ජනාධිතිපති රනිල් වික්‍රමසිංහ අගමැති වී සිටි සමයේ ඔහුගේ පෞද්ගලික නිවස ආසන්නයේ දී පොලීසිය විසින් මාධ්‍යවේදීන්ට එල්ල කරන ලද ප්‍රහාරය සම්බන්ධයෙන් විමර්ශනය කිරීම සදහා අපක්ෂපාතී මණ්ඩලයක් පත් කරන ලෙස ලොව විශාලතම ගුවන් විදුලි සංගමය ඉල්ලා තිබේ.
ශ්‍රී ලංකා පොලිසිය සහ ආරක්ෂක නිලධාරීන් විසින් එම්.ටී.වී. පුද්ගලික සමාගමේ මාධ්‍යවේදීන් වෙත එල්ල කරන ලද ද්වේශ සහගත ප්‍රහාරය හෙළ දකින ලෝක ගුවන් විදුලි සංගමය (WBU)ප්‍රහාරයෙන් මාස දෙකකට වැඩි කලක් ගතවීමෙන් පසු නිවේදනයක් නිකුත් කරමින් පවසන්නේ මාධ්‍යවේදීන්ට එල්ල කරන ප්‍රහාර සහ මාධ්‍ය සංවිධාන බිය ගැන්වීමට යත්න දැරීම් සම්බන්ධයෙන් ශ්‍රී ලංකා රජයේ ප්‍රතිචාර සමීපව නිරීක්ෂණය කරමින් සිටින බවයි.
“පොලිසිය සහ ආරක්ෂක නිලධාරීන් අතින් කිසිදූ මාධ්‍යවේදියකු හෝ ඔවුන්ව සේවයේ යොදවා ඇති සමාගම් වලට සම්බන්ධ වෙනත් කිසියම්ම පුද්ගලයකු බිය ගැන්වීම, හිරිහැර කිරීම හෝ පහර දීම සිදු නොවන තැනට වගබලා ගතයුතු බවටත් WBU ව රජයෙන් ඉල්ලා සිටී. ”
පොලිසිය සහ ආරක්ෂක නිලධාරීන් මාධ්‍යවේදීන්ට අයුක්ති සහගත ලෙස පහරදුන් බව ශ්‍රී ලංකා මානව හිමිකම් කොමිෂන් සභාව විධිමත් ලෙසින් පිළිගෙන ඇති බව සිය සිවේදනය මගින් සිහිපත් කරන ලෝක ගුවන් විදුලි සංගමය මෙම මාධ්‍යවේදීන් පොලිසියට තර්ජනයක් නොකෙරූ බවත්, ඒ අනුව මෙම ප්‍රහාරය නිදහස් මාධ්‍යය අයිතීන් බරපතල ලෙස උල්ලංඝනය කිරීමක් බවත් කොමිසම තහවුරු කර ඇති බව අවධාරණය කරයි.
ශ්‍රී ලංකා මානව හිමිකම් කොමිසමේ සභාපතිනි විශ්‍රාමික විනිසුරු රෝහිණී මාරසිංහ අගෝස්තු මස මුලදි නිවේදනයක් නිකුත් කරමින් අවධාරණය කර තිබුනේ එම පහරදීම සිදුවු දිනයේදි මාධ්‍යවේදින්ගෙන් පොලිසියට කිසිදු තර්ජනයක් නොතිබූ බවට කිසිදු සැකයක් නොමැති බවයි.
ජුලි 9 වැනිදා පලකළ අදාල ප්‍රවෘත්ති වාර්තාව සම්බන්ධයෙන් හා ඉන් ටික වේලාවකට පසුව අග්‍රාමාත්‍යවරයාගේ නිවසට ගිනි තැබීමේ සිද්ධිය සම්බන්ධයෙන් ප්‍රශ්න කිරීම සඳහා MTV නාලිකාවේ ජ්‍යෙෂ්ඨ කළමනාකාරීත්වයේ සාමාජිකයන් කිහිප දෙනෙකු පොලිසිය වෙත අත්තනෝමතික ලෙස කැඳවා ඇති බව ද ලෝක ගුවන් විදුලි සංගමය සිය නිවේදනයේ වැඩි දුරටත් සදහන් කර තිබේ.
රනිල් වික්‍රමසිංහගේ පෞද්ගලික නිවස ආසන්නයේ දී සියයකට අධික පොලිස් විශේෂ කාර්ය බලකායකට අණදෙමින් රාජකාරියේ යෙදී සිටි මාධ්‍යවේදීන් පිරිසකට පහර දීමට කෙලින්ම වගකිවයුත්තා ලෙස ජ්‍යෙෂ්ඨ පොලිස් අධිකාරි රොමේෂ් ලියනගේ බව ශ්‍රී ලංකා මානව හිමිකම් කොමිසම විසින් නම් කර තිබේ.
ජ්‍යෙෂ්ඨ පොලිස් අධිකාරි රොමේෂ් ලියනගේ ගේ අණ පරිදි ජුලි 9 වැනිදා මාධ්‍යවේදින්ට එල්ල කළ ප්‍රහාරයෙන් නිව්ස්ෆස්ට් මාධ්‍යවේදීන් ගණනාවකට තුවාල සිදුවිය.
සරසි පීරිස්, කාලිමුත්තු චන්ද්‍රන්, ඉමේෂ් සදර්ලන්ඩ්, චානුක වීරකෝන්, බනිඳු ලෝකුරුගේ, වරුණ සම්පත්, ජුඩින් සින්දුජන් සහ ජනිත මෙන්ඩිස් එම මාධ්‍යවේදීන් බව සිරස මාධ්‍ය ජාලය විසින් නම් කර තිබුණි.
Facebook Comments
