හිටපු මුදල් ඇමැති රවි කරුණානායක සිය නිවස අලුත්වැඩියා කරන තෙක්‌ රැඳී සිටි මොනාක්‌ රෙසිඩන්සීස්‌ හි පිහිටි සුපිරි මහල් නිවාසයට බදු මුදල් ගෙවා ඇත්තේ පර්පෙචුවල් ට්‍රේෂරිස් සමාගමේ අර්ජුන් ඇලෝෂියස් බව හෙළිව තිබේ.
එම නිවාස ඒකකය තමාට අයත් එකක් බව සහ ඒ සඳහා වන බදු මුදල ගෙවීම සිදු කළේ පර්පෙචුවල් ට්‍රේෂරිස් සමාගමේ අර්ජුන් ඇලෝෂියස් විසින් ඔහුට සම්බන්ධ වෙනත් සමාගමක්‌ හරහා බවට අදාළ නිවාස ඒකකයේ හිමිකාරිය වන එම්. විනෝදනී ජනාධිපති බැඳුම්කර කොමිසම හමුවේ සාක්ෂි දෙමින් සඳුදා (24) ප්‍රකාශ කළේය.
එසේම බදු ලෙස ලබාගැනීමෙන් මාස අටකට පමණ පසු එම නිවස රවි කරුණානායක විසින් රු. මිලියන 165 කට ඔහුගේ පවුලේ සාමාජිකයන් විසින් අධ්‍යක්‍ෂ ධුර දරන ග්ලෝබල් ස්‌ටාර් ලොජිස්‌ටික්‌ස්‌ පුද්ගලික සමාගම හරහා මිලදී ගත් බවද ඇය කොමිසම හමුවේ ප්‍රකාශ කර ඇත.
අදාල බදු ගනුදෙනුව පිළිබඳව සියලු ගනුදෙනු සාකච්ඡා කළේ අර්ජුන් ඇලෝෂියස් බව පවසන ඇය තමා බද්දට ගත්තත් මෙහි රවි කරුණානායක ඇමතිවරයා ඇතුළු පවුලේ සාමාජිකයන් පදිංචි වී සිටින බව ඇලෝෂියස් තමන්ට වාචිකව ප්‍රකාශ කළ බවද ඇය වැඩිදුරටත් සාක්ෂි දෙමින් කීවාය.
ඒ සඳහා අර්ජුන් ඇලෝෂියස් මුදලින් රුපියල් මිලියන 1.4 ක්‌ සහ චෙක්‌පතකින් තවත් මිලියන 10.2 ක්‌ වශයෙන් රු. මිලියන 11.6 ක මුදලක්‌ නිවස ඒකකයේ හිමිකාරිය වන එම් විනෝදනී වෙත ලබා දී ඇති අතර එහි මාස දෙකක නැවත ගෙවන තැන්පතුවක්‌ද ඇතුළත්ව තිබී ඇත.
මෙයට අදාළ බදු ගිවිසුම අතිරේක සොලිසිටර් ජනරාල් ජනාධිපති නීතිඥ යසන්ත කෝදාගොඩ විසින් සඳුදා (24) කොමිසමට ඉදිරිපත් කරන ලදී.
Facebook Comments
