ජනාධිපතිවරයා විසින් මරණ දඬුවම යළි ක්‍රියාත්මක කිරීමට ගෙන ඇති තීරණයට පාර්ලිමේන්තුව නියෝජනය කරන සියලු පක්ෂ විරුද්ධ බව අගමැතිවරයා අවධාරණය කර තිබේ.
පර පණ නැසීම එක්සත් ජාතික පක්ෂයේ ප්‍රතිපත්තීන්ට විරුද්ධ බැවින් මරණ දඬුවම ක්‍රියාත්මක කිරීමේ යෝජනාවට සහය දැක්වීමට තමන්ට හැකියාවක් නොමැති බව අග්‍රාමාත්‍ය රනිල් වික්‍රමසිංහ 30 ඉරිදා මොණරාගල දිස්ත්‍රික්කයේ මාරිඅරාව ජල යෝජනා ක්‍රමය විවෘත කිරීමෙන් අනතුරුව මාරිඅරාව සතිපොළ භූමියේ පැවැති ජනහමුවේදී කියා සිටියේය.
“මරණ දඬුවම යළිත් ක්‍රියා කරන්න යෝජනා කරලා තියෙනවා. ඒක අපේ පක්ෂයේ ප්‍රතිපත්ති වලට විරුද්ධයි. පාර්ලිමේන්තුවේ විශාලම පක්ෂේ ආණ්ඩු පක්ෂේ ප්‍රතිපත්ති වලටත් විරුද්ධයි. මම හිටපු ජනාධිපති විපක්ෂ නායක මහින්ද රාජපක්ෂ කතා කළා එතුමා කිව්වා එතුමත් විරුද්ධයි කියලා. මම ජනතා විමුක්ති පෙරමුණ එක්ක කතා කළා ඒ අයත් විරුද්ධයි. මම ද්‍රවිඩ සන්ධානේ එක්ක කතා කළා ඒ අයත් විරුද්ධයි,” යනුවෙන් අගමැති පැවසීය.
2016 වසරේ එක්සත් ජාතීන් විසින් ඉදිරිපත් කළ මරණ දඬුවම ක්‍රියාත්මක කිරීම වැළැක්වීමේ යෝජනාවට ශ්‍රී ලංකාව සහාය ලබාදුන් බවද ඒ අවස්ථාවේදී මෛත්‍රීපාල සිරිසේන ජනාධිපති වශයෙන් ද, තමා අගමැති වශයෙන් ද තනතුරු දැරූ බව අගමැතිවරයා සිහිපත් කර දුනි.
2018 වසරේ දෙසැම්බර් 17 වනදා එක්සත් ජාතීන් එම යෝජනාව යළි සමාලෝචනයට භාජනය කළ අවස්ථාවේ ශ්‍රී ලංකාව ඊට සහය දුන් අතර, එවිට මෛත්‍රීපාල සිරිසේන මහතා ජනාධිපති තනතුර ද, මහින්ද රාජපක්ෂ අගමැති තනතුරු දැරූ බවයි රනිල් වික්‍රමසිංහ අගමැතිවරයා වැඩි දුරටත් සඳහන් කළේය.
Facebook Comments
