පරිසර අමාත්‍යවරයා ලෙස තම සැලැස්ම දැනට සියයට 27ක් 28ක් අතර පවතින මෙරට වන ඝණත්වය ඉදිරි වසර 04 තුළ සියයට 32 දක්වා වර්ධනය කර ගැනීම බව ජනාධිපති මෛත්‍රීපාල සිරිසේන පවසයි.
ලෝකයේ අනෙකුත් රටවල් සේම අපේ රටේ ද සිදුව ඇති පරිසර හානිය හේතුවෙන් මතුව ඇති දේශගුණික සහ කාලගුණික තත්ත්වයන් සමග මිනිසා ප‍්‍රමුඛ සියලු සතුන්ට ජීවත්වීම පිළිබඳ අභියෝගයකට මුහුණදීමට සිදුව ඇති බවයි ජනාධිපතිවරයා පෙන්වා දෙන්නේ.
කොළඹ ආනන්ද විද්‍යාලයේ හරිත පාසල් වැඩසටහන යටතේ ඉදි වූ ජීවවායු, කාබනික පොහොර, හරිත වගා හා සූර්ය බලශක්ති ව්‍යාපෘතිය ඊයේ (27) විවෘත කරමින් ජනාධිපති මෛත්‍රීපාල සිරිසේන මේ බව ප‍්‍රකාශ කළේය.
පාසල තුළ ලබන විෂය කරුණුවලට අදාළ අධ්‍යාපනය සේම ඉන් බාහිරව ලබන දැනුම සහ අවබෝධය තම දෛනික ජීවිතයට සම්බන්ධ කර ගැනීමේ වැදගත්කම මෙහිදී දරුවන්ට පහදා දුන් ජනාධිපතිවරයා අවධාරණය කර සිටියේ ශක්තිමත් ජාතියක් ලෙස නැඟීසිටීමට නම් ආත්මාභිමානයෙන්, අධිෂ්ඨානයෙන් සහ ස්වශක්තියෙන් කටයුතු කිරීමට දරුවන් කුඩා කාලයේ සිට පුරුදු පුහුණු විය යුතු බවයි.
බලශක්තියේ වැදගත්කම අද සියලුදෙනා මැනවින් හඳුනාගෙන තිබෙන අතර පොලොන්නරුව සිය නිවස මෙන්ම කොළඹ ජනාධිපති නිල නිවස ද අද සූර්ය බලශක්තියට පරිවර්තනය කර ජාතික විදුලි බල පද්ධතියට ද විදුලිය ලබාදෙන බව පැවසූ ජනාධිපති සිරිසේන මෙම ව්‍යාපෘතිය සඳහා දායක විය හැකි සියලු දරුවන් සිය නිවෙස් ඒ සඳහා සූදානම් කිරීමේ වැදගත්කම පෙන්වා දුන්නේය.
රටේ ආර්ථික නිදහස ළඟා කර ගැනීම දේශපාලනඥයින්ට, රාජ්‍ය නිලධාරින්ට පමණක් පැවරෙන වගකීමක් නොව පාසල් දරුවාගේ සිට සෑම පුරවැසියෙකුටම ඒ සඳහා දායකවිය හැකි බවද ජනාධිපතිතුමා වැඩිදුරටත් ප‍්‍රකාශ කළේය.
අමාත්‍ය රංජිත් සියඹලාපිටිය, මාලදිවයින්, ජර්මානු තානාපති ඉයෝන් රෝඞ් යන ඇතුළු ආරාධිත පිරිසක් ද, ආනන්ද විද්‍යාලයේ විදුහල්පති එස්.එම්. කීර්තිරත්න ආචාර්ය මණ්ඩලය සහ දෙමාපියන් පිරිසක් මෙම අවස්ථාවට එක්ව සිටි අතර හරිත උදාන වැඩසටහන සඳහා දායකවුවන්ට සම්මාන පිරිනැමීම ද මෙහිදී ජනාධිපතිතුමා අතින් සිදු විය.
Facebook Comments
