අරගල කරන කම්කරුවන් වත්තෙන් එලවා දැමීමට හාම්පුතුන් අර අඳි

සියවස් දෙකක කාලයක සිට රටේ ආර්ථිකය ශක්තිමත් කිරීමට කටයුතු කරන වතු කම්කරුවන්ට ගෙවිය යුතු අරමුදල් ගෙවීම පැහැර හරින වතු පාලකයන් සිය ඉල්ලීම් දිනා ගැනීම වෙනුවෙන් අරගල කරන කම්කරුවන් වතු නිවාස වලින් ද එලවා දැමීමට දරන වෑයමක් හෙළිවී තිබේ

රම්බොඩ, ආර්.පි කොට්ඨාසයේ වතු කම්කරුවන් චෝදනා කරන්නේ 2007 වසරේ සිට තමන්ට හිමි විය යුතු සේවක අර්ථසාධක අරමුදල සහ සේවක භාරකාර අරමුදල් නොගෙවන හාම්පුතුන් කම්කරු නිවාස වලින්ද ඉවත් වන ලෙස වතු කම්කරු පවුල් ගණනාවක ට බල කර ඇති බවයි.

ලයිම් පේලි හතක වතු කම්කරු පවුල් 150 ක් රම්බොඩ, ආර්.පි කොට්ඨාසයේ ජීවත් වන අතර එම පවුල්වල සාමාජිකයන් 48 දෙනෙක් එම වත්තේ කම්කරුවන් ලෙස සේවය කරති.

ඒ අතරින් පවුල් 39 ට නිවාස වලින් ඉවත් වන ලෙස වතු පාලනාධිකාරිය විසින් දන්වා ඇත්තේ 2023 මැයි මස 16 වැනිදා සිට දැනුම් දීමකින් තොරව කම්කරුවන් සේවයට වාර්තා කර නොමැති වීමෙන් අනතුරුවය.

සේවකයන් ආරක්ෂා කරමින් සේවක අර්ථසාධක අරමුදලට ගෙවීමට ඇති හිග මුදල් සහ වර්තමාන මාසික ගෙවීම් කටයුතු ක්‍රමානුකුලව සිදු කරගෙන යාමට කටයුතු කරන ලෙස කාරක සභාවේ සභාපති හෙක්ටර් අප්පුහාමි විසින් වැවිලි සමාගම් නියෝජිතයන්ට උපදෙස් දුන් බව ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව ඉකුත්දා නිවේදනය කර තිබුණි.

තමන්ට හිමිවිය යුතු සේවක අර්ථසාධක අරමුදල සහ සේවක භාරකාර අරමුදල් ගෙවන ලෙස ඉල්ලා රම්බොඩ, ආර්.පි කොට්ඨාසයේ වතු කම්කරුවන් 2007 වසරේ සිට මේ දක්වා අවස්ථා දහයකට වැඩි වාර ගනනකදී විරෝධතා දියත් කර තිබේ.

එවැනි ආසන්නතම විරෝධතාවක් ඔවුන් විසින් ආරම්භ කර ඇත්තේ පසුගිය මැයි 16 වැනි දිනයි.

එදින සිට අද දක්වා කම්කරුවන් සේවයට වාර්තා නොකර අඛන්ඩ වැඩ වර්ජනයක යෙදී සිටින මොහොතක වතු පාලනාධිකාරිය ජුලි 5 වැනිදා නිකුත් කළ ලිපිය මගින් කම්කරුවන්ට දැනුම් දී ඇත්තේ ලිපිය නිකුත් කළ දිනයේ සිට දින 7 ක් ඇතුලත සේවයට වාර්තා නොකරන්නේනම් සේවය හැර ගියා සේ සලකන බවයි.

අලුතින් බදවා ගන්නා කම්කරුවන්ට වාසස්ථාන ලබා දීමට අවශ්‍ය බැවින්, සේවය හැර ගිය කම්කරුවන් භාවිතයට ගන්නා ලැයිම් කාමරය දින 15 ක් ඇතුළත නැවත භාර දිය යුතු බවත්, එසේ සිදු නොකරන්නේ නම් ඒ සම්බන්ධයෙන් නීතිමය පියවර ගන්නා බවත් අදාළ ලිපියෙහි දක්වා තිබේ.

එම ලිපියේ පිටපත් ලංකා කම්කරු කොංග්‍රස් (CWC) ලේකම් ජීවන් තොණ්ඩමාන් හා දිස්ත්‍රික් කම්කරු කාර්යාලයේ සහකාර කම්කරු කොමසාරිස් වෙත යොමු කිරීමටත් වතු පාලනාධිකාරිය කටයුතු කර ඇත.

කම්කරුවන් පෙන්වා දෙන්නේ තමන් පරම්පරා ගතව එම ලයිම් කාමර තුළ ජීවත් වු බවයි. 1971 අංක 2 දරන වතු නිවාස (විශේෂ විවිවිධාන ) පනතට අනුව අධිකරණයේ අනුමැතියකින් තොරව වතු කම්කරුවකු වතු නිවාසයකින් ඉවත් කිරීමට වතු පාලනාධිකාරියට නොහැක.

තොරතුරුවල පරස්පරතා

වතු ක්ෂේත්‍රයේ වැවිලි සමාගම් කිහිපයක් EPF ගෙවීම පැහැර හැර ඇති අතර හිග මුදල් විශාල ප්‍රමාණයක් සේවක අර්ථසාධක අරමුදලට ගෙවීමට ඇති බව විදේශ රැකියා සහ ශ්‍රමය පිලිබඳ ආංශික අධීක්ෂණ කාරක සභාවේදී පසුගියදා අනාවරණය වී තිබුනි.

විදේශ රැකියා සහ ශ්‍රමය පිලිබඳ ආංශික අධීක්ෂණ කාරක සභාව, එහි සභාපති පාර්ලිමේන්තු මන්ත්‍රී හෙක්ටර් අප්පුහාමිගේ ප්‍රධානත්වයෙන් පසුගිය ජූනි 22 වැනිදා රැස් වූ අවස්ථාවේදී වැඩි දුරටත් හෙළි වී තිබුනේ වතු ක්ෂේත්‍රයේ සමාගම් විසින් ගෙවන ලද මුදල් රුපියල් මිලියන 700ක පමණ ප්‍රමාණයක් පිළිබඳ ලබාදී ඇති තොරතුරුවල පරස්පරතා හේතුවෙන් ගිණුම්ගත කිරීමට නොහැකි වී ඇති බවයි.