ජනාධිපතිවරයා විසින් සංහිඳියාවට සෙමින් ගමනක් යාම සඳහා සහාය බලාපොරොත්තු වන බව එක්සත් ජාතින්ගේ මහා මණ්ඩලය හමුවේ පවසා මසක් ගත විමෙන් පසු සංහිඳියාව කරා ගමන්මඟ පමා කිරීමෙන් ශ්‍රී ලංකාව අවදානමක පවතින බවට එම සංවිධානයේම නියෝජිතයෙකු අනතුරු අඟවා තිබේ.
“ඇතැම් අන්තවාදී පිරිස් වේගවත් ගමනක් බලාපොරොත්තු වෙනවා, ඇතැම් අන්තවාදී පිරිස් කඩිනම් විසඳුම් බලාපොරොත්තු වෙනවා, ඇතැම් අන්තවාදී පිරිස් කෙටිකාලීන විසඳුම් බලාපොරොත්තු වෙනවා,” යි ජනාධිපති මෛත්‍රීපාල සිරිසේන එක්සත් ජාතිනගේ මහා මණ්ඩලයේ 72 වන සැසිවාරය අමතමින් කියා තිබුණි.
දිවයිනේ දෙසතියක සංචාරයක් නිමාවේ සිය නිරීක්ෂණ කොළඹ දී මාධ්‍යවේදීන් හමුවේ තබමින් ශ්‍රී ලංකාව සංහිඳියාව කරා ගමන්මඟ පමා කිරීම අවදානමක් බව මෙන්ම සංහිඳියාව කරා යන ගමන්මඟ තවදුරටත් පමා නොකොට ආණ්ඩුවේ මැදිහත්වීමෙන් යුතුව සුවිශේෂී තීරණ ගත යුතු බවට එක්සත් ජාතීන්ගේ විශේෂ නියෝජිත පැබ්ලෝ ද ග්‍රීෆ් අවධාරණය කළේය.
යුද පීඩිතයන්ට යුක්තිය ඉටු කිරීම සම්බන්ධයෙන් තමන් දෙවසරකට ඉහතදී ශ්‍රී ලංකාවට පැමිණි අවස්ථාවේ ඉදිරිපත් කළ නිර්දේශ වලින් බොහොමයක් ක්‍රියාවේ යොදවා නැති බව සඳහන් කරන පැබ්ලෝ ද ග්‍රීෆ්, ඒ සඳහා පැහැදිලි කාල සටහනක් සකස් කරන මෙන්ද ආචාර්ය මනෝරි මුත්තෙට්ටුවෙගමගේ ප්‍රධානත්වයෙන් යුත් සංහිඳියාව සඳහා වන ශ්‍රී ලංකාවේ කාර්ය සාධක බලකාය ලබා දුන් නිර්දේශ සැලකිල්ලට ගන්නා ලෙස ද ඉල්ලා සිටියි.
රජය මෙන්ම විපක්ෂයේ සිංහල ජාතිකවාදී දේශපාලනයද දේශපාලන වාසි තකා යුක්තිය ඉටු කිරීමේ පමාවට වගකිව යුතු බවට විශේෂ නියෝජිත පැබ්ලෝ ද ග්‍රීෆ් චෝදනා කළ අතර රජය තම නිර්දේශ ක්‍රියාවේ යෙදවීමට නීතියෙන් බැඳී නැතත්, ජාත්‍යන්තර යුක්ති විනිශ්චය ක්‍රියාදාමයෙන් ගැලවී හිඳීම පහසු කාරියක් නොවන බවට ඔහු විශ්වාසය පල කර සිටියේය.
එක්සත් ජාතීන්ගේ සංවිධානයෙන් ලබා ගත හැකි ආධාර අනුග්‍රහ වලින් ශ්‍රී ලංකාවේ රජය මේතාක් නිසි ප්‍රයෝජන ගෙන නොමැති වීම සම්බන්ධව එක්සත් ජාතින්ගේ විශේෂ නියෝජිත සිය කනගාටුව පල කළේය.
Facebook Comments
