ජනාධිපතිගේ තවත් කාර්ය සාධක බලකායකට විරෝධය පළවේ

කොරෝනා වසංගත සමයේ ශ්‍රී ලංකාවේ අධ්‍යාපනය නවීකරණය කොට අඛණ්ඩව පවත්වාගෙන යාම අරමුණු කොටගෙන පත් කරන ලද කාර්ය සාධක බලකාය දෝෂ සහගත බව ශ්‍රී ලංකාවේ ප්‍රමුඛතම ගුරු සංගමයක් ජනාධිපතිවරයාට දැනුම් දී තිබේ.

ජනාධිපති ලේකම් පී. බී ජයසුන්දර විසින් මාර්තු 31 දා නිකුත් කරන ලද අති විශේෂ ගැසට් පත‍්‍රය මගින් ප්‍රකාශයට පත් කර තිබුනේ “ශ්‍රී ලංකාවේ පවතින ප‍්‍රාථමික, ද්විතියික හා තෘතියික අධ්‍යාපන ක්ෂේත‍්‍රයන් කාලීන අවශ්‍යතාවයන්ට උචිත වන සේ නවීකරණය කිරීමේ අවශ්‍යතාවය හඳුනාගෙන ඇති හෙයින් ද තව ද මේ වන විට උද්ගත වී ඇති කොරෝනා වසංගත තත්වයන් හමුවේ අධ්‍යාපන ක්ෂේත‍්‍රය කිසිදු අයුරකින් පසුබෑමකට ලක්නොවී අඛණ්ඩව ඉදිරියට පවත්වාගෙන යාමේ ක‍්‍රමවේදයන් යොදා ගැනීමේ අවශ්‍යතාවය අවධානයට ලක් කරමින් ද,” ශ්‍රී ලංකාවේ අධ්‍යාපනය පිළිබඳව ජනාධිපති කාර්ය සාධක බලකායක් පත්කරන බවයි.

උසස් අධ්‍යාපන, තාක්ෂණ හා නවෝත්පාදන අමාත්‍යාංශයේ ලේකම් ඩී. එම්. ඒ. ආර්. බී. දිසානායක සහ අධ්‍යාපන අමාත්‍යාංශ ලේකම් එන්. එච්. එම්. චිත්‍රානන්දගේ සම සභාපතිත්වයෙන් යුත් එම කාර්ය සාධක බලකාය සාමාජිකයන් 26 දෙනකුගෙන් සමන්විතය. ඔවුන් විසින් ඉල්ලා සිටින තොරතුරු සියල්ල ලබා දිය යුතු බව රටේ සියලුම රාජ්‍ය නිලධාරීන්ට ජනාධිපතිවරයා විධාන කොට තිබේ.

එම බලවත් කාර්ය සාධක බලකාය ශ්‍රී ලංකාවේ අධ්‍යාපන ක්ෂේත‍්‍රයට උචිත වන ආකාරයේ නියෝජනයක් සහිතව පත්කොට නොමැති බව ලංකා ගුරු සංගමය අප්‍රේල් 7 අඟහරුවාදා ජනාධිපති ගෝඨාභය රාජපක්ෂ වෙත ලිඛිතව දැනුම් දී තිබේ.

පාසල් නෑ

ලංකාවේ පාසල් වර්ගීකරණය අනුව 1 ඒබී පාසල්, 1 සී පාසල්, 2 වර්ගයේ පාසල්, 3 වර්ගයේ පාසල් සහ ප‍්‍රාථමික පාසල් ලෙස පවතින බව පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් එම ලිපිය මගින් පෙන්වා දී ඇත්තේ විශේෂයෙන්ම පාසල් පද්ධතිය තුළ වැඩි ප‍්‍රමාණයක් පවතින්නේ ප‍්‍රාථමික පාසල් බවයි.

එසේ තිබියදී සමස්ත පාසල් වර්ගීකරණය අනුව මෙම කාර්ය සාධක බලකායට නියෝජනයක් ලබා දී නොමැති අතර, ප‍්‍රධාන පෙළේ ජාතික පාසල් කිහිපයක විදුහල්පතිවරු පමණක් මේ සඳහා පත්කර ඇති බව ගුරු සංගම් නායකයා ජනාධිපතිවරයාට පෙන්වා දී තිබේ.

“ඔවුන් සියලූ දෙනා 1 ඒබී පාසල් නියෝජනය කරන විදුහල්පතිවරුය. එසේම පාසල් පද්ධතිය තුළ ඉගෙනුම් ඉගැන්වීම් ක්‍රි යාවලියේ ප‍්‍රධානතම කාර්ය භාරය ඉටු කරන ගුරුවරුන්ගේ නියෝජනයක් ද මේ සඳහා නොමැතිවීම බරපතල ගැටලූවකි.”

රටේ අධ්‍යාපන ප‍්‍රතිපත්ති සකස් කරන ජාතික අධ්‍යාපන කොමිසමේ හා විෂයමාලා සකස් කිරීමේ හා සංවර්ධනය කිරීමේ කටයුතු සිදු කරන ජාතික අධ්‍යාපන ආයතනයේ නියෝජනයක් ද, ජාතික මට්ටමේ විභාග පවත්වන විභාග දෙපාර්තමේන්තුවේ නියෝජනයක් ද මෙම කාර්ය සාධක බලකායට නොමැතිවීම ගැටලූ සහගත තත්වයක් බව ගුරු සංගම් නායකයා සිය ලිපිය තුලින් තව දුරටත් පෙන්වා දී ඇත.

පෞද්ගලික පාසල් හිමිකරුවකු

“මේ ආකාරයේ අත්‍යවශ්‍ය නියෝජනයක් නොමැති වුවද මෙම කාර්ය සාධක බලකාය සඳහා පෞද්ගලික පාසල් හිමිකරුවෙකු සහ පෞද්ගලික පාසල් විදුහල්පතිවරු කිහිපදෙනකු පත් කර ඇත.”

නිදහස් අධ්‍යාපනයක් පවතින ශ්‍රී ලංකාවේ ඉහත සඳහන් කළ ආකාරයේ අත්‍යාවශ්‍ය නියෝජනයන් රහිතව පෞද්ගලික පාසල් ක්ෂේත‍්‍රය නියෝජනයට අවස්ථාව සලසා තිබීම කනගාටුදායක තත්වයක් වන අතර, පෞද්ගලික පාසල් ප‍්‍රධානීන් පත්කර තිබෙන්නේ කුමන පදනමකින් ද යන්න ගැටලූ සහගත බවද ද ගුරු සංගම් නායකයා වැඩි දුරටත් පෙන්වා දී තිබේ.

ජනාධිපතිවරයා විසින් පත් කර ඇති ශ්‍රී ලංකාවේ අධ්‍යාපනය පිළිබඳ කාර්ය සාධක බලකාය සඳහා සමස්ත පාසල් පද්ධතිය නියෝජනය වන ආකාරයෙන් විදුහල්පතිවරු, ගුරුවරු හා ජාතික අධ්‍යාපන කොමිසමේ, ජාතික අධ්‍යාපන ආයතනයේ හා විභාග දෙපාර්තමේන්තුවේ නියෝජිතයන් පත් කිරීමට කටයුතු යොදන ලෙස ලංකා ගුරු සංගමයේ ප්‍රධාන ලේකම් ජෝසප් ස්ටාලින් ජනාධිපතිවරයාගෙන් වැඩි දුරටත් ඉල්ලා තිබේ.