ආණ්ඩුව කළු ජූලියට සමාව ඉල්ලද්දී යුක්තිය වෙනුවෙන් උතුරේත් දකුණේත් සැමරුම්

යාපනයේ තිරුනෙල්වේලියෙන් ආරම්භ කර රට පුරා තුන්දහසකට අධික දෙමළ ජනසංඛ්‍යාවක් රාජ්‍ය අනුග්‍රහයෙන් ඝාතනය කළ කළු ජූලිය සම්බන්ධයෙන් වත්මන් රජය හතලිස් එක් අවුරුද්දකට පසු සමාව අයැද සිටිද්දී, එම ඝාතනයන් සම්බන්ධයෙන් යුක්තිය ඉල්ලා උතුරේත්, දකුණේත් සැමරුම් දියත් කර තිබේ.

83 කළු ජූලියේ පීඩිතයන්ට යුක්තිය ඉල්ලා යාපනය මුට්‍රවේලි ක්‍රිඩාංගනය ඉදිරිපිටදි දෙමළ ජාතික ජනතා පෙරමුණ විසින් අනුස්මරණයක් සංවිධානය කර තිබු අතර කොළඹ, බොරැල්ල කනත්ත ඉදිරිපිටදී සිදු කළ අනුස්මරණය සංවිධානය කර තිබුනේ “උතුර – දකුණ සහෝදරත්වය” විසිනි.

ජුලි 23 වැනිදා පාර්ලිමේන්තුව අමතමින් අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය, ජනාධිපති නීතිඥ ආචාර්ය විජයදාස රාජපක්ෂ දෙමළ ජනයාගෙන් සමාව ඉල්ලා තිබුනේ 41 වසරකට ඉහතදී රටේ අදුරුම කාල පරිච්ඡේදය සනිටුහන් කළ බව පවසමිනි.

” අපේ රට අඳුරු යුගයකට ඇදලා දැමීමට හේතු පාදක උන 1983 ජුලි 23 වැනිදා අද වගේ දිනයක අවුරුදු 41 ට පෙර, අපේ රටේ අඳුරුම කාල පරිච්ඡේදය සනිටුහන් කරා. ඒ කාලේ අපි දේශපාලනයේ හිටියේ නැතත්, අපේ වගකීමක් එතන නොතිබුනා උනත් අපි මේ රටේ පුරවැසියෝ විදිහට, නීතිය ගරු කරන අමාත්‍යවරයෙක් විදිහට ද්‍රවිඩ ජනතාවට අපි අද දිනයේ දී ඒ අවුරුදු 41 ට පෙර සිද්ධ උන දේ පිළිබදව අපි සමාව අයැද සිටිනවා.”

පළාත් බද වාර්තාකරුවන් පවසන්නේ වැලිකඩ සිරගෙදරදී සමූහ ඝාතනය කළ දෙමළ දේශපාලන සිරකරුවන් 53 දෙනකු ඇතුළුව 1983 කළු ජූලියේ මරා දමනු ලැබූ ජන සමූහය යාපනයේදී අනුස්මරණය කළ දෙමළ ජාතික ජනතා පෙරමුණ (TNPF) ශ්‍රී ලංකාවේ 1948 සිට දියත් කෙරුණු වර්ග සංහාරය විභාග කිරීමට ජාත්‍යන්තර අපරාධ අධිකරණයක් ඉල්ලා සිටි බවයි.

යාපනය මුට්‍රවේලි ක්‍රිඩාංගනය ඉදිරිපිට පැවැති එම අනුස්මරණයට එක්ව සිටි දෙමළ ජාතික ජනතා පෙරමුණේ කාන්තා අංශයේ සභාපති වාසුගි සුදාහරන් උතුරේ මාධ්‍යවේදීන්හට අවධාරණය කළේ දෙමළ ජනයාට එරෙහිව 41 ක් වසරකට ඉහත දී ආරම්භ වු ම්ලේච්ඡ ප්‍රචණ්ඩත්වය අද දක්වාම දෙමළ දේශය තුළ ක්‍රියාත්මක වන බවයි.

“කළු ජූලිය වසර 40 ට පසුවත් අපි අනුස්මරණය කරනවා. නමුත් ඒකට යුක්තිය අද වෙනකම් කිසිම තැනකින් අපිට ලැබිලා නැහැ. එදා ඝාතනය කළ අය, අතුරුදන් කරපු අය අද වෙනකල් හොයාගෙන නැහැ. ඒවා අදටත් මතකයන් ලෙස අප අතර පවතිනවා. එදා ආරම්භ වූ යුද්ධය, ම්ලේච්ඡත්වය, ප්‍රචණ්ඩත්වය, අරාජිකත්වය, පීඩනය අද වනතුරු දෙමළ දේශය තුළ අඩුවෙලා නැහැ. ජාතිවාදීන් අපිව මර්දනය කරන්න, විනාශ කරන්න, බෙල්ල හිර කරලා කට වහන්න වැඩ කරනවා. නමුත් දෙමළ ජනතාව වෙහෙසට පත් වෙලා නැහැ. මුල්ලිවයිකාල් වලින් ඉවරයි කියලා හිතුවා, සියලුම දෙමළ ජනතාව නැවතත් නැගිටිමින් අපේ දේශයේ විමුක්තිය වෙනුවෙන් හඬ නඟනවා.”

