දේශපාලන පළිගැනීම් පිළිබඳව සොයා බැලූ ජනාධිපති කොමිසම විසින් තමන්ට එරෙහිව සිදුකරන තිබෙන නිර්දේශ බලරහිත කිරීමේ රිට් ආඥාවක් නිකුත් කරන ලෙස ඉල්ලා අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර අභියාචනාධිකරණයට පෙත්සමක් ඉදිරිපත් කර තිබේ.
එම පෙත්සමේ වගඋත්තරකරුවන් ලෙස දේශපාලන පළිගැනීම් පිළිබඳව සොයා බැලූ ජනාධිපති කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න ඇතුළු එම කොමිසමේ සාමාජිකයින්, ඇවන්ගාඩ් සමාගම, එම සමාගමේ සභාපති නිශ්ශංක යාපා සේනාධිපති, ජ්‍යෙෂ්ඨ රජයේ නීතිඥ ජනක බණ්ඩාර ඇතුළු පිරිසක් නම් කර ඇත.
පෙත්සම්කාර ශානි අබේසේකර සඳහන් කර සිටින්නේ තමන්ට දේශපාලන පළිගැනීම් සොයා බැලූ ජනාධිපති කොමිසම හමුවේ පෙනී සිට ලෙස 2020 වසරේ ජූනි මස 16 වනදා නොතීසියක් ලැබුණු බවයි.
ඇවන්ගාඩ් සමාගමේ සභාපතිවරයා විසින් කරන ලද පැමිණිල්ලකට අනුව තමන්ව මෙලෙස කැඳවා තිබූණ බවද ඔහු පවසයි.
ඇවන්ගාඩ් සමාගමේ සභාපතිවරයා විසින් කරන ලද එම පැමිණිල්ල විභාග කිරීමට අදාළ කොමිසමට බලයක් නොමැති බව පෙන්වා දෙන ශානි අබේසේකර එම පැමිණිලි වලට අදාළව කොළඹ ත්‍රිපුද්ගල මහාධිකරණ විනිසුරු මඩුල්ල සහ මහේස්ත්‍රාත් අධිකරණය හමුවේ නඩු විභාග පැවති බව සඳහන් කරයි.
එබැවින් ඒ සම්බන්ධයෙන් විමර්ශනයක් පැවැත්වීමට අදාළ කොමිසමට බලයක් නොමැති බවත් ඔහු පෙන්වා දෙයි.
එබැවින් තමන්ට එරෙහිව 2020 වසරේ නොවැම්බර් මස 24 වනදා අදාළ කොමිසම විසින් නිකුත් කර තිබෙන නිර්දේශ නීතිමය පදනමකින් තොර නීතිවිරෝධී නිර්දේශ බව පෙන්වාදෙන පෙත්සම්කරු එබැවින් ඒවා බලරහිත කිරීමේ ආඥාවක් නිකුත් කරන ලෙසත් අධිකරණයෙන් ඉල්ලා තිබේ.
Facebook Comments
