ලබන වසරේදී ලංකා ධීවර සංස්ථාව රුපියල් මිලියන 500ක ආදායම් ඉලක්කයක් සපුරා ගැනීමට සැළසුම් කර ඇතැයි ධීවර හා ජලජ සම්පත් සංවර්ධන අමාත්‍යවරයා පවසයි.
2017 වසරේදී ලංකා ධීවර සංස්ථාවේ නව අළෙවිසැල් 50ක් අලුතින් ඇරඹීමට ද සැළසුම් කර තිබෙන බවයි ධීවර හා ජලජ සම්පත් සංවර්ධන අමාත්‍ය මහින්ද අමරවීර පවසන්නේ.
මෙතෙක් පාඩු ලබන රාජ්‍ය ආයතනයක් වශයෙන් පැවති ලංකා ධීවර සංස්ථාව නව පාලන අධිකාරිය සහ කලමනාකරණය හේතුවෙන් මේ වන විට ලාභ ලබමින් තිබෙන බව ද අමාත්‍යවරයා වැඩි දුරටත් සදහන් කරයි.
අමාත්‍යවරයා ඒ බව සදහන් කර ඇත්තේ වරකාපොළ සහ කුලියාපිටිය නගර වල ලංකා ධීවර සංස්ථාවේ නව අළෙවි මධ්‍යස්ථාන 02ක් විවෘත කිරීමේ අවස්ථාවට එක්වෙමිනි.
විශේෂයෙන්ම ශ්‍රී ලංකාවේ මත්ස්‍ය පරිභෝජනය ඉහළ නැංවීම ධීවර සංස්ථාවේ අරමුණ බව එහිදී පවසා ඇති අමාත්‍ය මහින්ද අමරවීර අවධාරණය කර ඇත්තේ වාර්ෂික ඒක පුද්ගල මත්ස්‍ය පරිභෝජනය කිලෝ ග්‍රෑම් 24ක් විය යුතු වුවත්, පසුගිය වසරවල එය කිලෝ ග්‍රෑම් 12ත්, 15ත් වු බවයි.
නමුත් 2016 වසරේ දී ඒක පුද්ගල මත්ස්‍ය පරිභෝජනය වසරකට කිලෝ ග්‍රෑම් 16.7ක් දක්වා ඉහළ ගොස් ඇති බවත්, දෛනික ඒක පුද්ගල මත්ස්‍ය පරිභෝජනය ග්‍රෑම් 47.6 දක්වාත් ඉහළ ගොස් තිබෙන බවත් අමාත්‍යවරයා එහිදී වැඩි දුරටත් පවසා ඇත.
Facebook Comments
