වසංගතයට වැඩියෙන්ම ගොදුරුවූ රටින් එන රාජ්‍ය තාන්ත්‍රිකයාට විරෝධය

0
Ivory Agency Sri Lanka
wedding people

ලොව වැඩිම කොරෝනා ආසාදිතයන් සිටින රටෙහි රාජ්‍යතාන්ත්‍රිකයෙක් දෙවැනියට කොරෝනා ආසාදිතයන් සිටින රටට ගොස් නිරෝධායන නීති අනුගමනය නොකරම ශ්‍රී ලංකාවට ද පැමිණීමෙන් ඇතිවන සෞඛ්‍ය අවදානම ගැන හිටපු පාර්ලිමේන්තු මන්ත්‍රීවරයකු අනතුරු අඟවා තිබේ.

කොරෝනා වසංගතය හමුවේ හඳුන්වා දී තිබෙන නීති රෙගුලාසි කිසිවක් රට තුලත්, රටින් පිටත් බලවතුන් සහ ධනවතුන්ට ක්‍රියාත්මක නොවී දුප්පත් අසරණ ජනතාවට පමණක් ක්‍රියාත්මක වන බවයි ජනතා විමුක්ති පෙරමුණේ ජාතික සංවිධායක සහ හිටපු පාර්ලිමේන්තු මන්ත්‍රී බිමල් රත්නායක පවසන්නේ.

එම පක්ෂයේ මූලස්ථානයේ ඔක්තෝබර් 25 ඉරිදා පැවැති මාධ්‍ය හමුවකදී ඔහු ඒ බව අවධාරණය කළේ ඇමෙරිකානු රාජ්‍ය ලේකම් මයික් පොම්පියෝ මේ මොහොතේ ලංකාවට පැමිණීම සම්බන්ධයෙන් ප්‍රශ්න කරමිනි.

මීට ඉහතදී කොරෝනා වසංගතය මුලින්ම උතුරා ගිය චීන රාජ්‍ය තාන්ත්‍රික යැන් ජියෙෂී ද ශ්‍රී ලංකාවට පැමිණියේ රට තුලට පැමිණෙන අනිකුත් පුද්ගලයන්ට පනවා ඇති නිරෝධායන තහංචි මගහරිමිනි.

ඇමරිකානු රාජ්‍ය ලේකම් මයික් පොම්පියෝ ඔක්තෝබර් 27 අඟහරුවාදා හවස් කාලයේදී මෙරටට ඒමට නියමිතය.

ඔහුගේ පැමිණීමට විරෝධය පළ කරමින් ජනතා විමුක්ති පෙරමුණ අද ශ්‍රී ලංකාවේ අමෙරිකානු තානාපති කාර්යාලය ඉදිරිපිට දී විරෝධතාවයක් ද දියත් කළේය.

“ශ්‍රී ලංකාවේ ස්වාධීනත්වයට අත නොතබනු – ශ්‍රී ලංකාවට විදේශ බලපෑම් එපා” මැයෙන් එම විරෝධතාව සංවිධානය කර තිබුණි.

පසුගියදා පැවැති මාධ්‍ය හමුවේදී ජනතා විමුක්ති පෙරමුණේ ජාතික සංවිධායක වැඩි දුරටත් පෙන්වා දී තිබුනේ ශ්‍රී ලංකාවේ රජය හා විදේශ බලවතුන් නිරෝධායන නීතිය මායිම් නොකරන ආකාරයයි.

“පවතින කෝවිඩ් තත්වය යටතේ ජනතාවත් සෞඛ්‍ය අංශයත් අදාල නිරෝධායන කටයුතු අනුව කටයුතු කළත් ශ්‍රී ලංකා රජයත් විදේශ බලවත් රාජ්‍යයනුත් ඒ නීතිරීති කිසිවක් පිළිපදින්නේ නැහැ. ජනතාවට මුඛවාඩම් දාගන්න කියලා ඉතාම හදිසි තත්වයක් යටතේ සිදුවන ඇමරිකානු රාජ්‍ය ලේකම්වරයාගේ ශ්‍රී ලංකා සංචාරය පිළිබඳව මතුවන ගැටළු රාශියක් තිබෙනවා.”

ඇමරිකාව තුළත් ලෝකය තුළත් ලංකාවෙත් මෙතරම් බරපතළ තත්වයක් තිබියදී ඇමරිකානු රාජ්‍ය ලේකම්වරයා හදිසියේ නිල සංචාරයකට පැමිණීමේ හේතුව ශ්‍රී ලංකා ආණ්ඩුව පැහැදිලි කළ යුතුයැයි පැවසු හිටපු මන්ත්‍රීවයා එහිදී වැඩි දුරටත් ප්‍රශ්න කළේ ඇමරිකානු ජනාධිපතිවරණයට දින 5ක් තිබියදී ඇමරිකානු අධිරාජ්‍යයේ යුද සහ දේශපාලන පණිවුඩ ලෝකය වටේ ගෙනියන පණිවුඩකරුවා ලංකාවට එන්නේ කුමන අරමුණක් අරබයාද යන්නයි.