කොළඹ, බොරැල්ල කනත්ත ඉදිරිපිටදී සිදු කළ අනුස්මරණයට එක්වෙමින් මානව හිමිකම් ක්‍රියාධර මාරිමුත්තු සතිවේල් පියතුමා සදහන් කළේ දෙමළ ජනතාවගේ දෘෂ්ටියෙන් බැලූ කළ මේ රටේ ආණ්ඩුක්‍රම ව්‍යවස්ථාවද කළු එකක් බවයි.

“විශේෂයෙන් දෙමළ ජනතාවගේ පැත්තෙන් මේ රටට ලැබුනා වු නිදහස කළුයි. ඒ වගේම 1972 ආණ්ඩුක්‍රම ව්‍යවස්ථාව කළුයි. ඒ වගේම 1978 ආණ්ඩුක්‍රම ව්‍යවස්ථාව කළුයි.”

දෙමළ ජන සංහාරය ජේ ආර් ජයවර්ධන ආණ්ඩුව විසින් දියත් කරනු ලැබුවේ 1983 නොව ඔහු බලයට පත්වූ 1977 සිට බව අවධාරණය කළ මාරිමුත්තු සතිවේල් පියතුමා මේ රටේ ක්‍රියාත්මක ප්‍රධාන ධාරාවේ දේශපාලන පක්ෂ සියල්ල කළු ලෙසින් හෙලා දුටුවේය.

“සාමකාමීව ජීවත් වීමට දේශපාලනික අයිතීන් නොදී සිටීම නිසා අපිට හැමදාම කළුයි”

ශ්‍රී ලංකාවේ ජන සංහාරයට ඉදිරි ජනාධිපති අපේක්ෂකයන් ලෙස ඉදිරිපත්ව සිටින වත්මන් ජනපති රනිල් වික්‍රමසිංහ, විපක්ෂ නායක සජිත් ප්‍රේමදාස මෙන්ම ජාතික ජන බලවේගයේ නායක අනුර කුමාර දිසානායකද වග කිව යුතු බවට මාරිමුත්තු සතිවේල් පියතුමා බොරැල්ල කනත්ත ඉදිරිපිටදී වැඩි දුරටත් චෝදනා කළේය.

“මේ සියළුදෙනා එකතු වෙලා තමයි ජන සංහාරය කළේ, මේ රට මේ තත්වයට පත් කළේ. ”

මරා දමන ලද ජන සමූහය සිහිපත් කරමින් යාපනය විශ්ව විද්‍යාල ශිෂ්‍යයන් සංවිධානය කළ සමරුවක් බදාදා (24) සරසවි භූමියේදී පවත්වන ලද බව උතුරෙන් වාර්තාවේ.

1983 ජුලි 23

1983 වර්ෂයේ ජුලි 23 දිනෙන් පටන්ගෙන දින ගණනක් තිස්සේ ඇවිලුණු ශ්‍රී ලංකාවේ කළු ජූලිය නමින් කුප්‍රකට වර්ගවාදි සංහාරයෙන් දෙමළ වැසියන් දහස් ගණනක් ඝාතනය කෙරුණු අතර කෝටි ගණනක නිවාස ඇතුලු දේපල ගිනිබත් විය.

සංහාරය ඇරඹුණේ යාපනය සරසවිය පිහිටුවා ඇති තිරුනෙල්වෙලියෙනි, ශ්‍රී ලංකා යුද හමුදා භට පිරිස් විසිනි.

යාපනයේ පලාලි පාරේ පරමේශ්වරා හන්දිය හා තිරුනෙල්වේලි හන්දිය අතරදී පුපුරා ගිය බිම් බෝම්බයකට හසුවූ හමුදා වාහනයක සිටි සෙබළුන් 13 දෙනකු මියයාමෙන් අනතුරුව එදින රාත්‍රියේත් පසුදාත් ගම් වැදුණු භට පිරිස් පලාලි පාරේත්, සිවන් අම්මාන් ග්‍රාමයේත් 51 දෙනකු ඝාතනය කර නිවාස ගිනිබත් කරන ලදී.

මරා දමන ලද්දවුන් අතර හය හැවිරිදි දරුවකුද, එකොලොස් හැවිරිදි දැරියකද වන බව උතුරු නැගෙනහිර මානව හිමිකම් සඳහා වන කාර්යාංශය (NESOHR) සහ උතුරු නැගෙනහිර සංඛ්‍යාලේඛන මධ්‍යස්ථානය විසින් ලේඛනගත කොට තිබේ.

බිම් බෝම්බයෙන් මළ සෙබළුන්ගේ සිරුරු ගම් පළාත් වලට නොයවා 13 බොරැල්ල කනත්තට ගෙනවිත් රජය විසින් පවත්වන ලද සමූහ භුමදානයට සහභාගිවූ ආණ්ඩු පාක්ෂික මැරයන් විසින් කොළඹින් ආරම්භ කොට රටපුරා දියත් කරන ලද දෙමළ සමූහ ඝාතනය සම්බන්ධයෙන් වගකිවයුතු කිසිවකුත් ගෙවී ගිය හතලිස් එක් වසර තුලදීම නීතිය හමුවට පමුණුවා නැත.