අවුරුදු හයක් ඉන්න පුළුවන්දැයි දැනගැනීමට ජනපතිට දින තුනක්

සිය නිශ්චිත නිල කාල සීමාව පිළිබඳව විමසමින් ජනාධිපති මෛත්‍රීපාල සිරිසේන විසින් කර ඇති ඉල්ලීම පිළිබඳ විභාගය අවසන් කළ ශ්‍රේෂ්ඨාධිකරණය එහි රහසිගත තීරණය ජනාධිපතිවරයා වෙත ජනවාරි 14 දා යොමු කිරීමට නියමිතය.

ජනාධිපතිවරයා විසින් ඉදිරිපත් කර ඇති මෙම ඉල්ලීම අගවිනිසුරු ප‍්‍රියසාද් ඩෙප්, ඊවා වනසුන්දර, බුවනෙක අලුවිහාරේ, කේ.ටී. චිත‍්‍රසිරි සහ සිසිර ද ආබෲ යන පංච පුද්ගල ශ්‍රේෂ්ඨාධිකරණ විනිසුරු මඩුල්ල හමුවේ 11 බ්‍රහස්පතින්දා විභාගයට ගත් අවස්ථාවේදී ජනාධිපති හට වසර 6ක කාලයක් සිය ධුරයේ කටයුතු කිරීමට හැකියාව ඇතැයි නීතීපති, ජනාධිපති නීතීඥ ජයන්ත ජයසුරිය කියා සිටියේය.

මෛත‍්‍රීපාල සිරිසේන 2015 ජනවාරී මස 08 ජනාධිපතිවරයා ලෙස තේරී පත්වු අතර 2015 ජනවාරී මස 09 වැනිදා ජනාධිපති ධූරයේ දිවුරුම් දුන් බව පැවසු නීතිපතිවරයා එම අවස්ථාවේදී 19 වැනි ව්‍යවස්ථා සංශෝධනය නීතිගත කර නොතිබු බව පෙන්වා දුනි.

එම ව්‍යවස්ථා සංශෝධනය අනුව ශ්‍රී ලංකාවේ ජනාධිපතිවරයකුගේ නිල කාලය අවුරුදු පහකි.

ජනාධිපතිවරයා දිවුරුම් දුන් අවස්ථාවේදී පැවති නීතියට අනුව ජනාධිපති ධුරයට පත්වන පුද්ගලයා හට වසර 6 ක කාලයක් සිය ධුරයේ කටයුතු කිරිමේ හැකියාව පවතින බව ජනාධිපති නීතීඥ ජයන්ත ජයසුරිය පංච පුද්ගල විනිසුරු මඩුල්ල හමුවේ කියා සිටියේය.

19 කාටත් පොදුයි

කෙසේ වෙතත් ඒකාබද්ධ විපක්ෂයේ මහාචාර්ය ජී.එල්.පීරිස් වෙනුවෙන් පෙනී සිටි ජනාධිපති නීතිඥ මනෝහර සිල්වා නීතිපතිවරයාගේ මතය අභියෝගයට ලක් කරමින් ජනාධිපතිවරයාට ධූරයේ කටයුතු කළ හැක්කේ වසර පහක් පමණක් බව ආණ්ඩුක්‍රම ව්‍යවස්ථාවේ ඉතා පැහැදිලිව සඳහන් බව පෙන්වා දුන්නේය.

19 වැනි ආණ්ඩුක්‍රම ව්‍යවස්ථා සංශෝධනය වත්මන් ජනාධිපතිවරයාට ද බලපාන බව එහි පැහැදිලිව සඳහන් කර ඇති බව ජනාධිපති නීතිඥ මනෝහර සිල්වා අධිකරණය වෙත ප්‍රකාශ කළේය.

19 වැනි ආණ්ඩු ක‍්‍රම ව්‍යවස්ථා සංශෝධනයේ 49 (1) ‘අ’ සහ ‘ආ’ වගන්තියේ ” 2015 අප්‍රේල් මස 22 වන දිනට පෙර පිළිවෙලින් ජනාධිපති ධුරය සහ අග්‍රාමාත්‍ය ධුරය දරන තැනැත්තන් එම දිනෙන් පසු, මෙම පනත මගින් සංශෝධිත ආණ්ඩුක්‍රම ව්‍යවස්ථාවේ විධිවිධානවලට යටත්ව එම ධුර දැරිය යුතු වන්නේ ය.” යැයි සඳහන්ව තිබේ.

ශ්‍රේෂ්ඨාධිකරණයේ මතය ප්‍රසිද්ධ කිරීම හෝ නොකිරීම ජනාධිපති මෛත්‍රිපාල සිරිසේනගේ අභිමතය අනුව සිදු වනු ඇත.