ඉතිහාසයේ සිදුවු වැරදි අඩුපාඩුකම් යළි සිදු නොවීමට යෝජිත නව ව්‍යවස්ථාව මඟින් වගබලා ගනිමින් උතුරේ දෙමළ ජනයාගේ ගැටලු වලට දේශපාලන විසඳුමක් ලබා දීම සිදු කල යුතු බව ජනවාරි 08 ජයග්‍රහණයට උර දුන් අලුත් පරපු‍ර නියෝජනය කරන රංගන ශිල්පිනියක් පවසනවා.
මනාප ජන්ද ක්‍රමයේ වෙනස් කිරීම, විධායක ජනාධිපති ක්‍රමය අහෝසි කිරීම සහ ජාතික ප්‍රශ්නයට ස්ථිර විසඳුමක් ලබා දීම යෝජිත නව ව්‍යවස්ථාව මඟින් සිදුවිය යුතු අනිවාර්ය කාරණා බවයි රංගන ශිල්පිනී සමනලී ෆොන්සේකා නව ව්‍යවස්ථාව සම්බන්ධව සිලොන් ජර්නල්ස් හා සාකච්ඡාවකට එක්වෙමින් පෙන්වා දුන්නේ.
සියලු දේශපාලන පක්ෂ , සිවිල් සංවිධාන සහ ජනතාවගේ යෝජනා ගෙන ඒ හරහා නව ව්‍යවස්ථාවෙන් ජාතික ප්‍රශ්නයට දේශපාලන විසඳුමක් ලබා දීම සුදුසු බවයි ඇය යෝජනා කරන්නේ.
ජනවාරි 08 ජයග්‍රහණයට උරදුන්න‍ා සේම නව ව්‍යවස්ථාවක් වෙනුවෙන් පවත්වන ජනමත විචාරණයකට සිය සහයෝගය ලබා දෙන බවට පැවසු රංගන ශිල්පිනය රජය විසින් යෝජිත නව ව්‍යවස්ථාවේ ඇති වැදගත්කම සම්බන්ධව ජනතාව දැනුවත් කල යුතු බවටද අවධාරණය කළේය.
සංශෝධන හරහා විසඳන්න බැහැ
ව්‍යවස්ථා සංශෝධන හරහා රටේ පවතින ප්‍රධාන ප්‍රශ්න වලට විසඳුම් නොලැබෙන බවට විශ්වාසය පළ කරන රංගන ශිල්පිනිය ඒ සඳහා නව ව්‍යවස්ථාවක් සැකසීම අනිවාර්යයෙන්ම සිදු කල යුතු බව මෙන්ම යහපාලන රජය බලයට පත් වුයේ අලුත් ව්‍යවස්ථාවක් පිළිබඳව පොරොන්දු ලබා දෙමින් බවද සිහිපත් කළේය.
නව ව්‍යවස්ථව මඟින් රටට යහපතක් වන බව දන්නා මුත් ඇතමුන් ඊට විරුද්ධ වන්නේ පුද්ගලික දේශපාලන වාසි තකා බව කී සමනලී ෆොන්සේකා නව ව්‍යවස්ථාවට විරුද්ධ කොටස් මෛත්‍රීපාල සිරිසේනගේ ජයග්‍රහණයේ කොටස්කරුවන් නොවන බවයි සිලෝන් ජර්නල්ස් හා කියා සිටියේ.
Facebook Comments
