සීමා මායිම් පැන ලංකා මුහුදේ මත්ස්‍යය සම්පත කොල්ල කන ඉන්දීය ධීවරයන්ගේ ගැන එක්සත් ජාතීන්ගේ සංවිධානය වෙත පැමිණිල්ලක් ඉදිරිපත් වී තිබේ.
“අපේ මුහුදට අනවසරයෙන් ඇවිත් අපේ ධීවරයන්ගේ ජීවනෝපායට හානි කරන ඉන්දීය ධීවරයන් ගැන නාවික හමුදාව කිසිම පියවරක් ගන්නේ නැහැ.ඒත් නාවික හමුදාව අපේ ධීවරයන්ගේ බෝට්ටු මුහුද මැද්දේ දී හරස් කරලා “පාස්“තියෙනවා ද නැත්නම් මත්ද්‍රව්‍ය තියෙනවා ද කියලා සෝදිසි කරමින් කරදර කරනවා.ඉන්දීය ධීවරයන්ගේ මාළු කොල්ලය ගැන නාවික හමුදාවට ගානක්වත් නැහැ,“යැයි දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් කියා සිටියේ එක්සත් ජාතින්ගේ සංවිධානයේ මෙරට නිත්‍ය නියෝජිතවරිය හැනා සිංගර් හමුවී අනවසර ඉන්දීය ධීවරයන්ගේ ගැටලුව ගැන පැමිණිලි කිරීමෙන් අනතුරුව මාධ්‍ය වෙත අදහස් දක්වමිනී.
උතුරේ දෙදින සංචාරයක නිරතව සිටින එක්සත් ජාතීන්ගේ නිත්‍ය නියෝජිතවරිය සමඟ යාපනයේ නාවලර් වීදියේ එක්සත් ජාතීන්ගේ කාර්යාලයේ පෙබරවාරි 1 වැනිදා පැවති හමුවට දෙමළ ජාතික ජනතා පෙරමුනේ පාර්ලිමේන්තු මන්ත්‍රී සෙල්වරාජා ගජේන්ද්‍රන් සහ එම පෙරමුණේ කාන්තා සංවිධායක එස්.වාසුගි සහභාගිවී තිබේ.
ලංකා මුහුදට අනවසරයෙන් පැමිණෙන ඉන්දීය ට්‍රෝලර් යාත්‍රා මගින් යාපනයේ ධීවරයන්ගේ බෝට්ටු හා දැල් ආම්පන්න වලට හානි පමුණුවා මත්ස්‍යය සම්පත සොරා ගන්නා බැවින් ඊට කඩිනම් විසදුම් ඉල්ලා වඩමාරච්චි ධීවරයන් ඇරඹි උද්ඝෝෂණය මේ වන විට යාපන අර්ධද්වීපය උණුසුම් කරන්නට සමත් වී ඇත්තේ ඉන්දීය ට්‍රෝලර් යාත්‍රාවක් ගැටීමෙන් මුහුදු බත්වූ වඩමාරච්චි ධීවර බෝට්ටුවේ ගමන් ගත් ධීවරයන්ගේ මලසිරුරු වෙරළට ගොඩ ගැසීමෙන් අනතුරුවයි.
වඩමාරච්චි වත්තිරායන් පදිංචි ජෝශප් ප්‍රේම්කුමාර් සහ අරුන් කුමාර් තනියෛමාරන් නම් මියගිය ධීවරයන් දෙදෙනාගේ මෘත දේහ මහජන ගෞරවය පිණිස වත්තිරායන් උදය සුර්යන් ක්‍රීඩාංගණයේ තැන්පත් කිරීමෙන් අනතුරුව පෙබරවාරි 1 වැනිදා සවස වත්තිරායන් පොදු සුසානයේදී භූමිදානය කර තිබේ.
අවමගුල් අවස්තාව සඳහා පාර්ලිමේන්තු මන්ත්‍රී සිවඥානම් ශ්‍රීධරන්,දෙමළ ජාතික පක්ෂයේ ප්‍රධාන ලේකම් එම්.කේ. සිවාජිලිංගම්, පරෙත්තුරෙයි ප්‍රාදේශීය සභාවේ සභාපති වී.ප්‍රසාන්දන්,වඩමාරච්චි නැගෙනහිර ධීවර සමුපකාර සමිතියේ සභාපති කේ.සම්මුගනාදන් ඇතුළු සිය ගනනක් ජනයා සහභාගීවූ බව එහි ගිය යාපනේ මාධ්‍යවේදියෝ පවසති.
