ජාතික ප්‍රශ්නයට විසදුම් සෙවීමේ ජනාධිපති සමග සාකච්ජා සාර්ථක නොවුනත්, එහි දිගටම රැඳී සිටින බවට දෙමළ ජාතික සන්ධානය ප්‍රකාශ කර තිබේ.
හාරමාසයක් ඇතුලත ජනාධිපති රනිල් වික්‍රමසිංහ දෙමළ ජාතික සන්ධානය ඇතුළු පක්ෂ කිහිපයක් සමග දෙවටයක්ම පැවැත්වූ සාකච්ඡා හමාර වුනේ කිසිදු සාර්ථක ප්‍රතිපලයක් අත් කර නොදෙමිනි.
“ජනාධිපතිවරයා සහ ආණ්ඩුව පැහැදිලි ස්ථාවරයක් පෙන්නුම් කරන්නේ නැතුව දිගින් දිගටම කාලය කා දමන්නේ නම් දෙමළ දේශපාලන නායකයන් ලෙස තීරණයක් ගන්නවා. ඒත් ආණ්ඩුව එක්ක පැවැත්වෙන සාකච්ජා කඩාකප්පල් කරන්නේ නැහැ. අඛණ්ඩව ඊට එක් වෙනවා ” යැයි දෙමළ ජාතික සන්ධාන නායක සන්ධානයේ නායක, හිටපු විපක්‍ෂ නායක ආර්. සම්බන්ධන් පවසයි.
දෙමළ ජාතික සන්ධාන නායකයා කියා සිටින්නේ ජනාධිපතිවරයා හිතට එකඟව තීරණයක් නොගෙන සාකච්ජා කිරීම කාලය වැය කිරීමක් පමණක් බවයි. ඔහු පැහැදිලි ස්ථාවරයක් ගත හොත් දැනට ඇරඹි ඇති සාකච්ජා ඉදිරියට ගෙන යා හැකි බවට ද දෙමළ ජාතික සන්ධානය විශ්වාසය පළ කර තිබේ.
“ජනාධිපති රනිල් පැහැදිලි විසදුමක්, ස්ථාවරයක් කියන්න ඕනේ කතා බහ ඉස්සරහට ගෙනියන්න. අවසන් වතාවට හමුවුණු වෙලාවෙත් අපි දෙමළ ජනතාව මුහුණ දෙන ප්‍රශ්න ඉදිරිපත් කළා. ඒත් ඒවාට කිසිම විසදුමක් දීලා නැහැ.”
දෙමළ ජාතික සන්ධාන නායකයා පෙන්වා දෙන්නේ ජනාධිපති රනිල් වික්‍රමසිංහ සමග මැයි 15 වැනිදා අවසන් වරට පැවති හමුවේදී උතුරු නැගෙනහිර පලාත්වල දෙමළ ජනයාට අයත් ඉඩම් බලහත්කාරයෙන් අත්පත් කර ගැනීම, රජයේ හමුදා විසින් පැහැරගෙන ගොස් හා ඔවුන්ට බාර වීමෙන් පසු අතුරුදහන් කළවුන්ට යුක්තිය ඉටුකිරීම, මරා දැමුවන් ගැන ස්වාධීන විමර්ශනයක් කොට අපරාධකරුවන්ට එරෙහිව නීතිමය පියවර ගැනීම, දෙමළ දේශපාලන සිරකරුවන් නිදහස් කිරීම සහ දෙමළ ජනයාට එරෙහිව පුරාවිද්‍යා දෙපාර්තමේන්තුව, වන සංරක්ෂණ දෙපාර්තමේන්තුව හා රජයේ හමුදා අඛණ්ඩව කරගෙන යන නොපනත්කම් නතර කිරීම ආදිය ගැන කරුණු කාරනා ඇතිව පෙන්වා දුන් බවයි.
“ජාතික ප්‍රශ්නයට සාධාරණ විසදුමක් ඉදිරිපත් නොකළොත් කිසිම විදියකට අපි එය පිළිගන්නේ නැහැ. අපිත් එක්ක කතා කරන්න නම් ජනාධිපතිවරයා ජාතික ප්‍රශ්නය ගැන සාධාරණ මෙන්ම හිතට එකඟ තීරණයක් ගන්න ඕනෑ.”
2023 පෙබරවාරි මස 4 වැනිදාට පළමු ජාතික ප්‍රශ්නය විසඳන බවට සහතික වෙමින් ජනාධිපතිවරයා දෙමළ ජාතික සන්ධානය සමග පැවත් වු සාකච්ඡා හතරක් මෙන්ම මේ වසරේ ජනවාරි 26 වැනිදා පැවැත්වු බහු පාක්ෂික සමුළුව ද නිමාව දුටුවේ කිසිදු ප්‍රගතියකින් තොරවය.
ජනාධිපති රනිල් වික්‍රමසිංහ සහ දෙමළ දේශපාලන නියෝජිතයන් අතර ඉකුත් වසරේ දෙසැම්බරයේ සිට මේ දක්වා සාකච්ජා වට 5 ක් පවත්වා තිබේ.
බලය විමධ්‍යගත කිරීම සම්බන්ධ දෙමළ දේශපාලන ඉල්ලීම වී ඇත්තේ ඒකාබද්ධ උතුරු නැගෙනහිරට පෙඩරල් පන්නයේ ස්වයං පාලනයකි.
Facebook Comments
