පළාත් සභා වලට ඉඩම් බලතල ලබා දෙන ලෙස උතුරු නැගෙනහිරින් සිදු කෙරන ඉල්ලීම් වැඩි වී ඇති මොහොතක, ජනාධිපතිවරයාගේ උතුරේ නියෝජිතයා ඉඩම් කොල්ලයකට අනු බල දෙන බවට චෝදනා එල්ල වී තිබේ.
උතුරු පලාත් ආණ්ඩුකාර කාර්යාලය ඉදිරිපිටදී දෙසැම්බර් 1 වැනි බදාදා විරෝධතාවයක් දියත් කරමින් යාපනයේ, මාදගල් ප්‍රදේශයේ ජනතාව චෝදනා කළේ තම ඉඩම් බලහත්කාරයෙන් අල්ලා ගැනීමට නාවික හමුදාව දරන උත්සාහයන්ට උතුරු පළාත් ආණ්ඩුකාර ජීවන් ත්‍යාගරාජාත් සහාය පළ කරන බවයි.
මානුෂීය නියෝජිතායතන සාමුහිකයේ (CHA) ප්‍රධානී ධුරයද හොබවන්නේ උතුරු පළාත් ආණ්ඩුකාර ජීවන් ත්‍යාගරාජා ය.
ඉඩම් පවරා ගැනිම වෙනුවෙන් මැනීමේ කටයුතු සදහා පැමිණෙන නිලධාරීන්ට බාධා පමුණුවන අයට එරෙහිව දැඩි පියවර ගන්නා බවට ආණ්ඩුකාර වරයා සිදු කර තිබෙන ප්‍රකාශයක් ඔහුට එම චෝදනාව එල්ල වීමට හේතු වී ඇති බවයි පළාත් බද වාර්තාකරුවන් පවසන්නේ.
මේ සතියේ ආරම්භක දින දෙක තුලදී යාපනයේ, මාදගල් නැගෙනහිර හා බටහිර ප්‍රදේශයන්හි ස්ථාන තුනක දෙමළ ජනයාට අයත් පෞද්ගලික ඉඩම් නාවික හමුදා කඳවුරු පුළුල් කිරීම සදහා බලහත්කාරයෙන් අත්පත් කරගැනීමට දැරු උත්සාහයන් සියල්ල ප්‍රදේශයේ දේශපාලනඥයන් සමග එක්ව විරෝධතා පවත්වා පසු බැස්සවීමට මාදගල් ජනයා සමත්ව තිබුනි.
අද විරෝධතාවය සදහා එක්ව සිටියේ නාවික හමුදාව අත්පත්කරගන්නට උත්සාහ දැරූ ඉඩම් වල හිමිකරුවන් සහ ඔවුන්ගේ පවුල් වල සාමාජිකයන් කිහිප දෙනෙකු බව පළාත් බද වාර්තාකරුවෝ වැඩි දුරටත් පවසති.
සිය ඉඩම් ගැටළු පිළිබදව සාකච්ඡා කිරීම සදහා අවස්ථාවක් ලබා දෙන බවට ආණ්ඩුකාර වරයා පොරොන්දු ලබා දී ඇතත් විවිධ හේතුන් ඉදිරිපත් කරමින් ඔහු එම අවස්ථාව මගහරින බවටත් විරෝධතාකරුවෝ අද චෝදනා කර තිබේ.
යාපනයේ වාර්තාකරුවන් වැඩි දුරටත් අවධාරණය කරන්නේ දෙමළ ජනයාට අයත් පෞද්ගලික ඉඩම් නාවික හමුදා කදවුරු පුළුල් කර ගැනිම සදහා බලහත්කාරයෙන් අත්පත්කරගැනීමේ උත්සාහයන් රැසක්ම පසුගිය සමයේ ක්‍රියාත්මක වු බවයි.
Facebook Comments
