මාධ්‍යවේදී කීත් නොයාර් පැහැරගෙන ගොස් වධහිංසා සිදුකිරීමේ සිද්ධියට සැකපිට අත්අඩංගුවට ගෙන රක්ෂිත බන්ධනාගාර ගත කර සිටි යුද හමුදා බුද්ධි අංශයේ මේජර්වරයෙකු ඇතුළු හමුදා සාමාජිකයින් හයදෙනා ඇප මත නිදහස් කර තිබේ.
ගල්කිස්ස අතිරේක මහේස්ත්‍රාත් ලෝචනා අබේවික්‍රම වීරසිංහ විසින් සැකකරුවෙකු ලක්ෂ 10 බැගින්වන ශරීර ඇප මත මුදාහැරීමට තීරණය කර ඇති අතර සැකකරුවන්ට සෑම මසකම අවසන් ඉරිදා දින අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසද නියෝග කර ඇත.
කීත් නොයාර් අද දිනයේ අධිකරණයට නොපැමිණීම හේතුවෙන් පැවැත්වීමට නියමිතව තිබූ හඳුනාගැනීමේ පෙරෙට්ටුව අහෝසි කරන කරන ලද අතර 1වෙනි සැකකරු සමාජ ජාල වෙබ් අඩවිවල පවා පෙනී සිටින බැවින් හා ඡායාරූප ප්‍රසිද්ධව පවත්නා බැවින් මුහුණ නිරාවරණය කර තිබියදීම අධිකරණය හමුවට ඉදිරිපත් කර තිබේ.
සෙසු සැකකරුවන් මුහුණු ආවරණය කොට අධිකරණයට ඉදිරිපත් කෙරුණු අතර මෙම සැකකරුවන්ට ඇප ලබාදුන්නද, මොවුන් මාධ්‍යවේදී උපාලි තෙන්නකෝන් පහරදීමේ සිදුවීමට අදාළවද චෝදනා ලැබූවන් බැවින් එම නඩුවට අදාළව ඇප නියම කර නැති බැවින් තවදුරටත් රක්ෂිත බන්ධනාගාර කළ බවයි වාර්තා වන්නේ.
ඒ අනුව උපාලි තෙන්නකෝන් පහරදීමේ සිදුවීමට අදාළව 1 වෙනි සැකකරු හෙට දිනයේ ගම්පහ මහේස්ත්‍රාත් අධිකරණයේ පැවැත්වෙන හඳුනාගැනීමේ පෙරෙට්ටුවට ඉදිරිපත් කිරීමට නියමිත බවත්, සෙසු සැකකරුවන් පස් දෙනා අප්‍රේල් මස 07 වන දින ගම්පහ මහේස්ත්‍රාත් අධිකරණයේ හඳුනාගැනීමේ පෙරෙට්ටුවට ඉදිරිපත් කරන බවත් අපරාධ පරීක්ෂණ දෙපාර්තමේන්තුව විසින් අධිකරණයට දන්වා තිබේ.
මාධ්‍යවේදී කීත් නොයාර්ගේ නඩුවේ වැඩිදුර විභාගය ජූනි මස 01 වන දින කැඳවීමට ගල්කිස්ස මහේස්ත්‍රාත්වරිය තීරණය කර තිබෙන අතර ඔහු නොපැමිණිම හේතුවෙන් පරික්ෂණ කටයුතු අර්බුදයට ලක් වී ඇති බවයි වාර්තා වන්නේ.
Facebook Comments