දින කිහිපයක් පුරා පරිට්ටිතුරෙයි සිට පොන්නාලෙයි දක්වා දිවෙන මාර්ගය සුප්පර්මඩම් හිදී ඉන්දීය ධීවරයන් විසින් හානි පමුණුවන ලද බෝට්ටු හා දැල් ආම්පන්න මගින් හරස් කොට උද්ඝෝෂණයේ යෙදෙන ධීවරයන් පවසන්නේ ඉන්දීය ධිවර ප්‍රශ්නයට විසදුමක් ලබා නොදුනහොත් යාපනය පුරා ඇති සියළුම රජයේ ආයතන වට කරන බවයි.
මුහුදේදී මිය ගිය ධීවරයන් සිහිකර මිනිත්තු දෙකක නිහඬතාවකින් පසුව වඩමාරච්චි නැගෙනහිර,මර්දන්කර්නි ප්‍රාදේශීය ලේකම් කාර්යාලයේ ඇතුල්වීමේ හා පිටවීමේ ගේට්ටු හරස් කොට ගත් යාපනේ ධීවරයන් වෙනුවෙන් සාධාරණය ඉටු කරන මෙන් ඉල්ලා උද්ඝෝෂණය කළේය.
මේ අතර පෙබරවාරි 1 වැනිදා රාත්‍රියේ වඩමාරච්චි මුහුදට අනවසරයෙන් ඇතුල් වී මසුන් සොරකමේ යෙදී සිටී ඉන්දීය ට්‍රෝලර් යාත්‍රාවක් වටකළ උතුරේ ධීවරයන්ට පෙට්ට්‍රල් බෝම්බ ප්‍රහාරයක් එල්ල කරමින් ඉන්දීය ධීවරයන් පලා ගිය බව ධීවර සමිති නියෝජිතයෝ පවසති.
ඒ ගැන සොයා බැලීමට පැමිණි ධීවර ඇමැතිවරයාට නොසන්සුන්වූ ධීවරයන්ගෙන් විරෝධය එල්ල වීමත් සමගින් ඔහු ප්‍රදේශයෙන් පිටත්ව ගොස් තිබේ.
“13 වැනි ව්‍යවස්ථා සංශෝධනයට එරෙහිව උද්ඝෝෂණය කරන සමහර දේශපාලන පක්‍ෂ ධීවරයන්ට මත්පැන් ලබා දී උසිගන්වනවා.නීතිය අතට අරන් බෝට්ටු වටකරලා ඉන්දීය ධිවරයන්ව අල්ලන්න ගිහින් මිය ගිහින් තියෙනවා.ඒ වගේ අවස්ථාවල නාවික හමුදාව නීතිය අනුව ඊට විරුද්ධව ක්‍රියා කරයි.වඩමාරච්චි මුහුදේදීත් ඉන්දීය ධීවරයන්ව අල්ලන්න ගිහින් දෙපැත්ත අතර ගැටුම් ඇතිවෙලා ඉන්දියන් ධීවරයෝ පෙට්‍රල් බෝම්බ ගහලා ඒක බලන්න අපි එහෙ ගියාම 13 ට විරුද්ධ අය ධීවරයෝ අවුස්සලා,ආරක්‍ෂක හේතු මත අපි ආපහු ආවා.“යැයි ධීවර ඇමැති ඩග්ලස් දේවානන්දා `ටැමිල් වින්“ වෙබ් අඩවිය සමග සාකච්ජාවක් කරමින් ප්‍රකාශ කර ඇත.
උතුරේ ධීවරයන් අවධාරණය කරන්නේ ඉන්දීය ධීවරයන් පැමිණ ලංකා මුහුදේ මාළු කොල්ල කෑම නවතා ලීමට ඉන්දියානු ආණ්ඩුව පියවර නොගන්නේ නම්,ඔවුන් නැවත්වීමට චීනයේ සහයෝගය ලබා ගන්නා බවයි.
Facebook Comments
