පහලොස් වසරකට ඉහත දී රජයේ ආරක්ෂක අංශ විසින් ඝාතනය කළ විමුක්ති කොටි සංවිධානයේ නායකයාගේ උපන් දිනය සැමරූ උතුරේ හිටපු පාර්ලිමේන්තු මන්ත්රීවරයකුගෙන් පොලීසිය ප්රශ්න කර තිබේ.
බලයට පත්වීමට පෙර පාලක පක්ෂයේ දැඩි දෝෂ දර්ශනයට ලක්වූ ත්රස්තවාදය වැළක්වීමේ පනත යොදාගෙන අනුර කුමාර දිසානායක ආණ්ඩුව යටතේ නොවැම්බර් 30 දා අත්අඩංගුවට ගත් උතුරේ දෙදරු පියාද රක්ෂිත බන්ධනාගාර ගත කර ඇත.
පළාත් බද වාර්තාකරුවන් පවසන්නේ ප්රකාශයක් ලබා ගැනීම සදහා වැල්වැටිතුරෙයි පොලීසියට පැමිණෙන ලෙස දෙමළ ජාතික පක්ෂයේ ලේකම් මෙන්ම හිටපු පාර්ලිමේන්තු මන්ත්රී එම්. කේ. සිවාජිලිංගම්ට පොලිසිය දැනුම් දුන් අවස්ථාවේ තමන් අයහපත් සෞඛ්ය තත්වයෙන් පසුවන බව දැනුම් දීම නිසා ඔහුගේ නිවසට ගිය පොලිස් නිලධාරීන් පැයක පමණ කාලයක් ප්රශ්න කර ඇති බවයි.
පොලීසිය තමාගෙන් සිදු කළ ප්රශ්න කිරීම සම්බන්ධයෙන් මාධ්ය දැනුවත් කරමින් දෙමළ ජාතික පක්ෂයේ ලේකම්, හිටපු පාර්ලිමේන්තු මන්ත්රී එම්. කේ. සිවාජිලිංගම් සදහන් කරන්නේ වේලුපිල්ලේ ප්රභාකරන් දෙමළ ඊළාම් නායකයෙකු ලෙස සැලකීම නිසා ඔහුගේ උපන් දිනය සැමරීමට කටයුතු කළ බව තමන් පොලීසියට දැනුම් දුන් බවයි.
“ඔවුන් මගෙන් ඇහුවා මම උපන්දිනය සැමරුවේ මගේ නෑදෑයෙක් නිසාද කියලා. ඥාතියෙකුට වඩා ඔහු දෙමළ ඊළාම් නායකයෙකු ලෙස සැලකීම නිසා ඒ උපන් දිනය උත්සවාකාරයෙන් සැමරුවා කියලා මම කිව්වා. ඇයි එහෙම කියන්නේ කියලා ඔවුන් ඇහුවා. දෙමළ ඊලාම් නායකයා නිසා තමයි ප්රභාකරන් එක්ක එවකට ශ්රී ලංකා අගමැති රනිල් වික්රමසිංහ ඔහු සමග සාම ගිවිසුමකට එළඹුනේ කියලා මම කිව්වා. ”
2024 වසරේ නොවැම්බර් 26 වැනිදාට යෙදී තිබු කොටි සංවිධානයේ නායක වේලුපිල්ලේ ප්රභාකරන්ගේ 70 වැනි උපන්දිනය එම්. කේ. සිවාජිලිංගම්ගේ ප්රධානත්වයන් සැමරු අවස්ථාවේ එම ස්ථානයට පැමිණි පොලිස් නිලධාරීන් ඔහුට දැනුම් දී තිබුනේ එල්.ටී.ටී.ඊ නායකයාගේ ඡායාරූපය ඉවත් කරමින් එම සැමරුම සිදු කරන ලෙසයි. ඒ සම්බන්ධයෙන්ද තමාගෙන් ප්රශ්න කළ පොලිස් නිලධාරීන්ට සිවාජිලිංගම් දැනුම් දී තිබේ.
“උපන් දිනය වෙනුවෙන් දාලා තිබුන බැනර් එකේ ප්රභාකරන්ගේ ඡායාරූපය ඉවත් කරන්න කියලා පොලීසියෙන් ඉල්ලුවා. ඒක අයින් කරාට පස්සේ තමයි උපන්දින සැමරුම සිදු කළේ කියලා මම කිව්වා. ”
ඔහු වැඩි දුරටත් මාධ්යවෙත පවසා ඇත්තේ ආණ්ඩුවේ ක්රියාව කුමක් වූවත් එයට මුහුණ දෙන බවයි.
