ඉදිරි ජනාධිපතිවරණ අපේක්ෂකයා ලෙස ඉදිරිපත් වීමට ගෝඨාභය රාජපක්ෂ සහ බැසිල් රාජපක්ෂ අතර පැවති අභ්‍යන්තර සටන මේ වන විට එළියට පැමිණ තිබේ.
ගෝඨාභය රාජපක්ෂ තම මාධ්‍ය සගයන් සහ හමුදා නායකයන් පෙරටු කර ගෙන ආරම්භ කර ඇති ජනාධිපති සටනට බැසිල් රාජපක්ෂ තම සමාඡ මාධ්‍ය හා ඒකාබද්ධ විපක්ෂයේ හිතවත් පිරිස් සමඟ එක්ව ප්‍රහාර අරඹා ඇති බවයි ඒකාබද්ධ විපක්ෂයේ දේශපාලන ආරංචි මාර්ග පවසන්නේ
මෙහි එළිපිට සටනට ආරම්භ කරමින් ජනාධිපති අපේක්ෂකයා ලෙස ශ්රී ලංකා පොදුජන පෙරමුණේ සංවිධායක හිටපු ඇමති බැසිල් රාජපක්ෂ නම් කරන්නේ නම් තමන් ඉතාම සතුටු වන බව ඒකාබද්ධ විපක්ෂයේ පාර්ලිමේන්තු මන්ත‍්‍රී විමලවීර දිසානායක පසුගිය දා පැවති ජන හමුවක දී ප්‍රකාශ කළේය.
“එක නායකයෙකුට අපි ගරු කරන්න ඕනෙ. මේ දේශපාලන ව්‍යාපාරයේ නායකයෝ හත් අට දෙනෙක් හදන්න බැහැ. කුට්ටමේ ඉන්නෙ එක ඉස්කෝප්ප ආසියයි. මගේ ආසියා මහින්දා රාජපක්ෂ. හැබැයි මගේ පුද්ගලික මතය බැසිල් රෝහණ රාජපක්ෂ” යි විමලවීර දිසානායක පැවසීය.
මහින්ද දිනා ගැනීම
අනතුරුව සභාව ඇමතූ බැසිල් රාජපක්ෂ ජනාධිපති අපේක්ෂකයා ලෙස ඉදිරිපත් කිරීමට සුදුසුම පුද්ගලයා මහින්ද රාජපක්ෂ බව කියා සිටියේය.
ඉදිරි ජනාධිපතිවරණ අපේක්ෂකත්වය ලබා ගැනීම සඳහා බැසිල් රාජපක්ෂ සහ ගෝඨාභය රාජපක්ෂ විසින් මහින්ද රාජපක්ෂගේ හිත දිනා ගැනීමට මාධ්‍ය මෙහෙයුම් කිහිපයක් ආරම්භ කර ඇති අතර ඒකාබද්ධ විපක්ෂ මන්ත්‍රීවරන් දිනා ගැනිමේ වැඩසටහන්ද දියත් කර ඇති බවයි ශ්රී ලංකා පොදුජන පෙරමුණේ ආරංචි මාර්ග පවසන්නේ.
බැසිල් රාජපක්ෂගේ සමාජ ඡාලා කණ්ඩායම් විසින් ගෝඨාභය රාජපක්ෂ හිට්ලර් ලෙස සමාජ ගත කිරිමේ මෙහෙයුම් ක්‍රියාත්මක කරන බව ද නම හෙළි නොකරන ලෙස ඉල්ලා සිටි සමාජ ඡාලා මෙහෙයවන්නෙකු කියා සිටියේය.
Facebook Comments
