ජනතා බලයක් නොමැතිව ජනාධිපති ධුරයට පත්ව සිටින රනිල් වික්‍රමසිංහ හිට්ලර් පන්නයේ ආණ්ඩුවක් සකස් කිරීම වෙනුවෙන් ගමන් කරමින් ඉන්නා බවට චෝදනා කරන වාමාංශික නායකයෙක් ඔහුගේ ආණ්ඩුව පලවා හැරීම සදහා දැවැන්ත ඒකාබද්ධ බලයක් ගොඩනැගීමේ අවශ්‍යතාව අවධාරණය කර තිබේ.
“කම්කරු පංතිය ප්‍රමුඛ වමේ බලවේග, ගොවි සංවිධාන, ධිවර සංවිධාන, වතුකරයේ ජනතාව විතරක් නෙමෙයි උතුරේ දෙමළ ජනතාවත් ඒකාබද්ධ කරගත්ත දැවැත්න ජනතා බලයක් මේ රනිල් රාජපක්ෂ ආණ්ඩුව පලවාහැරීම වෙනුවෙන් අපි ගෙනියෑම අද අපේ දවසේ කාර්ය බවට පත්වෙලා තියනවා. ”
එක්සත් සමාජවාදී පක්ෂයේ නායක සිරිතුංග ජයසුරිය 23 වැනි අගහරුවාදා ඒ බව සදහන් කළේ අන්තර් විශ්වවිද්‍යාලයීය ශිෂ්‍ය බලමණ්ඩල විසින් සංවිධානය කළ ඒකාබද්ධ මාධ්‍ය හමුවකට එක්වෙමිනි.
ලබන වසරේ පෙබරවාරි, මාර්තු මාස වලදී පළාත් පාලන ඡන්දය පැවැත්වීමට ජනාධිපතිවරයා කටයුතු නොකරන බව පවසන සිරිතුංග ජයසුරිය පෙන්වා දෙන්නේ මිලිටරී පොලිසි රාජ්‍යක් නිර්මාණය කිරීමේ වැඩ පිළිවෙලක ඔහු නිරතව සිටින බවයි.
“පොහොට්ටුව හා රනිල් කුමන්ත්‍රණකාරීව මේ ඡන්ද කල් දාලා මිලිටරිය, පොලීසිය සමග ආණ්ඩු ගෙනයෑමේ එහෙම නැතිනම් මිලිටරී පොලිස් රාජ්‍යක් නිර්මාණය කිරීමේ වැඩපිළිවෙලටයි මේ රනිල් රාජපක්ෂ අද කටයුතු කරමින් යන්නේ. ”
ත්‍රස්තවාදය වැළැක්වීමේ පනත අහෝසි කරන බවට 2015 යහපාලන ආණ්ඩුවේ අගමැති ලෙස ජාත්‍යන්තරයට පොරොන්දු වු වත්මන් ජනපති රනිල් වික්‍රමසිංහ අද ත්‍රස්තවාදය වැළැක්වීමේ පනත ලැජ්ජාවක් නොමැතිව භාවිතයට ගන්නා බවත් එක්සත් සමාජවාදී පක්ෂයේ නායකයා එහිදී වැඩි දුරටත් සිහිපත් කළේය.
“එයා හදනවා ඇති එයා කල්පනා කරනවා ඇති මේ තුලින් මේ රටේ නැගී එන ජනතාවගේ වෛරය එයාට පාලනය කරන්න පුළුවන් කියලා. අපි කියනවා රනිල් උඹට වැරදුනා.මතක තියාගනින් රනිල් උඹට වැරදුනා. ”
ජනතාවගේ ජයග්‍රහනය වෙනුවෙන් සියළු දෙනා ඒකාබද්ධව වැඩ කටයුතු කිරීමේ අවශ්‍යතාව එක්සත් සමාජවාදී පක්ෂයේ නායක සිරිතුංග ජයසුරිය එහිදී තව දුරටත් අවධාරණය කළේය.
Facebook Comments