“මහවිරු දිනය සිහිපත් කරන්න පුළුවන් කියපු අය ඡායාරූපයක් බලලා බය වෙනවා නම් මේ කොහේද යන්නේ. රෝහන වීජේවීරගේ ඡායාරූපය දැකලා මිනිස්සු බය වෙනවා කියලා කිව්වොත් ඒක ඔබ විශ්වාස කරනවාද ? එයාලට එක විදිහක්, අපිට තව විදිහක්ද? පාලනය වෙනස් වුණාට දර්ශනය වෙනස් වෙලා නැහැ.”
හිටපු පාර්ලිමේන්තු මන්ත්රී එම්. කේ. සිවාජිලිංගම් සමග විමුක්ති කොටි සංවිධානයේ නායකයාගේ උපන් දිනය සැමරීමට එක්ව සිටි තරුණයන් 10 දෙනකුද නොවැම්බර් 29 සහ 30 යන දෙදින තුළ වැල්වැටිතුරෙයි පොලීසියට කැදවා ඇති අතර ඔවුන්ගෙන් තිදෙනකුගෙන් පොලීසිය ප්රකාශ සටහන් කරගෙන ඇති බවයි පළාත් බද වාර්තාකරුවන් පවසන්නේ.
දෙමළ ඊලාම් විමුක්ති කොටි සංවිධානයේ නායකයාගේ ඡායාරූපයක් මුහුනු පොතේ පළ කිරීම නිසා නොවැම්බර් 30 වැනිදාට එළිවන විට ත්රස්ත මර්දන හා විමර්ශන කොට්ඨාශය (CTID) විසින් අත්අඩංගුවට ගත් යාපනයේ ඉනුවිල් බටහිර, චුන්නාක්කම් හි පදිංචි මනෝහරන් ගජන්දරූබන් ද දෙසැම්බර් 1 වැනිදා මහේස්ත්රාත් වරයාට ඉදිරිපත් කිරීමෙන් පසු දෙසැම්බර් 4 වැනිදා දක්වා රක්ෂිත බන්ධනාගාර ගත කර තිබේ.
දකුණෙත් අත්අඩංගුවට ගැනීම්
එල්.ටී.ටී.ඊ මහවිරු දින උත්සව සැමරුම් සම්බන්ධයෙන් අසත්ය ප්රචාර සිදු කරමින් මහජනයා නොසන්සුන් කිරීමේ චෝදනා යටතේ දෙසැම්බර් 1 වැනිදා කොළඹ කොටුව පරිගණක අපරාධ අංශය විසින් සැකපිට අත්අඩංගුවට ගත් දේශපාලන හා සමාජ මාධ්ය ක්රියාකාරිකයකු වන වන කැලුම් ජයසුමන ද කොළඹ අලුත්කඩේ මහේස්ත්රාත් අධිකරණය වෙත ඉදිරිපත් කිරීමෙන් පසු දෙසැම්බර් 4 වැනිදා දක්වා රිමාන්ඩ් භාරයට පත්කිරීමට නියෝග කර තිබේ.
එම චෝදනාවටම අත් අඩංගුවට ගන්නා ලද මරදානේ පදිංචි 45 හැවිරිදි කැලුම් හර්ෂන නැමැත්තා කොළඹ මහේස්ත්රාත් අධිකරණයට දෙසැම්බර් 2 වැනිදා ඉදිරිපත් කිරීමෙන් පසුව සැකකරු ඇප මත මුදා හැරීමට කොළඹ මහේස්ත්රාත් තිලිණ ගමගේ නියෝග කර තිබේ.
පොලිස් මාධ්ය කොට්ඨාසය නොවැම්බර් 30 වැනිදා නිවේදනය කර තිබුනේ ‘එල්.ටී.ටී.ඊ මහවිරු දින උත්සව සැමරුම් ප්රචාර සිදු කරමින් මහජනයා නොසන්සුන් කිරීම’ සම්බන්ධයෙන් තුන්දෙනකු අත්අඩංගුවට ගන්නා ලද බවයි.
සමාජ මාධ්ය ඔස්සේ පැරණි මහවිරු සැමරුම්වලට අදාළ දර්ශන නූතන සිදුවීම් සේ ප්රචාරය කළ බවට ඔවුන්ට චෝදනා එල්ල වී තිබේ.
ඒ අතරින් බද්දේගම දී අත්අඩංගුවට ගන්නා ලද සැකකරු නොවැම්බර් 30 වැනිදා බද්දේගම මහෙස්ත්රාත් අධිකරණයට ඉදිරිපත් කිරීමෙන් දෙසැම්බර් 3 දක්වා රක්ෂිත බන්ධනාගාරගත කළ බව ජනමාධ්ය වාර්තා කර ඇත.
Facebook Comments
