උතුරු මුහුදේ, මුහුදු කූඩැල්ලන් සහ හක් බෙල්ලන් එක් රැස් කිරීම සදහා නිකුත් කරනු ලබන කිමිදුම් අවසර පත්‍ර දෙවැනි කෝවිඩ් වසංගත රැල්ල යාපනයේ පැතිරීම වැලැක්වීම සඳහා තාවකාලිකව අත්හිටුවීමට රජය තිරණය කර තිබේ.
එම කිමිදුම්කරුවන් ඉන්දීය ධීවරයන් සමග ගනුදෙනු කිරීමෙන් යාපනය අර්ධද්වීපයේ වැසියන් අතර කොරෝනා වසංගතය පැතිරීමේ දැඩි අවදානමක් පවතින බවට කැබිනට් මණ්ඩලය චෝදනා කරයි.
පළමු කොරෝනා රැල්ලේදී රජය එවැනි පියවරක් අනුගමනය කළ බවක් වාර්තා වී නැත.
ධිවර හා ජලජ සම්පත් දෙපාර්තමේන්තුව විසින් යාපනය අර්ධද්වීපයේ බටහිර වෙරළ තීරයේ මුහුදු කූඩැල්ලන් සහ හක් බෙල්ලන් යන මුහුදු ජීවීන් එක් රැස් කිරීම සදහා විශේෂ කිමිදුම් අවසර පත්‍ර නිකුත් කරනු ලබයි.
ඒ අනුව එම කටයුතුවල නිරත වන කිමිදුම් කණ්ඩායම් එම ප්‍රදේශයේ වෙරළ තීරයේ තාවකාලිකව පදිංචිව සිටිමින් එම කටයුතු වල නිරත වන බව රජයේ ප්‍රවෘත්ති දෙපාර්තමේන්තුව සදහන් කරයි.
“එම කාර්යය සදහා අවසරපත්‍ර ලබා ගෙන ඇති ඇතැම් කිමිදුම්කරුවන් විසින් එම අවසරය අවභාවිත කරමින් එම මුහුදු තීරයේ ට්‍රොලර් යාත්‍රා මගින් ධීවර කටයුතුවල නිරත වන ඉන්දීය ධීවරයන් සමග නීති විරෝධි ජාවාරම් කටයුතු වල නිරත වන බව වාර්තා වී ඇත.”
එම හේතුවෙන් යාපනය අර්ධද්වීපයේ වැසියන් අතර කොවිඩ් -19 වසංගතය පැතිරීමේ දැඩි අවදානමක් පවතින බවට නිරීක්ෂණය වී ඇති බවයි රජය පවසන්නේ.
ඒ අනුව මුහුදු කූඩැල්ලන් සහ හක් බෙල්ලන් යන මුහුදු ජීවීන් එක් රැස් කිරීම සදහා නිකුත් කරනු ලබන කිමිදුම් අවසර පත්‍ර තාවකාලිකව අත්හිටුවීම පිණිස ධීවර අමාත්‍යවරයා ඉදිරිපත් කළ යෝජනාව ඔක්තෝබර් 5 සදුදා රැස්වු අමාත්‍ය මණ්ඩලය විසින් අනුමත කර තිබේ.
Facebook Comments
