ගීතයෙන් ජනතාව අවදි කල ෆෙලා කුටි

මගේ ජනතාවනි , අපි ඕනෑවට වඩා බයයි .

අපි අපේ නිදහස වෙනුවෙන් සටන් කරන්න බයයි.

අපි සාධාරණය වෙනුවෙන් සටන් කරන්න බයයි .
අපි අපේ ස්වෛරී බව වෙනුවෙන් සටන් කරන්න බයයි .
අපි මොකක් හෝ හේතුවක් හොයාගෙන බිය වෙනවා …
මේ කියවෙන්නේ අප්‍රිකානු ජනතාව අවදි කල ෆෙලා කුටි ගේ ගීතයකින් කොටසකි.

ෆේලා කුටි යනු නයිජීරියාව ලොවට දායාද කල තවත් වික්ටර් හාරා කෙනෙකි. අප්‍රිකානු මහාද්වීපය පුරා ජනප්‍රිය වූ ඇෆ්රෝබීට් ශෛලිය තුලින් නිද්‍රාශීලී සමාජය අවදිකළ ඔහු , ප්‍රබල මානව හිමිකම් ක්‍රියාකරුවෙක් ලෙසද සමාජය උදෙසා සිය දිවිය කැප කළේය. Amnesty International නමැති මානව හිමිකම් සංවිධානයේ නියෝජිතයෙක් ලෙස නයිජීරියානු පාලකයන්ගේ පීඩාකාරී පාලනයට එරෙහිව සටන් වැදුනි.

1984 දී මොහොමඩ් බුහාරි ගේ දුෂණයෙන් පිරි රජයට එරෙහිව රට පුරා සංගීත ප්‍රසංග ගනනාවක් පවත්වමින් ජනතාවට සත්‍ය හඬ ගා කිවේ ඔහුගේ මෝහනීය කට හඬිනි. පාලකයන්ගේ නිරුවත හෙළි කිරීමේ වරදට අභූත චෝදනා නගා ඔහු සිර අඩස්සියට ලක් කළේය.

ෆේලා ගේ හඬින් ගැයුණු ගී අතිශය විරෝධාකල්පිතය. ලෝකයේ විවිධ සංගීත ශෛලීන් ගේ ආභාෂය ලබමින් නයිජීරියානු ජනමනස අවදි කල නිර්මාණ රැසක්ම ඔහු එරට ජනතාවට දායාද කළේය. නයිජීරියානු හමුදා ආඥාදායක Sani Abacha ගේ අතිශය කුරිරු පාලනය ඉදිරියේ බොහෝ මිනිසුන් නිරුත්තර වෙද්දී , ෆේලා නිහඬ කල නොහැකි අයෝමය මිනිසෙකු විය. එකී පාලනයට එරෙහිව තම ගිටාරයේ තත් පිරිමදිමින් ගැයූ ගී තුලින් පාලකයන්ගේ කන් අඩි පුපුරා ගියේය. ෆේලා ගේ ගීත බොහොමයක්ම ඔහු විසින් රචිත ඒවා විය. එමගින් ප්‍රබල පණිවිඩයක් ජනතාව අතරට රැගෙන යාමට ඔහු සමත් විය. ජාතිකවාදය ඔහුගේ දැඩි විවේචනයට ලක් කරමින් ඔහු බොහෝ ගීත රචනා කළේය. මිනිසුන් පෙළ ගැසිය යුත්තේ ජාතිය වටා නොව මිනිසත්කම වටා යයි ඔහු ගැයිය.

එමෙන්ම නිදහස් නයිජීරියාවේ බටහිර ගැති ප්‍රභූ පැලැන්තිය සේම ජාතිය හා ආගම විකුණා බලයට පැමිණ රටේ සම්පත් විකුණා කන ස්වදේශීය දේශපාලකයන්ද ( අපේ රටේ මෙන් ) දරුණු ලෙස විවේචනයට හා නිර්ධය ප්‍රහාරයන්ට ලක් කෙරුණි.

වරක් විදේශීය මාධ්‍යවේදියෙක් ෆේලා ගෙන් මෙසේ ඇසිය …

” මට ඔබගේ රටේ ඇමෙතිවරයෙක් කිවා අඩුගානේ නයිජීරියානුවන් 5000 ක් ඔබව අනුකරණය කලොත් ඒක එයාලගේ පාලනයට ලොකු අවුලක් ” කියලා
එයට ෆේලා පිළිතුරු දුන්නේ මෙසේය ..

” නෑ ..! එතකොට වෙන්නේ විප්ලවයක් ”

1938 ඔක්තෝබර් 15 වන දින උපත ලබා ඔහු මියයන්නේ 1997 අගෝස්තු 02 දිනය. වාද්‍ය භාණ්ඩ ගනනාවක් වාදනය කිරීමට සමත් , ප්‍රබල අරුතින් පිරි ගී තනු නිර්මාණය කල, මානව හිමිකම් වෙනුවෙන් අප්‍රිකානු ජනතාව වෙනුවෙන් පෙනී සිටි , යුක්තිය වෙනුවෙන් පෙනී සිටි දේශපාලන ධාරාවක් නිර්මාණය කල ජනතාවාදී ගායකයාගේ අවමගුල් උත්සවයට අප්‍රිකාවේ විවිධ රටවලින් හා නයිජීරියානු ජනතාව මිලියනය ඉක්මවා එක්රැස් වූ බව වාර්තා වේ.

(චුලක)
srilankamirror.com