බුද්ධ ශාසන අමාත්‍යංශයේ අවසරයකින් තොරව මෙරටට ගෙන්වන ලද බුද්ධ ප්‍රතිමා රේගුව විසින් නිදහස් නොකරන බව පවසමින් යම් කණ්ඩයමක් අසත්‍ය ප්‍රචාරයක් පතුරවමින් රජය අපහසුතාවයට පත් කරමින් සිටින බව වාර්තා වේ.
බුදු පිළිම මෙරටට ගෙන්වීමට ප්‍රථම එම පිළිම වල අනුරුවක් බුද්ධ ශාසන අමාත්‍යංශයේ උපදේශන කමිටුවට යොමු කර අනුමැතිය ලබා ගැනීමට අවශ්‍ය වුවද මෙම පිළිම ගෙන්වීමට එම අවසරය ලබා ගෙන නොමැති බව බුද්ධ ශාසන අමාත්‍යංශයේ ඉහල පෙළේ නිලධාරියෙකු කියා සිටියේය.
“මෙවැනි පිළිම වහන්සේලා ගෙන්වීමේදී එම පිළිම වහන්සේලාගේ හැඩය ආකෘතිය පිළිබඳව පුර්ව අනුමැතියක් ලබාගත යුතුයි. එහෙම නැතුව පිළිම වහන්සේලා මෙරටට ගෙන්වන්න අනුමැතිය දෙන්නේ නැහැ. අපි එහෙම කරන්නෙ විවිධ පිළිම ගේන එක වළක්වන්න ථෛරවාදි බුදු අදහමට අයත් පිළිම වලට විතරයි අපි අවසර දෙන්නේ” යි බුද්ධ ශාසන අමාත්‍යංශයේ නිලධාරියා කියා සිටියේය.
අදාල පාර්ශවයෙන් ලිඛිත ඉල්ලීමක් ලද වහාම පිළිම වහන්සේලා නිදහස් කර ගැනීමට මුදල් වෙන් කිරීමට බෞද්ධ ශාසන අමාත්‍යංශයේ ලේකම්වරයා බුදු පිළිම ගෙන්වන ලද වලවාහැංගුණ වැවේ ධම්මරතත හිමියන්ට පොරොන්දු වී ඇති බව ද බුද්ධ ශාසන අමාත්‍යංශ ආරංචි මාර්ග පවසයි.
මෙවැනි ආකාරයට රජයකින් වෙනත් රජයකට ප්‍රධානය කරන කිසිඳු භාණ්ඩායක් සඳහා බදු අය නොකරනු ලබන අතර රජයකින් පෞද්ගලික ආයතනයකට හෝ විදෙස් පෞද්ගලික ආයතනයකින් හෝ පුද්ගලයින් ගෙන් මෙරට ආයතනයකට කරනු ලබන පරිත්‍යාගයකට සමාන්‍ය පරිදි බදු අය කෙරේ.
එහෙත් පරිත්‍යාග ලබා ගන්නා පර්ශවය විසින් බුද්ධ ශාසන අමාත්‍යංශයට ඉල්ලීමක් කරනු ලැබුවහොත් ඒවා නිදහස් කර ගැනීමට එම අමාත්‍යංශය මැදිහත් වනු ලබයි.
බොරු තොරතුරු
කෙසේ වෙතත් බුදු පිළිම 1000 එසේ අනුමැතියකින් තොරව මෙරටට ගෙන්වා ඇති අතර ඒවා මෙරටට පැමිණිමෙන් පසුව බුදු පිළිම 25 පමණක් ගෙන්වා ඇති බව දන්වමින් පිළිම නිදහස් කරන ලෙස අගමැති කාර්යාලයට දන්වා තිබේ.
ඉල්ලීමක් ලැබීමටත් පෙර ඉල්ලීමක් ලැබුණහොත් බුදු පිළිම නිදහස් කරන ලෙස මුදල් හා ජනමාධ්‍ය අමාත්‍යවරයා රේගුව වෙත උපදෙස් දී ඇති බව මාධ්‍ය වාර්තා කර තිබුණි.
ගෙන්වන ලද බුදු පිළිම ප්‍රමාණය පිළිබඳව නිවැරදි තොරතුරු හෝ එම පිළිමයේ අනුරුවක් ඉදිරිපත් නොකර පිළිම ගෙන්වන ලද පාර්ශව විසින් අසත්‍ය ප්‍රචාර සිදු කරමින් රජය කෙරෙහි මහජන අප්‍රසාදයක් ඇති කිරීමට කුමන්ත්‍රණයක් උත්සාහ කරන්නේ දැයි සැක සහිත බවයි බුද්ධ ශාසන අමාත්‍යංශයේ ආරංචි මාර්ග වැඩි දුරටත් පවසන්නේ.
Facebook Comments
