රුපියල් 1000 ගෙවන්නට විරුද්ධ “වතු සමාගම් කීපයක් පමණයි”

වතු කම්කරුවන්ට පඩි පාලක සභාවෙන් අනුමත කළ රුපියල් දහසක දෛනික වැටුප ලබා නොදෙන්නේ සමාගම් කිහිපයක් පමණක් බව ආණ්ඩුව ප්‍රකාශ කර තිබේ.

“වතු සමාගම් 22 අතුරින් සමාගම් 6 ක් විතරයි කම්කරුවන්ට රුපියල් දහසේ පඩිය දෙන්න මැලි වෙන්නේ. අනෙක් සමාගම් 16 දාහේ පඩිය ලබා දෙනවා. මිට විසදුමක් අපි ඉක්මනින්ම ලබා දෙනවා,“යැයි රාජපක්‍ෂ ආණ්ඩුවේ හවුල් කාර පාර්ශවයක් වන ලංකා කම්කරු කොංග්‍රසයේ ප්‍රධාන ලේකම්, රාජ්‍ය අමාත්‍ය ජීවන් තොණ්ඩමාන් පවසයි.

තලවාකැලේ නගරයේ ඊයේ [23] පැවති උත්සවයකට එක්වූ රාජ්‍ය ඇමතිවරයා මාධ්‍යයට අදහස් දක්වමින් වැවිලි කර්මාන්ත ඇමැතිවරයා සමගත් කතා බහ කොට තම විසදුම් ක්‍රියාත්මක කරන බව කියා සිටියත් මේ වන විට වතු සමාගම් විස්සක් 1000 ගෙවීමට විරෝධය පා උසාවි ගොස් සිටී.

තේ සහ රබර් වතු කම්කරුවන්ට ගෙවිය යුතු දෛනික අවම වැටුප රුපියල් 1,000ක් බවට නියම කරමින් නිකුත් කළ ගැසට් නිවේදනය බල රහිත කරන ආඥාවක් නිකුත් කරන ලෙස ඉල්ලා වතු සමාගම් 20ක් විසින් රිට් පෙත්සම් ගොනු කර තිබේ. පෙත්සම්කරුවන් ලෙස ආගරපතන, ඇල්පිටිය ඇතුළු වතු සමාගම් විස්සක් කියා සිටින්නේ කම්කරුවන්ගේ වැටුප් වැඩි කිරීම නිසා වතු කර්මාන්තය අර්බුදයකට ලක් වන බවයි.

වැවිලි කර්මාන්ත ඇමැති රමේෂ් පතිරණ ආණ්ඩුවේ අදහස ඉදිරිපත් කරමින් ඉකුත් දා පාර්ලිමේන්තුවේදී කියා සිටියේ වතු සමාගම් හා වෘත්තීය සමිති සාමුහික ගිවිසුමට එළඹී කම්කරුවන්ගේ වැටුප් ප්‍රශ්නය විසඳාගන්නා ලෙසයි.

යහපාලන ආණ්ඩු සමයේ වතු කම්කරුවන්ගේ වැටුප රුපියල් 50 කින් වැඩි කර ගත නොහැකි වූ කණ්ඩායම් ලංකා කම්කරු කොංග්‍රසය විවේචනය කිරීම ගැන රාජ්‍ය ඇමැති තොණ්ඩමාන් මෙහිදී දොස් පවරනු ලැබිණි.

“පාන් පිටි සහනාධාර ඕනෑ කිව්වා. අපි ඒක ලබා දුන්නා. දැන් ඒකත් විවේචනය කරනවා.“

තමා ඇතුළු ලංකා කම්කරු කොංග්‍රසයේ පිරිසක් ඉන්දියාවට ගොස් තමිල්නාඩු මහ ඇමැති එම්.කේ ස්ටාලින් හමුවී කරුණු ගණනාවක් ගැන දීර්ඝ ලෙස සාකච්ජා කළ බවද ඔහු මෙහිදී පැවසීය.

“වතුකරයේ ශිෂ්‍ය ශිෂ්‍යාවන්ට තමිල්නාඩුවේ විශ්ව විද්‍යාල වල ශිෂ්‍ය 100 ක් ලබා දෙන්න කියා අපි ඉල්ලා සිටියා. ඉන්දීය ධීවරයන් ලංකා මුහුදු සීමාවට ඇවිත් මාළු අල්ලන එක ගැනත්, කච්චතිව් උත්සවය ගැනත්, අපි කතා කළා,“යැයි රාජ්‍ය ඇමැති තොණ්ඩමාන් සඳහන් කරයි.

තමිල්නාඩුවේ පසුගිය දා පැවති ඉන්දීය සම්භවයක් සහිත ජනයාගේ සමුළුවට ඇරයුම් නොකිරීම ගැන කනස්සල්ල පළ කර ඇති ලංකා කම්කරු කොංග්‍රස් නියෝජිත පිරිස පෙන්නා දී ඇත්තේ , ඉන්දීය සම්භවයක් සහිත පාර්ලිමේන්තු නියෝජිතයන් දහ දෙනෙක් මෙරට සිටින බවයි.