මාධ්‍යවේදිනියක හා සමාජ ක්‍රියාකාරිනියක ලෙස වසර 37කට වැඩි කාලයක් කටයුතු කර ඇති සීතා රංජනීගේ සාහිත්‍ය – සමාජ දායකත්වය ඇගයෙන සහෘදමය සංවාදයක් 2016 සැප්තැම්බර් මස 06 වන අඟහරුවාදා සවස 3.00 ට කොළඹ මහවැලි කේන්ද්‍ර ශ්‍රවණාගාරයේ දී පැවැත්වේ.
ආචාර්ය සුනිල් විජේසිරිවර්ධනයන්ගේ ප්‍රමුඛ දායකත්වයෙන් නීතිඥ එස්.ජී. පුංචිහේවා, ප්‍රවීණ සාහිත්‍යධර ජයතිලක කම්මැල්ලවීර, මහාචාර්ය සේන නානායක්කාර සහ නීතිඥ නිමල්කා ප්‍රනාන්දු ගේ අදහස් දැක්වීම් සහිතව පැවැත්වෙන මෙම සභාවේ මුලසුන ප්‍රවීණ ලේඛිකා ජයන්තා රුක්මණී සිරිවර්ධන විසින් හොබවනු ලබයි.
ප්‍රවීණ මාධ්‍යවේදී සමන් අතාවුදහෙට්ටි මෙහෙයවන මෙම සහෘද සංවාදයට ප්‍රදීපා ධර්මදාස, දීපිකා ප්‍රියදර්ශනී, චරිතා ප්‍රියදර්ශනී ගායනයෙන් එක්වෙති. එම ගීත ද ඇතුළත් සීතා රංජනීගේ ‘මල් වරුසා’ ගීත සංග්‍රහය ගොඩගේ ප්‍රකාශනයක් ලෙස එළිදැක්වීම ද මෙහිදී සිදු වේ.
සීතා රංජනීගේ මිතුරු මිතුරියන් පිරිසක් එක්ව සංවිධානය කරන මෙම අවස්ථාවට සහභාගී වන ලෙස සහෘද සැමට ඇරයුම් කෙරේ.
Facebook Comments
