සමරිසිභාවය හෙවත් සමලිංගිකත්වය දණ්ඩනීය වරදක් ලෙස මෙතෙක් සැලකන ලද වගන්ති දණ්ඩ නීති සංග්‍රහයෙන් ඉවත් කිරීම සඳහා සංශෝධන පනත් කෙටුම්පතක් පෞද්ගලික මන්ත්‍රී යෝජනාවක් ලෙස පාර්ලිමේන්තුවට ඉදිරිපත් කිරීමට පොහොට්ටු මන්ත්‍රීවරයෙකු සුදානම් වෙමින් පවතී.
මංගල සමරවීරගේ වර්ෂපූර්ණ ගුණානුස්මරනය යෙදී ඇති අද (24) දිනයේ එම කෙටුම්පත පාර්ලිමේන්තු මන්ත්‍රී ප්‍රේම්නාත් සී දොළවත්ත විසින් කථානායකවරයා වෙත බාර දීමට නියමිතය.
සියලු ආකරයේ වෙනස්කොට සැලකීම් ඉවත් කිරීමටත් පුද්ගලයකුගෙ ලිංගික දිශානතිය ඔහුගෙ කැමැත්ත පරිදි පවත්වාගෙන යාමට ඇති අයිතිවාසිකම් ආරක්ෂා කිරීමටත් දීර්ඝ කාලයක් තිස්සෙ හඬ නැගූ මංගල සමරවීරගේ නාමයට උපහාරයක් පිණිස මෙම කෙටුම්පත පාර්ලිමේන්තුවට භාරදීමට කටයුතු කරන බව දොළවත්ත මන්ත්‍රීවරයා පවසන්නේ.
ශ්‍රී ලංකාවේ දණ්ඩ නීති සංග්‍රහයේ 365 වැනි වගන්තිය “ස්වභාවධර්මයට එකඟ නොවන ලෙස සිදු කෙරෙන ලිංගික සංසර්ගය” අපරාධයක් ලෙස සලකන අතර ඒ සඳහා වසර දහයක් දක්වා සිරදඬුවමක් නියම කළ හැකිය.
සමලිංගික, ද්වීලිංගික, සංක්‍රාන්ති ලිංගික සහ අන්තර් ලිංගික (LGBTI) පුද්ගලයින්ට වෙනස් කොට සැලකීම ව්‍යවස්ථා විරෝධී බවත්, ශ්‍රී ලංකා ආණ්ඩුක්‍රම ව්‍යවස්ථාවේ සමානාත්මතාවයේ විධිවිධාන යටතේ LGBTI පුද්ගලයින් ආරක්ෂා කර ඇති බවත් 2014 දී රජය එක්සත් ජාතීන්ගේ මානව හිමිකම් කවුන්සිලයේදී ප්‍රකාශ කර තිබුනි.
පාර්ලිමේන්තු මන්ත්‍රී ප්‍රේම්නාත් සී දොළවත්ත විසින් ඉදිරිපත් කරන ලද පනත් කෙටුම්පත සැකසීම සඳහා Institute of Politics ආයතනයත් එහි විධායක අධ්‍යක්ෂ සංජීව විමලගුණරත්න සහ නීතිවේදී අකලංක හෙට්ටිආරච්චි දායක වු බවයි මන්ත්‍රීවරයා පවසන්නේ.
Facebook Comments
