මරා දැමු මාධ්‍යවේදියාගේ සමරුවට ඔත්තු සේවා සහභාගී වේ

වෙඩි තබා ඝාතනය කරන ලද අයියතුරෛ නඩේසන් මාධ්‍යවේදියාගේ සොළොස්වන ගුණානුස්මරණය සදහා වැඩි වශයෙන් සහභාගි වී ඇත්තේ බුද්ධි අංශයේ නිලධාරීන් බව අනාවරණය වී තිබේ.

දමිල මාධ්‍ය සංසදයේ උප සභාපතිවරයකුද වු අයි. නඩේසන් මාධ්‍යවේදියා ඝාතනය කර මැයි 31 වන දිනට 16 වසරක් සපිරීම නිමිති කරගෙන යාපනය මාධ්‍ය සමාජයේ පැවැති අනුස්මරණය සදහා මාධ්‍යවේදීන් හත් දෙනකු පමණක් සහභාගී වුවත් ආරක්ෂක අංශ සාමාජිකයන් 14 දෙනකු පැමිිණ සිටි බව මාධ්‍යවේදීහු පවසති.

ඒ අතර නිල ඇදුම් ඇදි පොලිස් නිලධාරීන් දෙදෙනකු සිටි අතර සෙස්සන් බුද්ධි අංශ නිලධාරීන් බවට මාධ්‍යවේදීන් සැක කෙරේ.

කොරෝනා වසංගත තත්වය හමුවේ නිරෝධායන ඇදිරිනීතිය පනවා තිබු දිනක පැවැත්වු සැමරුම සදහා සහභාගී වු මාධ්‍යවේදීන් මුඛ ආවරණ පැලද සිටියත් ආරක්ෂක අංශ නිලධාරීන් කිසිවකු මුඛ ආවරණ පැළද නොසිටිය බව මාධ්‍ය වෙත නිකුත් වී තිබෙන ඡායාරූප වලින් සනාථ වේ.

ඝාතනයට ලක් වු තම සහෝදර මාධ්‍යවේදියා වෙනුවෙන් ඉටිපහන් දල්වා පුෂ්පෝපහාර දැක්වීමට යාපනය මාධ්‍ය සමාජය කටයුතු කර තිබෙන අතර එහිදී අවධාරණය වී ඇත්තේ නිදහසේ ගුණ අනුස්මරණයක් පැවැත්වීමේ අවකාශයත් අහිමිව ඇති බවයි.

යාපනය මාධ්‍ය සමාජයේ සම්බන්ධිකාරක රත්නමි දයාබරන්ගේ ප්‍රධානත්වයෙන් සැමරුම පවත්වා තිබේ.

නැගෙනහිර පළාත් මාධ්‍යවේදීන්ගේ එකමුතුව විසින් ද තම ප්‍රදේශයෙන් බිහිවු ජ්‍යෙෂ්ඨ මාධ්‍යවේදියා සිහිකරමින් මැයි 31 වන දිනම සැමරුමක් පවත්වා ඇත්තේ මඩකලපුව, කල්ලඩියේ පිහිටි වොයිස් ඔෆ් මීඩියා ආයතන පරිශ්‍රයේදීය.

අයියතුරෛ නඩේසන් වෙනුවෙන් විනාඩි කිහිපයක් නිහඬව හිඳිමින් ගෞරව දැක්වු නැගෙනහිර පළාත් මාධ්‍යවේදීන් පහන් දල්වා පුෂ්පෝපහාර දක්වා තිබේ.

සංගමයේ සභාපති දේව අධිරන්ගේ ප්‍රධානත්වයෙන් පැවැති ගුණ අනුස්මරණ උත්සවයේ දේශනය සිදු කර ඇත්තේ මාධ්‍යවේදී හා මහනගර සභා සාමාජික ශිවම්පාක්‍යනාදන් විසිනි.

වවිනියාව දෙමළ මාධ්‍යවේදීන්ගේ සංගමය විසින් ද ජුනි පළමු වනදා සිය කාර්යාලයේදී අයියතුරෛ නඩේසන් ගේ ඡායාරූපයකට ගෞරව දක්වා තිබුනේ ඉටිපන්දම් දල්වා පුෂ්පෝපහාර පිරිනමමිනි.

2004 මැයි 31

2004 මැයි 31 වනදා උදෑසන මඩකලපුවේ පිහිටි සිය කාර්යාලය වෙත යමින් සිටියදී අයියතුරෛ නඩේසන් මාධ්‍යවේදියා වෙඩිතබා ඝාතනය කර තිබුනි.

දමිල මාධ්‍ය සංසදයේ උප සභාපති නඩේසන් ගේ ඝාතනයෙන් පසු නැගෙනහිර පළාතේ දෙමළ මාධ්‍යවේදීන් ගණනාවකටම ජීවිතාරක්ෂාව පතා ප්‍රදේශය හැර යාමට හෝ විදේශ ගතවීමට බල කෙරිනි.

ජාත්‍යන්තර මානව හිමිකම් සංවිධානයක් වන හියුමන් රයිට්ස් වොච් (HRW) ඒ සම්බන්ධයෙන් චෝදනා කර තිබුනේ කරුණා පාර්ශවයටයි.

ඝාතනයට ලක්වන විට පනස් වියේ පසුවු දෙදරු පියෙක් වු අයියතුරෛ නඩේෂන් වීරකේසරි පුවත් පත, IBC තමිල් ඇතුළු කැනඩාවේ මාධ්‍ය ආයතන කිහිපයක් සඳහාද වාර්තා සැපයු අයෙකි.