මාළඹේ සයිටම් පෞද්ගලික වෛද්‍ය විද්‍යාලය හේතුවෙන් විශ්ව විද්‍යාල වෛද්‍ය පීඨවල සිසුන්ට කිසිඳු ආකාරයක අසාධාරණයක් වීමට ඉඩ නොතබන බව ජනාධිපතිවරයා සහතික කරයි.
මෙම ගැටලුවේදී ජනාධිපතිවරයා ලෙස තමා කිසිදු පාර්ශවයකට ඒක පාර්ශවික නොවී අපක්ෂපාතීව සහ මධ්‍යස්ථව කටයුතු කරමින් සෑම සිසුවෙකුටම සාධාරණය ඉෂ්ට කරන බව ප්රකාශ කළ ජනාධිපතිවරයා ඉදිරි දිනවලදී අදාළ සියලු පාර්ශවයන් සමග සාකච්ඡා කර මෙම ගැටලුව විසඳීමට පියවර ගන්නා බව ප්රකාශ කළේය.
මාලඹේ සයිටම් පෞද්ගලික විශ්ව විද්‍යාලය පිළිබඳව ඇතිවී ඇති අර්බුදය සඳහා සියලු පාර්ශවයන්ට පිළිගත හැකි විසඳුමක් ලබා දීමට කටයුතු කරන බව ජනාධිපති මෛත්‍රීපාල සිරිසේන ප්රකාශ කර සිටියේ ලයිම් කාමර වෙනුවට වතුකරයේ ජනතාවට නිවසක් ලබාදීමේ වැඩපිළිවෙළ යටතේ නුවරඑළිය ආගරපතන හුට්විල් වතුයායේ ඉදිකළ ප්‍රථම ගම්මානය ජනතා අයිතියට පවරාදීමේ උත්සවයට එක්වෙමිනි.
සියලු විශ්ව විද්‍යාලවලට අවශ්‍ය පහසුකම් නොඅඩුව ලබාදෙමින් නිදහස් අධ්‍යාපනය ශක්තිමත් කර එහි ගුණාත්මකභාවය සහ ප‍්‍රමිතිය ඉහළ නැංවීමට කටයුතු කරන අතරම විශ්වවිද්‍යාලවලට ඇතුළත්වීමට නොහැකිවන එහෙත් සුදුසුකම් සහිත සිසුන්ගේ ගැටලූව ද විසඳීම සඳහා උසස් ප‍්‍රමිතියකින් සහ ගුණාත්මකභාවයකින් යුත් අධ්‍යාපන ආයතන බිහිවීමේ අවශ්‍යතාවය ද ජනාධිපතිවරයා පෙන්වා දුන්නේය.
රටේ අනාගතය භාරගැනීමට සිටින දරුවන් එකිනෙකාට අවශ්‍ය ලෙස හැසිරවීමට ඉඩදිය නොහැකි බව අවධාරණය කළ ජනාධිපතිතුමා සාධාරණ සමාජයක තරගකාරී ලෝකය ජය ගැනීමට අවශ්‍ය මංපෙත් ඔවුන්ට විවර කරදීමේ රජයේ වගකීම නොපිරිහෙළා ඉටුකරන බව වැඩිදුරටත් කියා සිටියේය.
Facebook Comments
