අහිමි වු මන්ත්‍රී ධුරය සොයා ගීතා ශ්‍රේෂ්ඨාධිකරණයට

0
Ivory Agency Sri Lanka
wedding people

ශ්‍රී ලංකාවේ සහ ස්විට්සර්ලන්තයේ ද්විත්ව පුරවැසිභාවය ඇති බැවින් එක්සත් ජනතා නිදහස් සන්ධාන පාර්ලිමේන්තු මන්ත්‍රීනි ගීතා කුමාරසිංහ හට මන්ත්‍රී ධුරයක් දැරීමට අයිතියක් නැති බව අභියාචනාධිකරණය බදාදා (3) ප්‍රකාශයට පත් කල අතර එම අධිකරණ තීන්දුවට එරෙහිව අදම ශ්‍රේෂ්ඨාධිකරණයට අභියාචනයක් යොමු කරන බව මන්ත්‍රීනි ගීතා කුමාරසිංහ පවසයි.

ගීතා කුමාරසිංහගේ මන්ත්‍රී ධුරය අභියෝගයට ලක් කරමින් ගාල්ල දිස්ත්‍රීක්කයේ පදිංචි ඡන්දදායකයන් හතර දෙනෙකු විසින් 2015 වසරේ මාර්තු මාසයේදී අභියාචනාධිකරණය හමුවේ ගොනු වූ පෙත්සමකට මෙම නියෝගය ලැබී තිබේ.

ආණ්ඩුක්‍රම ව්‍යවස්ථාවේ 19වන සංශෝධනයට අනුව ද්විත්ව පුරවැසිභාවය හිමි තැනැත්තෙකුට පාර්ලිමේන්තුවේ මන්ත්‍රීධූරයක් දැරිය නොහැකි බැවින් ගීතා කුමාරසිංහ හට මන්ත්‍රීධූරයක් දැරිය නොහැකි බව එම පෙත්සම මඟින් කියා තිබුණි.

මෙම කටයුත්ත පාර්ලිමේන්තුවේ අභ්‍යන්තර කටයුත්තක් බැවින් මෙම පෙත්සම විභාග කිරීමට අභියාචනාධිකරණයට බලයක් නොමැති බව විත්තියේ නීතීඥයින් කියා සිටියද එම විරෝධතාවය ප්‍රතික්ෂේප කළ අභියාචනාධිකරණය විසින් මෙම තීන්දුව ලබා දුන්නේය.

අභියාචනාධිකරණ හිටපු සභාපති විනිසුරු විජිත් මලල්ගොඩගේ එකඟතාවයද ඇතිව මෙම තීන්දුව ප්‍රකාශයට පත් කරනු ලැබුවේ විනිසුරු ප්‍රීති පද්මන් සූරසේන විසිනි.

Facebook Comments