මෙවර පළාත් පාලන මැතිවරණයෙන් තේරි පත්වන ශ‍්‍රි ලංකා නිදහස් පක්ෂයේ කිසිදු මහජන නියෝජිතයෙකුට වැරදි කිරීමට තමා ඉඩ නොතබන බව අවධාරණය කරන ජනාධිපතිවරයා එහි වගකීම පක්ෂයේ නායකයා ලෙස තමා බාරගන්නා ප්‍රකාශ කර තිබේ.
මෙවර පළාත් පාලන මැතිවරණය සඳහා ශී‍්‍ර ලංකා නිදහස් පක්ෂයෙන් හිඟුරක්ගොඩ ප‍්‍රාදේශීය සභාවට තරගකරන අපේක්ෂකයින්ගේ ජය තහවුරු කිරීම වෙනුවෙන් 11 බ්‍රහස්පතින්දා පැවති උත්සවයක් අමතමින් ජනාධිපති මෛත්‍රීපාල සිරිසේන මේ බව කියා සිටියේය.
රටේ සංවර්ධන වැඩපිළිවෙළ කාර්යක්ෂම කර ගැනීමට විනයක් ඇති මහජන නියෝජිතයින් පිරිසක් මෙවර මැතිවරණයෙන් පළාත් පාලන ආයතන සඳහා තෝරා පත්කරගත යුතු බව ද ජනාධිපතිවරයා මෙහිදි සඳහන් කළේය.
මෙරට දේශපාලන සංස්කෘතියේ පවතින වැරදි නිවැරදි කරමින් වංචාවෙන් දූෂණයෙන් තොර ජනහිතකාමී ගමනකට මුල් පියවර තබන මෙම මැතිවරණයේ දී ජනතාව ඉතා වගකීමෙන් තම යුතුකම් ඉටු කළයුතු බවයි ජනපති පෙන්වා දෙන්නේ.
පළාත් පාලන ආයතන වෙත විනයක් ඇති නියෝජිතයින් පත්කරගත යුත්තේ ජාතික දේශපාලන නායකයින්ගේ ගමන් මගේ මූලාරම්භය එය නිසා බව පෙන්වා දුන් ජනාධිපති මෛත්‍රීපාල සිරිසේන පළාත් පාලන ආයතන තුළ අවංක ජනහිතකාමී මහජන නියෝජිතයින් බිහිවීමත් සමග සමස්ත දේශපාලන සංස්කෘතියම නිවැරදි ගමන් මගකට අවතීර්ණ වන බවට විශ්වාසය පල කළේය.
Facebook Comments
