එක්සත් ජාතීන්ගේ සාම සාධක සේවාවන් සඳහා පොලිසියේ සහ ත්‍රිවිධ හමුදාවේ නිලධාරින් මුදා හැරීමේ දී මානව හිමිකම් කොමිෂන් සභාව මගින් සිදුකරන නිෂ්කාශන කටයුතු ප්‍රමාද වීමට ජනාධිපතිවරයා සිය කණස්සල්ල පළ කර තිබේ.
සියලු පාර්ශ්වයන් අතර අවබෝධයෙන් සහ සම්බන්ධීකරණයෙන් මෙම ගැටලුව නිරාකරණය කර ගැනීමට කඩිනම් පියවර ගන්නා ලෙස ජනාධිපති මෛත්‍රීපාල සිරිසේන 20 බ්‍රහස්පතින්දා මානව හිමිකම් කොමිසමට ජනාධිපති කාර්යාලයේ පැවති සාකච්ඡාවක දී උපදෙස් දී ඇත.
නියමිත කාලයට නිලධාරින් එම සේවාව සඳහා යොමු කිරීම ප්‍රමාදවීම හේතුවෙන් එම අවස්ථාව ශ්‍රී ලංකාවට අහිමිවන අතර එය රටේ ආර්ථිකයට මෙන් ම එක්සත් ජාතීන්ගේ සංවිධානය ශ්‍රී ලංකාව පිළිබඳ තබා ඇති විශ්වාසයට ද අහිතකර ලෙස බලපාන බවයි ජනපති පෙන්වා දී ඇත්තේ.
ශ්‍රී ලංකා ත්‍රිවිධ හමුදාවට එක්සත් ජාතින්ගේ සාම සාධක සේවාවන් සඳහා ඉහළ ඉල්ලුමක් පවතින බව පෙන්වා දී ඇති ජනපති ම අවස්ථා නිසි පරිදි එම සාමාජිකයන්ට ලබාදීමට අවශ්‍ය ක්‍රමවේදය විධිමත්ව ක්‍රියාත්මක විය යුතු බවට ද උපදෙස් දුන් බව ජනාධිපති මාධ්‍ය ඒකකය නිවේදනය කරයි.
පසුගිය වසරේ එක්සත් ජාතීන්ගේ සාම සාධක මෙහෙයුම් සඳහා භට පිරිස් යැවීමේදී ඔවුන්ගේ මානව හිමිකම් චර්යාව සුපරීක්ෂණයට ලක් කිරීම සම්බන්ධයෙන් ඇති කරගෙන තිබෙන එකඟතාව කඩ කළ බවට ශ්‍රී ලංකා යුද හමුදාවට දොස් පවරා රටේ සේනාධිනායකයා ද වන ජනාධිපතිවරයාට ලිපියක් යවමින් ශ්‍රී ලංකා මානව හිමිකම් කොමිසම කරුණු පහදා දී තිබුනි.
එසේ නිසි පූර්ව පරීක්ෂාවකට ලක් නොකරන ලද බවට ශ්‍රී ලංකා මානව හිමිකම් කොමිසමේ දෝෂ දර්ශනයට ලක්ව ලෙබනනයේ 12 වැනි සාම සාධක ආරක්ෂක කණ්ඩායමේ අණදෙන නිලධාරියා ලෙස මැදපෙරදිග යාමට සැරසී සිටි ලුතිනන් කර්නල් රත්නප්පුලි වසන්ත කුමාර හේවගේ යැවීම එක්සත් ජාතීන් විසින් අත් හිටුවන ලදී.
Facebook Comments
