මුස්ලිම් විරෝධී ප්‍රහාර කරුවන්ට ඇපදීම ගැන විනිසුරුගෙන් ප්‍රශ්න

0

නාත්තන්ඩිය ප්‍රදේශයේ මුස්ලිම් විරෝධි ප්‍රහාරයන්ට නායකත්වය දුන් පිරිස් වෙත ඇප ලබා දෙන්නේ කුමන පදනමක් මත දැයි මාරවිල දිසා මහේස්ත්‍රාත්වරයා විවෘත අධිකරණයේදී ප්‍රශ්න කර තිබේ.

පාස්කු ප්‍රහාරයෙන් පසුව මාරවිල අධිකරණ බල ප්‍රදේශයට අයත් තුම්මෝදර, කොට්ටරාමුල්ල සහ මොරකැලේ යන ප්‍රදේශ වල සිදුවීම් 27 ක් සම්බන්ධයෙන් තමන්ට වාර්තා වී ඇති බව මාරවිල මහේස්ත්‍රාත් හා දිසා විනිසුරු සිරිමෙවන් මහේන්ද්‍රරාජා අධිකරණයේ දී කියා සිටියේය.

එම සිදුවීම් වලට මිනිස් ඝාතනයක්, නිවාස ගිනි තැබීම් ,දේපල වලට හානි සිදු කිරිම් ඇතුලත් බවද විනිසුරුවරයා සඳහන් කළේය.

මුස්ලිම් විරෝධි ප්‍රහාරයන්ට නායකත්වය දුන් බවට සැක පිට අත්අඩංගුවට ගෙන සිටින නාත්තන්ඩිය ප්‍රාදේශීය සභාවේ ශ්‍රී ලංකා පොදු ජන පෙරමුණ මන්ත්‍රී උපුල් හේරත් අධිකරණයට ඉදිරිපත් කළ අවස්ථාවේදී විනිසුරුවරයා මෙසේ ප්‍රශ්න කර තිබේ.

පාස්කු ප්‍රහාරයෙන් පසුව මැයි 13 වනදා මාරවිල අධිකරණ බල ප්‍රදේශයේ තුම්මෝදර, කොට්ටරාමුල්ල සහමොරකැලේ යන ප්‍රදේශ වල සිදුවූ මුස්ලිම් විරෝධි ප්‍රහාරයන්ට නායකත්වය ලබා දී ඇත්තේ සැකකාර ප්‍රාදේශීය සභා මන්ත්‍රීවරයා විසින් බවට කොස්වත්ත පොලීසිය විසින් අධිකරණයට කරුණු වාර්තා කර තිබුනි.

මුස්ලිම් විරෝධි ප්‍රහාරයෙන් පසුව සැකකාර මන්ත්‍රීවරයා නවසීලන්තය බලා ගොස් තිබු අතර නැවත දිවයිනට පැමිණීමෙන් අනතුරුව තම නීතිඥයින් මගින් මන්ත්‍රීවරයා අධිකරණයට ඉදිරිපත් වීමට කටයුතු කළේය.

පසුගිය 24 වනදා අධිකරණයට ඉදිරිපත්වු මන්ත්‍රීවරයා රක්ෂිත බන්ධනාගාර ගත කර තිබු අතර අදාළ නඩුව 07 බදාදා නැවත කැඳවු අවස්ථාවේදී සැකකාර පොහොට්ටු මන්ත්‍රීවරයා රටෙන් පලා යාමක් කර නොමැති බවත්, නවසීලන්තයේ ජීවත් වන තම බිරිද සහ දරුවන් දැක බලා ගැනීම සදහා ඔහු එහි ගොස් ඇති බවට ඔහුගේ නිතිඥයෝ කියා සිටියහ.

සැකකාර මන්ත්‍රී උපුල් හේරත් වෙනුවෙන් මාරවිල නීතිඥ සංගමයේ සභාපති ලලන්ත සරත්චන්ද්‍ර ඇතුළු නීතිඥ මණ්ඩලය පෙනී සිටි අතර ඉදිරිපත් වු කරුණු සලකා බැලු මාරවිල මහේස්ත්‍රාත් හා දිසා විනිසුරු සැකකරු හට ඇප ලබා දෙමින් නඩුව නැවත ලබන 24 වැනිදා විභාගයට ගැනීමට දින නියම කර තිබේ.

මාරවිල නීතිඥ සංගමය ද මුස්ලිම් විරෝධී ප්‍රහාර සම්බන්ධ සැකකරුවන් වෙනුවෙන් සිංහල බෞද්ධ පදනමකින් මුස්ලිම් විරෝධි ආකාරයෙන් කටයුතු කරන බවට ශ්‍රී ලංකා මානව හිමිකම් කොමිසම මීට පෙර නීතිඥ සංගමයේ සභාපතිවරයාට ලිඛිත පැමිණිල්ලක් ඉදිරිපත් කර ඇත.

Facebook Comments

wedding people