මීතොටමුල්ල කුණු කන්ද නාය යෑමෙන් සිදුවු මරණ නොසැලකිලිමත් කමින් සිදුවු අනියමි මිනි මැරුමක් බැවින් ඒ සම්බන්දයෙන් විමර්ශනයක් පවත්වන ලෙස ඉල්ලමින් ඉදිරියේදී මහේස්ත්‍රාත් අධිකරණයට පැමිණිළි කරන බව ජවිපෙ මධ්‍යම කමිටු සාමාජික නීතීඥ සුනිල් වටගල පවසනවා.
කුණු කන්ද නාය යෑමෙන් ජනතාව මරණයට හා විපතට පත් කිරීම මගින් ශ්‍රී ලංකා ආණ්ඩුක්‍රම ව්‍යවස්ථාවේ මුලික අයිතිවාසිකම් පරිච්ජේදය මුලුමනින්ම උල්ලංඝණය වී ඇති බව සඳහන් කරමින් ශ්‍රී ලංකා මානව හිමිකම් කොමිෂන් සභාව වෙත පැමිණිල්ලක් ඉදිරිපත් කරමින් ඔහු මේ බව ප්‍රකාශ කළේය.
මීතොටමුල්ල කුණු කන්ද නාය යාමෙන් මරණයට පත්වුවන්ට ගෙවනු ලබන වන්දි මුදල කොපමණද යන්න ප්‍රකාශයට පත් කරන ලෙසටද ඔහු රජයට බල කර සිටියේය.
කුණු කන්ද අශ්‍රීත ප්‍රදේශය අවදානම් කලාපයක් ලෙස නම් කර තිබෙන බව පවසන නීතීඥ සුනිල් වටගල අවදානම් කලාපයේ සිටින ජනතාවට ස්ථිර විසඳුමක් ලබා දී ඔවුන්ගේ ජන ජීවිතය යථා තත්ත්වයට පත් කරන ලෙසටයි රජයට බල කරන්නේ.
මෙය ස්වාභාවික විපතක් නොවන බැවින් කොළඹ නගර සභාව, ආපදා කළමනාකරණ අමාත්‍යංශය ඇතුළු රාජ්‍ය ආයතන රැසක්ද අදාල සිද්ධියට වගකිව යුත්තන් ලෙස පැමිණිල්ලේ නම් කර තිබෙන බවයි ඔහු සඳහන් කළේ.
මිය ගිය පුද්ගලයෙකු සඳහා රුපියල් ලක්ෂ 60ක මුදලක් ලබා දෙන ලෙසට ද අදාල පැමිණිල්ලෙන් යෝජනා කර තිබෙන බවයි සුනිල් වටගල වැඩිදුරටත් කියා සිටියේ.
Facebook Comments