ලෝකයේ වැඩිම කොරෝනා රෝගීන් සිටින ඇමරිකාවේ සිට ඊළඟට වැඩිම රෝගීන් වාර්තා වී තිබෙන ඉන්දියාවට ගොස් ලංකාවට පැමිනෙන විට නිරෝධායන නීතිරීති බරපතලව ක්‍රියාත්මක විය යුතුව තිබෙන බව පෙන්වා දෙන හිටපු මන්ත්‍රීවරයා චෝදනා කරන්නේ ආණ්ඩුව සහ ආණ්ඩුවට හිතවත් මාධ්‍ය මෙරටේ කොරෝනා ව්‍යාප්තිය ගැන වාර්තා කිරීමට පැකිලුනත් එහි බරපතල තත්වයක් පවතින බවයි.

කොරෝනා සම්බන්ධ නීති ශ්‍රී ලංකාවේ ධනවතුන් හා බලවතුන් ඉදිරියේ ක්‍රියාත්මක නොවන්නාක් මෙන්ම ජනමාධ්‍ය ඊට අනුගත වන ආකාරයත් ඔහු පැහැදිලි කළේ මෙලෙසිනි.

” කොරෝනා සම්බන්ධ නීතිරීති ධනවතුන්ට සහ බලවතුන්ට අදාල නැති බව තොණ්ඩමන් මහතාගේ අවමගුල් උළෙලේදී පළමුව අපි දැක්කා. පාර්ලිමේන්තුව තුළ කටයුතු කිරීමේදීත් ඒ බව දැක්කා. නමුත් දුප්පතුන්ට රෝගය වැළඳුණාම ඔවුන් ආගිය තැන් හැම තැනක්ම ප්‍රචාරය කරනවා. ඇඟළුම් කර්මාන්ත ශාලාවේ ඇතිවුණු පොකුර සම්බන්ධයෙන් රෝගී වූ සේවිකාවගේ ඡායාරූප සියල්ල පළ කළත් ප්‍රධානින් සම්බන්ධ කිසි දෙයක් වාර්තා කර නැහැ.”

මිනුවන්ගොඩ බ්‍රැන්ඩික්ස් (Brandix)ඇඟලුම් කම්හලෙන් ඇරඹී දෙවැනි කොරෝනා රැල්ලට හේතු වුයේ ඉන්දියාවේ සිටි පැමිණ නිරෝධායනය නොවු පිරිසක් බවට මාධ්‍ය විසින් පසුගිය සමයේ සමාජය තුළ සැක සංකා මතු කර තිබුනි.

ඇමරිකානු රාජ්‍ය ලේකම් මයික් පොම්පියෝගේ ලංකාගමනයට පෙරාතුව එක්සත් ජනපද ගුවන් හමුදාවේ භටයන් ද රැගත් ග්ලෝබ්මාස්ටර් III යුද ප්‍රවාහක යානාවක් පසුගිය සිකුරාදා රාත්‍රියේ කටුනායක ජාත්‍යන්තර ගුවන් තොටුපලට ගොඩබා තිබුනි.

එම යානයේ පැමිනි පිරිස් නිරෝධායන ක්‍රියාවලියට නතු නොවීම සම්බන්ධයෙනුත් හිටපු මන්ත්‍රීවරයා ප්‍රශ්න කළේය.

“ග්ලෝබ් මාස්ටර්-3 කියන ගුවන් යානය මීට දින කිහිපයකට පෙර ලංකාවට පැමිණියා. ඇමරිකන් සෙබළුන් 134ක් පමණ සහ වාහන ගෙනියන්න පුළුවන් මේ යානයෙන් පැමිණි පුද්ගලයන් කවුද? මොවුන් සුපර් හියුමන්ලාද? නැත්නම් ලංකා ආණ්ඩුව ධනවතුන් සහ බලවතුන් ඉදිරියේ කොරෝනා නීති ක්‍රියාත්මක කරන්නේ නැති බවට තවත් උදාහරණයක්ද? ඇමරිකානු රාජ්‍ය ලේකම්වරයා ලංකාවට එන්නේ මල් පැළ බෙදන්න නෙවෙයි. තර්ජනය කරන්න. ලංකාව දණගස්වලා එන්නේ. එසේ එන අයගේ ආරක්‍ෂක බල ඇණිය ඇවිල්ලා නතර වෙලා ඉන්නේ කොහෙද? ඔවුන් යන්නේ එන්නේ කොහෙද? මොවුන් නතර වෙන හෝටල්වල සේවක සේවිකාවන්ගේ ආරක්‍ෂාවට වග කියන්නේ කවුද? ” ජනතා විමුක්ති පෙරමුණේ ජාතික සංවිධායක වැඩි දුරටත් ප්‍රශ්න කර තිබුනි.

Facebook Comments