බදුල්ල දෙමළ බාලිකා මහා විද්‍යාලයේ විදුහල්පතිනිය නිල නිවසට කැඳවා බලහත්කාරයෙන් දණගැස්සූ ඌව මහ ඇමැති චාමර සම්පත් දසනායකට එරෙහිව විරෝධතා පැවැත්වෙමින් තිබියදී අධිකරණය විසින් ඇප ලබා දී ඇත.
පොලිසියට බාර වීමෙන් පසු අත්අඩංගුවට ගත් මහ ඇමැතිවරයා 23 අඟහරුවාදා බදුල්ල මහේස්ත්‍රාත් නයන්ත සමරතුංග වෙත ඉදිරිපත් කර පසුව රුපියල් ලක්ෂ දෙකක ශරීර ඇප මත මහ ඇමැතිවරයා මුදා හැර තිබේ.
විදුහල්පතිනිය දණ ගැස්ස විමේ සිද්ධියට විරෝධය දක්වමින් මහ ඇමැතිවරයාට එරෙහිව දෙවනි දිනටත් ඌව පලාත් සභාව ඉදිරිපිට සහ කොළඹ දී විරෝධතා පවත්වා ඇත.
විරෝධතාවයට ගුරුවරුන් දෙමාවිපියන් සහ රාජ්‍ය සේවකයින්ද එක්ව සිටි බව අප වාර්තාකරුවෝ පවසති.
නාඩගමක්
ඌව මහ ඇමැති සිය ධූරයේ රැදෙමින් අධ්‍යාපන අමාත්‍ය ධූරයෙන් තාවකාලිකව ඉල්ලා අස්වීම විදුහල්පතිනිය දණගැස්සවීමේ සිද්ධිය යටපත් කිරීමේ ‘නාඩගමක්’ බවට චෝදනා කල ලංකා ගුරු සංගමය එයට විරුද්ධව නීතිය ක්‍රීයාත්මක නොකලහොත් වෘත්තීය ක්‍රියා මාර්ග ගන්නා බවට අනතුරු අඟවා තිබුණි.
එසේම විදුහල්පතිනි රඝුනාත් භවානි මහ ඇමතිවරයාගේ නිල නිවසට යවා සිදුකරන ලද අතවරය යටපත් කිරීමට ඇය ලවා බලහත්කාරයෙන් ජනවාරි 9 දා මාධ්‍ය සඳහා ප‍්‍රකාශ ලබාගත් ඌව පළාත් අධ්‍යාපන ලේකම්වරිය වන සන්ධ්‍යා අඹන්වල, ඌව පළාත් අධ්‍යාපන අධ්‍යක්ෂ ආර්.එම්.බී. රත්නායක හා බදුල්ල කලාප අධ්‍යාපන අධ්‍යක්ෂ සරත් රණසිංහ යන නිලධාරීන්ගේ වැඩතහනම් කර වහාම විනය පියවර ගත යුතු බව ද ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසයි.
Facebook Comments
