“දෙමළ ජනතා සටනට දකුණේ අරගලකරුවන් සහාය දිය යුතුයි”

0

දශක ගණනාවක් පුරා කෙරෙන දෙමළ ජනයාගේ නිදහස් සටන ගැන අවබෝධ කරගෙන දකුණේ අරගලකරුවන් ඊට සහයෝගය ලබා දිය යුතු බවට උතුරේ අතුරුදහන් කරන ලද්දවුන්ගේ මව්වරු ඉල්ලීමක් කර තිබේ.

“පහුගිය කාලේ දෙමළ ජනයා මර්දනය කළේ ඇයි කියලත්, ඇයි ඒගොල්ලෝ සටන් කළේ කියලත් දකුණේ අරගල කාරයෝ කල්පනා කරන්න ඕනෑ. ඒ ගැන තේරුම් අරගෙන අපිට ස්වයං නිර්ණය අයිතිය ලබා දෙන්න ආණ්ඩුවට බලපෑම් කරන්න ඕනෑ,“යැයි උතුරු නැගෙනහිර දී රජයේ හමුදා විසින් බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ ලේකම් ලීලාදේවි ආනන්දනඩරාජා ඉල්ලා සිටින්නීය.

යුද්ධයේ අවසානයෙන් 13 වසරක් ගතවීත් දෙමළ ජනතාවට යුක්තිය ඉටුවී නැති රටේ පවතින වාතාවරණය ගැන මාධ්‍ය වෙත අදහස් දක්වමින් ඇය පවසන්නේ කිනම් ආණ්ඩුවක් බලයට පත් වුවද රටේ කිසිදු දෙයක් වෙනස් නොවන බවයි.

“උතුරට එක නීතියකුත්, දකුණට තවත් නීතියකුත් රටේ ක්‍රියාත්මක වෙන්නේ. මේක අපිට හොඳින්ම පෙන්නුම් කළේ ආනන්ද සුදාකරන් හා සුනිල් රත්නායකගේ සිදුවීම් වලින්.“

ඥානපාලන් රවිවීරන්, සෙල්ලමුත්තු දේවකුලසිංහම්, විල්වරාජා ප්‍රදීපන්, සින්නයියා විල්වරාජා, නඩේසු ජෙයචන්ද්‍රන්, කදීරන් ඥානචන්ද්‍රන්, ඥානචන්ද්‍රන් ශාන්තන් සහ පස් හැවිරිදි විල්වරාජා හමුදා පාලනය යටතේ පැවති යාපනයේ මිරුසුවිල් හිදී 2000 දෙසැම්බර් 19 දා හමුදා කණ්ඩායමක් විසින් දෙමළ සිවිල් වැසියන් අටදනෙකු අල්ලා දෑස් බැඳි ඔවුන්ගේ උගුර කපා ම්ලේඡ්ච අන්දමින් ඝාතනයක් කර මළ සිරුරු මිරුසුවිල් හි වැසිකිළි වළක දමා තිබිණි.

හමුදා අත් අඩංගුවෙන් මිදී පලායාමට සමත්වූ එක් අයෙකුගේ ඇසින් දුටු සාක්ෂිය අනුව මෙම සිද්ධිය හෙලිදරව් කිරීමෙන් පසු හමුදා භටයන් 14 දෙනකු අත් අඩංගුවට ගත් අතර නීතිපති විසින් ඉන් 5 දෙනකුට අධිචෝදනා එල්ලකරනු ලැබූවද මරණීය දණ්ඩනය ලැබූ එකම හමුදා නිලධාරියා වුයේ ගජබා රෙජිමේන්තුවේ මාණ්ඩලික සැරයන් රත්නායක මුදියන්සේලාගේ සුනිල් රත්නායකයි.

ගජබා රෙජිමේන්තුවේ හමුදා නිලධාරියෙකුව සිටී ගෝඨාභය රාජපක්‍ෂ ජනාධිපතිධුරයට පත්වීමෙන් පසු මරණ දඩුවම් ලබා සිටී සුනිල් රත්නයකව ජනාධිපති සමාව යටතේ මුදා හැරිණි.

උතුරේ අරගලයට දායකත්වය ලබා දීම නිසා රජයේ හමුදා අත් අඩංගුවට පත්ව වසර ගණනවක් සිරගතව සිටින දේශපාලන සිරකරුවෙක්වූ ආනන්ද සුදාකරන් නිදහස් කළද තවමත් බන්ධනාගාරයෙන් මුදා හැර නොමැත.

දශක ගණනාවක් පුරා උතුරේ ජනයා පීඩාවට පත් කරමින් සිටින ආර්ථික අර්බුදය දැන් දකුණේ ජනයාට අත් විඳීමට සිදුවීමත් සමඟ ඒ ගැන අවබෝධයක් ඔවුන්ට ලැබෙනු ඇති බව අතුරුදහන් කළවුන්ගේ ඥාතීන්ගේ සංගමයේ ලේකම්වරිය පෙන්වා දෙන්නීය.

“උතුරු නැගෙනහිර දෙමළ අම්මාවරුන්ගේ නැතිවුණු දරුවෝ හොයා ගන්න ගෝඨාභය හා මහින්ද රාජපක්‍ෂට විරුද්ධව සටන් කරන දකුණේ අරගලකරුවන් උදව් කරන්න ඕනෑ. අපේ දරුවෝ ගැන යුක්තිය ඉටු කරගන්න තමයි අපි සටන් කරන්නේ කියලා දකුණේ ජනයා අවබෝධ කර ගන්න ඕනෑ.“

Facebook Comments