ජනාධිපති මෛත්‍රීපාල සිරිසේන බලයට පත්වීමෙන් පසු ව්‍යවස්ථා සංශෝධනයක් මගින් විධායක ජනාධිපති ධූරයේ අසීමිත බලතල අඩුකර එම බලතල පාර්ලිමේන්තුවට පැවරූ ආකාරය ලොව පුරා පාර්ලිමේන්තු ප‍්‍රජාතන්ත‍්‍රවාදයට මහඟු ආදර්ශයක් බව අන්තර් පාර්ලිමේන්තු සංගමයේ සභාපතිවරයා පවසා තිබේ.
අන්තර් පාර්ලිමේන්තු සංගමයේ සභාපති සබීර් චවුද්‍රි ඊයේ (25) පස්වරුවේ ජනාධිපති කාර්යාලයේ දී ජනාධිපති මෛත්‍රීපාල සිරිසේන මැතිතුමා හමු වූ අවස්ථාවේදී මේ බව ප‍්‍රකාශ කළ බවයි ජනාධිපති මාධ්‍ය ඒකකය පවසන්නේ.
ජනාධිපතිවරයාගේ මෙම වැඩපිළිවෙළ තුළින් ශ්‍රී ලංකාවේ පාර්ලිමේන්තු ප‍්‍රජාතන්ත‍්‍රවාදය ශක්තිමත්වී ඇතැයි ද සභාපතිවරයා මෙම සාකච්ඡාවේදී පෙන්වා දී ඇත.
ලොව ඇතැම් රටවල විධායක ජනාධිපතිවරු පාර්ලිමේන්තුව හෑල්ලුවට ලක්කරන අතර තවත් ඇතැමුන් සිය බලතල සහ ධූර කාලය ජනමත විචාරණ මගින් දීර්ඝ කර ගන්නා බව පෙන්වා දී ඇති සභාපතිවරයා අද ශ්‍රී ලංකාව, පාර්ලිමේන්තු ප‍්‍රජාතන්ත‍්‍රවාදීන්ට නිසි මග පෙන්වන ආලෝකයක් ලෙස පෙන්වාදිය හැකි බවද පවසා තිබේ.
කාන්තා සහභාගිත්වය වැඩි කිරීමට නීති
පාර්ලිමේන්තුව තුළ තරුණ සහ කාන්තා සහභාගිත්වය වැඩිදියුණු කිරීමට අන්තර් පාර්ලිමේන්තු සංගමය ගන්නා ප‍්‍රයත්නය පිළිබඳ තම සතුට පළ කරන බව ජනාධිපතිවරයා මෙහිදි කියා සිට ඇති අතර ශ්‍රී ලංකාවේ පාර්ලිමේන්තුව තුළ කාන්තා සහභාගිත්වය වැඩි කිරීම සඳහා මැතිවරණ නීති සම්පාදනය කරමින් පවතින බවද කියා සිටියේය.
උගත් තරුණයින් වැඩි වැඩියෙන් රජයේ සහ පාර්ලිමේන්තුවේ වගකීම් දැරිය යුතු බව තමා විශ්වාස කරන බව ජනාධිපති මෛත්‍රීපාල සිරිසේන මෙම හමුවේදී ප‍්‍රකාශ කළ බවයි ජනාධිපති මාධ්‍ය ඒකකය පවසන්නේ.
ලොව ජනගහණයෙන් සියයට 50 ක් පමණ වයස අවුරුදු 30 ට වඩා අඩු නමුත් පාර්ලිමේන්තු මන්ත්‍රීවරුන්ගෙන් වයස අවුරුදු 30 ට අඩු සංඛ්‍යාව සියයට 1.9 ක් පමණක්ය යැයි පෙන්වා දුන් අන්තර් පාර්ලිමේන්තු සංගමයේ සභාපතිවරයා මෙම තත්ත්වය නංවාලීමට කටයුතු කිරීමේ අවශ්‍යතාවයද අවධාරණය කර තිබේ.
Facebook Comments
