විශ්ව විද්‍යාල තුල ක්‍රියාත්මක වන නවක වදය ශිෂ්‍ය ත්‍රස්තවාදයක් ලෙස හඳුන්වන ජනාධිපතිවරයා එය පිටුදැකීම වෙනුවෙන් සියලු පාර්ශ්වයන්ගේ වගකීම් ඉටුකළ යුතු බව අවධාරණය කරයි.
අමානුෂික නවකවදය පිටු දැකීමට වගකිවයුතු සියලු පාර්ශ්වයන් එක් වූ පොදු වැඩපිළිවෙළකට කඩිනමින් අවතීර්ණ විය යුතු බවට ජනාධිපති මෛත්‍රීපාල සිරිසේන 08 සිකුරාදා බණ්ඩාරවෙල මධ්‍ය මහා විද්‍යාලයේ නව තෙමහල් ගොඩනැගිල්ල සිසු අයිතියට පවරාදීමේ අවස්ථාවට එක්වෙමින් කියා සිටියේය.
සදාචාරවත් නොවූ අමානුෂික නවකවදය හේතුවෙන් පසුගිය වසර කිහිපය තුළ මෙරට විශ්වවිද්‍යාල සිසුන්ට අමිහිරි අත්දැකීම් රැසකට මුහුණ දීමට සිදුවු බව කී ජනපති අනාගත දරු පරපුරට එල්ල වී ඇති මෙම අභියෝගයට කඩිනම් විසඳුම් ලබාදීමේ අවශ්‍යතාවය අවධාරණය කළේය.
බලලෝභී සංවිධාන
මෙම ම්ලේච්ඡ ක්‍රියාවන් පිටුපස ඇතැම් බලලෝභී දේශපාලන සංවිධාන ද ක්‍රියාත්මක වන බවයි ජනාධිපති මෛත්‍රීපාල සිරිසේන පෙන්වා දෙන්නේ.
ජංගම දුරකථන සහ පරිගණක හරහා සිදුවන අපරාධ සම්බන්ධව රජයේ දැඩි අවධානය යොමුව ඇති බව ද ජනාධිපතිවරයා ප්‍රකාශ කළේය.
දරුවන්ගේ විභාග ප‍්‍රතිඵල පිළිබඳව සතුටු වනවා සේම යහපත් සමාජයක් තුළ තාක්ෂණය නිවැරදිව භාවිතා කරන සහ සමාජ වගකීම් පිළිබඳ අවබෝධයෙන් කටයුතු කරන විභාග මෙන්ම ජීවිත ද සමත්වූ මතු පරපුරක් රටට දායාද කිරීමට සියලු දෙනා තම වගකීම් ඉටුකළ යුතු බව ජනපති මෛත්‍රීපාල සිරිසේන වැඩි දුරටත් පෙන්වා දුනි.
Facebook Comments
