බොදුබල සේනා සංවිධානයේ නායක හිමියන් හට සිර දඬුවමක් නියම වීම එම සංවිධානයෙන් හිංසාවට පත්වු සියලු දෙනා හට සතුටු විය හැකි කරුණක් බව බොදුබල සේනා නායකයාගේ අඩන්තේට්ටම් වලට එරෙහිව සටන් වැදුනු අතුරුදහන් මාධ්‍යවේදී ප්‍රගීත් එක්නැළිගොඩගේ බිරිය පවසයි.
ගලගොඩඅත්තේ ඥාණසාර හිමියන්ගෙන් හිංසාවට පත්ව අසරණ වී සිටින සියලු දෙනා වෙනුවෙන් තමන් එහිමියන්ට එරෙහි නඩුව ඉදිරියට ගෙන ගිය බව සන්ධ්‍යා එක්නැළිගොඩ මාධ්‍ය වෙත කියා සිටියේය.
“මේ හිමියන්ගෙන් බොහෝ හිංසාවට පත් වෙච්ච සියලුම දෙනා වෙනුවෙන් මම මේක කළේ. මොකද අධිකරණයේ පිහිට පතන්න බැරිව ලත වෙන බොහෝ දෙනා ඉන්නවා සමහර විට ඒ අය ගිහියෝ වෙන්න පුලුවන් තවත් හිමිවරු වෙන්න පුලුවන් ඒ සියලු දෙනා වෙනුවෙන් තමා මම මේක ගත්තෙ. අද මේ ලැබිච්ච තීන්දුව ඒ සියලුම දෙනාට සන්තෝසයක් බව මම දන්නවා” යි ඇය නඩු තීන්දුවෙන් පසුව මාධ්‍ය වෙත ප්‍රකාශ කළේය.
දස අවුරුද්දකට ඉහතදී අතුරුදහන් කරන ලද සිය සැමියා වෙනුවෙන් යුක්තිය ඉල්ලා සටන් වදින සන්ධ්‍යා එක්නැලිගොඩට උසාවි භූමියක් තුල තර්ජනය කොට අඩන්තේට්ටම් කිරීම සම්බන්ධයෙන් බොදුබල සේනා නායක හිමියන් හට මාස 06ක බරපතල වඩ ඇතිව සිර දඬුවමක් නියම කළ අධිකරණය රුපියල් 1500ක දඩ දෙකක් සමඟ අගතියට පත් සන්ධ්‍යා එක්නැළිගොඩ හට රුපියල් පනස් දහසක වන්දියක් ගෙවීමට නියම කරන ලදී.
එම වන්දිය සහ දඩ මුදල් ගෙවීමට අපොහොසත් වුවහොත් සිර දඬුවම තවත් මාස 3ක් දක්වා දිර්ඝ වන බව ද හෝමාගම ප්‍රධාන මහේස්ත‍්‍රාත් උදේශ් රණසිංහ 14 බ්‍රහස්පතින්දා ගලගොඩඅත්තේ ඥාණසාර හිමියන්ට එරෙහි නඩුවේ තීන්දුව ප්‍රකාශ කරමින් කියා සිටියේය.
මෙම තීන්දුව අනාගතයේ වින්දිතයන්ට ආරක්ෂාව සැලසෙන තීන්දුවක් බවට සන්ධ්‍යා එක්නැළිගොඩ තීන්දුව ප්‍රකාශ කිරිමෙන් අනතුරුව හෝමගම අධිකරණ භුමියේ සිටි මාධ්‍යවේදීන් වෙත ප්‍රකාශ කළාය.
කෙසේ වෙතත් බොදුබල සේනා සංවිධානයේ නායක ගලගොඩඅත්තේ ඥාණසාර හිමියන්ට එරෙහිව ලබා දුන් තීන්දුවට එරෙහිව ඇපෑලක් ඉදිරිපත් කරන බවට එහිමියන් වෙනුවෙන් පෙනී සිටි නීතිඥ මංජුල මහකුඹුර කියා සිටියේය.
Facebook Comments
