිදුරටත් කියා සිටී.

නිමි භාණ්ඩ, ඇඟළුම් සහ රෙදිපිළි සේවක සංගමයේ සභාපති වන්නේ පාර්ලිමේන්තු මන්ත්‍රී නීතිඥ ලක්මාලි හේමචන්ද්‍රයි.

ජාතික කම්කරු සභාවට මෙවර නියෝජිතයන් තෝරා පත් කර ගැනීමේදී නීතිඥ අරුලිංගම් සභාපතිත්වය දරන එක්සත් කම්කරු සම්මේලනය යටතේ පවතින වෘත්තිය සමිති අටෙන් එකක් වන නිමි භාණ්ඩ, ඇඟළුම් සහ රෙදිපිළි සේවක සංගමයේ නියෝජිතවරිය තෝරා පත් කරගෙන තිබේ.

ඇය එක්සත් කම්කරු සම්මේලනයේ උප සභාපතිවරියකද වන්නීය.

බලයට පත් වීමෙන් පසු 2024 වසරේ දෙසැම්බර් මාසයේදී නව රජය විසින් ජාතික කම්කරු උපදේශක සභාවට අමාත්‍යවරයා විසින් අලුතින් නියෝජිතයන් පත් කර ගෙන ඇත්තේ ප්‍රසිද්ධ කැඳවීමකින් තොරව අත්තනෝමතික ලෙස යයි වෘත්තීය සමිති නායකයෝ චෝදනා කරති. එම පත්කිරීම් සම්බන්ධයෙන් ජාතික කම්කරු උපදේශක සභාවේ සභාපති කම්කරු අමාත්‍ය අනිල් ජයන්ත ප්‍රනාන්දු කිසිදු හේතු දැක්වීමක් කර නොමැති බව ඔවුහු පවසති.

“ආර්ථිකයේ විවිධ ක්ෂේත්‍රවල සේවා යෝජකයන්ගේ හා කම්කරුවන්ගේ සංවිධාන අතුරින් ‘වැඩිම නියෝජනයක් සහිත’ සංවිධාන හා ආයතන ගරු අමාත්‍යවරයා විසින් ජාතික කම්කරු උපදේශක සභාව නියෝජනය සඳහා තෝරා ගනු ලබයි,” යනුවෙන් ජාතික කම්කරු උපදේශක සභාව නිල වෙබ් අඩවිය ඉංග්‍රීසියෙන් නිවේදනය කර තිබේ.

පසුගිය වර මෙන්ම මෙවරත් ලංකා වෙළෙඳ, කාර්මික හා පොදු කම්කරු සංගමය [CMU] ජාතික කම්කරු උපදේශක සභාවෙන් ඉවත් කිරීමට නව රජය කටයුතු කර ඇති අතර සිය සංගමය ජාතික කම්කරු උපදේශක සභාවෙන් ඉවත් කිරීමට එරෙහිව අධිකරණ ක්‍රියාමාර්ග වලට යොමු වී ජය ලැබු නිදහස් වෙළෙඳ කලාපයේ කම්කරුවන් නියෝජනය කරන ප්‍රමුඛතම සමිතිය වන නිදහස් වෙළෙඳ කලාප හා පොදු සේවා සේවක සංගමය යළි ජාතික කම්කරු උපදේශක සභාවට ඇතුලත්ව සිටි.

Facebook Comments

Ivory Agency Ad