රනිල්ගේ අයවැයෙන් වතු කම්කරුවන් කබලෙන් ලිපට

අයවැයෙන් කිසිදු සහනයක් නොලද වතු කම්කරු පවුල් තවදුරටත් සාගින්නේ හෙලා ඇති බවට කඳුකර ජනයාගේ අයිතීන් වෙනුවෙන් පෙනී සිටින සංවිධානයක් පෙන්වා දී තිබේ.

“රටට අවශ්‍ය විදේශ විනිමය දශක ගණනාවක ඉඳන් ගේන්න මහන්සි වෙන වතු කම්කරුවො සහ එයාලගේ දරු මල්ලෝ තවමත් දවස ගෙවන්නේ බඩගින්නේ. 2023 අවුරුද්දට ගෙනාපු අයවැයෙන් මේ බඩගින්නේ ඉන්න මොවුන් ගැන කිසිම දෙයක් කරලා නැහැ,“යැයි කඳුකර ජනයා රැකගැනීමේ ව්‍යාපාරයේ උපදේශක මාරිමුත්තු සතිවේල් පියතුමා පවසයි.

මාධ්‍ය වෙත නිවේදනයක් නිකුත් කරන සතිවේල් පියතුමා අවධාරණය කරන්නේ එළඹෙන 2023 වසරට වතු කම්කරුවන් මෙරටට රැගෙන විත් වසර 200 ක් සම්පුර්ණ වුවද ඔවුන්ගේ ජිවිත යහපත් කිරීමට ආණ්ඩුව කිසිදු පියවරක් ගෙන නොමැති බවයි.

“දරිද්‍රතා දර්ශකයන්ට අනුව සියයට 51 ක ප්‍රමාණයක් හමුවන්නේ වතු කරයෙන්.“

නාගරිකයන් අතරින් සියයට 43 ක් ද, ගැමියන් අතරින් සියයට 33 ක් ද, දරිද්‍රතාවෙන් පෙළෙන බවට සංඛ්‍යා ලේඛන මගින් පෙන්නුම් කර තිබේ.

ඒ අනුව දරිද්‍රතාවයෙන් පෙළෙන සියයට 51 ක්වූ වැඩි ජන කොටසක් වාර්තා වනුයේ වතු කම්කරු ජිවිත ඇසුරින් බවට රටේ ආහාර අර්බුදය ගැන ගෘහ මට්ටමේ සමීක්ෂණවලදී සනාථ වූ බව නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා සඳහන් කර තිබුණි.

බ්‍රිතාන්‍ය යටත් විජිතවාදීන්ගෙන් 1948 දී නිදහස් ලබා වසර 100 ක් ලබන විට රටේ සශ්‍රීක බව ඉලක්ක කොට මුදල් ඇමැතිවරයා ලෙස ජනාධිපති රනිල් වික්‍රමසිංහ අයවැය යෝජනා ඉදිරිපත් කළද, දෙසිය වසක් පුරා මෙරට ආර්ථිකය ශක්තිමත් කළ වතු කම්කරුවන් ගැන කිසිම තැකීමක් නොකිරීම තුලින් පෙන්නුම් කරනුයේ ඔවුන් කෙරෙහි ආණ්ඩුවේ ප්‍රතිපත්තිය බවට සතිවේල් පියතුමා චෝදනා කරයි.

ඔහු පෙන්වා දෙන්නේ වතු කම්කරුවන්ගේ ජන්දයෙන් හා සාමාජික මුදලින් බලය ලබා ගත් කොටස් ද කම්කරුවන්ට යහපත් දිවියක් උරුම කර දී නොමැති බවයි.

“මිට පසුවත් කඳුකරයේ වතු කම්කරුවන් නොරවටා ඔවුන්ට සාධාරණයක් ඉටුකරන්න ජනාධිපතිවරයා ක්‍රියා කරන්න ඕනෑ.“

එක්සත් ජාතීන්ගේ ආහාර හා කෘෂිකර්ම සංවිධානයේ සහ ලෝක ආහාර සංවිධානයේ විශේෂ ඒකාබද්ධ වාර්තාව වූ ශ්‍රී ලංකාවේ ආහාර අර්බුදය ගැන තක්සේරුව, ලෝක ආහාර සංවිධානයේ අධීක්ෂණ වාර්තාව, ශ්‍රී ලංකා හා ජාත්‍යන්තර රතු කුරුස සංවිධානයේ ආර්ථික සමාලෝචනය සහ නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා මානව හිමිකම් කොමිෂන් සභාවට ඉදිරිපත් කළ වාර්තාව ඇතුළු ජාත්‍යන්තර සංවිධාන හතරක් මගින් වතු කම්කරුවන් මුහුණ දී තිබෙන දුෂ්කර තත්වය පෙන්නුම් කර තිබේ.