ඒකාබද්ධ විපක්ෂයේ සහ ආණ්ඩු පක්ෂයේ මන්ත්‍රීවරුන් ඇතුළු පාර්ලිමේන්තු මන්ත්‍රීවරු 85 දෙනකු තමන්ට ලැබුණු තීරුබදු රහිත වාහන බලපත්‍රය අවභාවිතා කිරීම සම්බන්ධයෙන් වහාම විමර්ශනයක් සිදු කරන ලෙස අල්ලස් හෝ දූෂණ විමර්ශන කොමිසමට නියෝග කරන ලෙස ඉල්ලා නීතිඥවරයකු විසින් ශ්‍රේෂ්ඨාධිකරණයට රිට් පෙත්සමක් ඊයේ (19) ගොනු කර ඇත.
තමන්ට ලැබෙන තීරු බදු රහිත වාහන බලපත්‍ර වෙනත් අයට විකිණීම පාර්ලිමේන්තු මන්ත්‍රීවරුන් විසින් සිදු කර ඇති බව පෙත්සමෙහි දක්වා ඇති අතර එක් වාහනයකට රුපියල් මිලියන 33ක බදු පාඩුවක් සිදු කරමින් ආනයනය කරනු ලබන වාහන වෙනත් අයට විකිණීමෙන් රජයට රුපියල් බිලියන හතක පාඩුවක් සිදු කර ඇතැයි මෙම පෙත්සමෙහි සඳහන් වේ.
මේ සම්බන්ධයෙන් 2014 දෙසැම්බර් මස 11 වැනිදා අල්ලස් හෝ දූෂණ විමර්ශන කොමිසමට තමා පැමිණිලි කළ ද ඒ සම්බන්ධයෙන් විමර්ශනයක් එම කොමිසම මඟින් සිදු නොකළ බව පෙත්සම්කරු කියයි.
එසේ තිබියදී තමන්ට ලැබුණු තීරුබදු රහිත වාහන බලපත්‍රය අවභාවිත කිරීමට පාර්ලිමේන්තු මන්ත්‍රීවරු 85 දෙනකු කටයුතු කර ඇති අතර 27 දෙනකු සිය වාහන බලපත්‍ර වෙනත් අයට පෞද්ගලිකව විකිණූ බවට තොරතුරු අනාවරණය වී ඇතැයි පෙත්සම්කරු මෙම පෙත්සම මඟින් පෙන්වා දී ඇත.
ඉකුත් අගෝස්තු මස 26 වැනිදා අල්ලස් හෝ දූෂණ විමර්ශන කොමිසමට පැමිණිලි කළ බවත් එහෙත් මෙතෙක් ඒ සම්බන්ධයෙන් ද කිසිදු විමර්ශනයක් කිරීමට කටයුතු කර නැතැයි පෙත්සම්කරු චෝදනා කර සිටී.
එම නිසා පැමිණිලි සම්බන්ධයෙන් විමර්ශනයක් සිදු කරන ලෙස එම කොමිසමට නියෝග කරන මැන්ඩාමුස් රිට් ආඥාක් නිකුත් කරන්නැයි පෙත්සම්කරු ශ්‍රේෂ්ඨාධිකරණයට යොමු කලපෙත්සම හරහා ඉල්ලීමක් කර තිබේ.
නීතිඥ නාගානන්ද කොඩිතුවක්කු විසින් එම පෙත්සම ගොනු කර ඇති අතර අල්ලස් හෝ දූෂණ විමර්ශන කොමිසම, එහි සාමාජිකයන්, සුජීව සේනසිංහ, උදය ගම්මන්පිල ඇතුළු පාර්ලිමේන්තු මන්ත්‍රීවරු 83 දෙනකු සහ නීතිපතිවරයා ඇතුළු වගඋත්තරකරුවන් 93 දෙනකු පෙත්සම මඟින් වගඋත්තරකරුවන් කොට සිටිති.
Facebook Comments
