අධ්‍යාපන මිලිටරිකරණයට හා වැටුප් විෂමතාවට විරෝධය දැක්වීම නිසා අත් අඩංගුවට ගන්නා ලද පනහකට ආසන්න ගුරුවර, ගුරුවරියන් දිගටම රඳවා ගැනීමට රජය ගත් උත්සාහය අසාර්ථක වී තිබේ.
විරෝධතා දැක්වූ කාන්තාවන් 16 ක් ඇතුළු ගුරුවරුන් 48 ක් නිදහස් කළහොත් “මහජන කැළඹීමක් ඇතිවිය හැකි” බවට බිය පල කරමින් ඇප නොදෙන ලෙසට නීතිපති දෙපාර්තමේන්තුව කළ ඉල්ලීම ඉවත ලූ කොළඹ කොටුව මහේස්ත්‍රාත්වරයා උද්ඝෝෂකයන්ට අයත් වාහන 10 ක් ද මුදා හැරීමට නියෝග කළේය.
වසර 24 ක් පුරා කිසිදු ආණ්ඩුවක් විසදීමට උත්සහා නොකළ ගුරු වැටුප් විෂමතා ඉවත් කරන මෙන් සහ අධ්‍යාපනය මිලිටරිකරණය හා පෞද්ගලිකරණය උදෙසා රාජපක්ෂ ආණ්ඩුව ඉදිරිපත් කර ඇති කොතලාවල පනතට එරෙහිව ගුරු සංගම් ගෙන යන සටනේ තවත් එක් අදියරක් වූ අගනගරයේ සිව් කොනේ සිට ජනාධිපති කාර්යාලය දක්වා ගමන් කරන රථ පෙළපාලියට එක්ව සිටියදී පොලිසිය විසින් ඊයේ මෙම 48 දෙනා අත්අඩංගුවට ගෙන තිබිණි. ගුරු පිරිස කොටුව වරාය පොලිසියේ රඳවා තබා ගනිමින් අද [05] කොටුව මහේස්ත්‍රාත් අධිකරණයට ඉදිරිපත් කරමින් කොළඹ අපරාධ කොට්ඨාශය හා නීති පති දෙපාර්තමේන්තුව මොවුන්ට ඇප ලබා නොදෙන ලෙස අධිකරණයෙන් ඉල්ලා සිටියේය.
නීතිපතිවරයා වෙනුවෙන් පෙනීසිටි නියෝජ්‍ය සොලිස්ටර් ජෙනරාල් දිලීප පිරිස් කියා සිටියේ මෙම පිරිස නීතිවිරෝධී රැස්වීමකට එක් වී මහජන පිඩාවක් කළ බැවින් ද, මොවුන් ගැන විමර්ශන අවසන් වී නොමැති බැවින් ද ඇප ලබා නොදෙන ලෙසයි. මොවුන් මුදා හැරියොත් මහජන කැළඹීමක් ඇතිවිය හැකි බව ද නියෝජ්‍ය සොලිස්ටර් ජනරාල් කියා සිටියේය.
අත්අඩංගුවේ පසුවූ ගුරුවරුන් වෙනුවෙන් පෙනී සිටි ජනාධිපති නීතිඥ ගුණරත්න වන්නිනායක කියා සිටියේ මෙය නීතිවිරෝධී රැස්වීමක් නොවන බවත්, පුරා වසර 24 ක් තිස්සේ නොවිසඳුනු තමන්ගේම වෘත්තීය ගැටළුවක් වූ ගුරු හා විදුහල්පති වැටුප් විෂමතාවන්ට විසදුමක් සොයා විදි බැස ඇති බවයි.
දෙපාර්ශවයේ කරුණු සලකා බැලු කොටුව මහේස්ත්‍රාත් ප්‍රියන්ත ලියනගේ කියා සිටියේ පොලීසිය ගොනු කර ඇති චෝදනාවලට ඇප පනතේ 14 වගන්තිය අනුව ඇප ලබා දීම ප්‍රතිෂේප කළ නොහැකි බැවින් පොලිස් අත්අඩංගුවේ සිටින පිරිස මුදා හරින ලෙසය. ඒ අනුව එක් අයකුට රුපියල් ලක්‍ෂයක පුද්ගලික ඇප මත මුදා හරින ලෙසත්, පොලිසිය බාරයට ගෙන තිබුණු උද්ඝෝෂකයන්ට අයත් වාහන 10 ක් ද මුදා හැරීමටත් මහේස්ත්‍රාත්වරයා නියෝග කළේය.
මේ පිලිබඳ නඩු විභාගය යළිත් සැප්තැම්බර් 17 වැනිදා කැඳවීමට නියමිතය.
අධ්‍යාපනය හමුදාකරණයට එරෙහිව අගනුවර උද්ඝෝෂණය කළ ලංකා ගුරු සංගමයේ නායක ජෝසප් ස්ටාලින් ඇතුළු ක්‍රියාධාරීන් පිරිසක් මීට මාසයකට ඉහතදී ගුවන් හමුදා කඳවුරක් තුල බලහත්කාරයෙන් රඳවා තබා ගැනීමට එරෙහිව නැගුනු දේශීය හා විදේශීය විරෝධය හමුවේ ඔවුන් මුදා හැරීමට රජයට සිදු විය.
Facebook Comments
