එක්සත් ජාතීන්ගේ මානව හිමිකම් මණ්ඩලයේදී හවුලේ ගිවිසගත් යෝජනාව අතහැර එක්සත් ජාතීන්ගේ සංවිධානය විසින් නිර්දේශ කොට ඇති ප්‍රජාතන්ත්‍රවාදී ප්‍රතිසංස්කරණ වලින් ඉවත්වීමේ අපේක්ෂාව ජනාධිපතිවරයා විසින් පළ කර තිබේ.
මෙවර පැවැත්වෙන එක්සත් ජාතීන්ගේ මහා මණ්ඩලයේ වාර්ෂික සැසිවාරයේදී ශ්රී ලංකාවට අදාළ නව යෝජනාවලියක් ඉදිරිපත් කිරීමට අපේක්ෂා කරන බව ජනාධිපති මෛත්‍රීපාල සිරිසේන 14 සිකුරාදා මාධ්‍ය ආයතන ප‍්‍රධානීන් හමුවු අවස්ථාවේ දී කියා සිටියේය.
එක්සත් ජාතීන්ගේ මානව හිමිකම් කොමිෂන් සභාව ශ්රී ලංකාවට ඉදිරිපත් කර ඇති යෝජනා ක්‍රියාත්මක කිරීමේ දී සහන ලබා ගැනීම මෙන්ම රටේ ස්වාධීනත්වයට, ජාතික ආරක්ෂාවට සහ ත්‍රිවිධ හමුදාවේ ගෞරවයට හානියක් නොවන අයුරින් කටයුතු කිරීම පිළිබඳව එම යෝජනාවලියේ කරුණු ඇතුළත් බවයි ජනපති පෙන්වා දෙන්නේ.
“ප්‍රධාන වශයෙන් අපේ ආරක්ෂක හමුදා, ත්‍රිවිධ හමුදාවට තියෙන යෝජනා, මානව හිමිකම් චෝදනා ඒවා ඉවත් කරගැනීම,” යි ජනාධිපතිවරයා පැවසීය.
යුද සමයේ සිදුකරන ලද මානව හිමිකම් උල්ලංඝන සහ යුද අපරාධ සම්බන්ධ චෝදනා සම්බන්ධයෙන් පියවර ගැනීමට ශ්රී ලංකාවේ රජය ජගත් මානව හිමිකම් කොමිසමේ දී ගිවිසගත් යෝජනා ක්‍රියාත්මක කිරීමේ ප්‍රමාදය කෙරෙහි ජිනීවා නුවර මුළුදෙන එක්සත් ජාතීන්ගේ මානව හිමිකම් මණ්ඩලයේ නව මහ ලේකම්වරිය සිය මංගල දේශනය පවත්වමින් සභාවේ අවධානයට යොමු කර තිබුණි.
තම යෝජනාවලිය එක්සත් ජාතීන්ගේ මානව හිමිකම් පිළිබඳ කොමසාරිස්වරිය වෙත මෙන්ම එක්සත් ජාතින්ගේ සංවිධානයේ මහ ලේකම්වරයා වෙත ද ලිඛිතව භාරදීමට අපේක්ෂා කරන බව ජනාධිපති මෛත්‍රීපාල සිරිසේන මාධ්‍ය ප්‍රධානීන්ට ප්‍රකාශ කළේය.
සීඅයිඩී දෝෂ
මාධ්‍යවේදීන් සහ සිවිල් වැසියන් පැහැර ගැනීම, ඝාතනය කිරීම් ඇතුළු සිදුවීම්වලට අදාළව 2015 වසරේ සිට අපරාධ පරීක්ෂණ දෙපාර්තමේන්තුව විසින් සිදුකරන පරීක්ෂණවල පවතින යම් යම් දෝෂ සහිත ස්ථාන පිළිබඳව අදහස් දක්වා ඇති ජනපති සැකකරුවන් අත්අඩංගුවට ගෙන රිමාන්ඩ් භාරයේ රඳවා ගත්ත ද එම කිසිවෙකුට මෙතෙක් නඩු පවරා නොතිබීම හේතුවෙන් මතුව ඇති ගැටලුකාරි තත්ත්වය පැහැදිලි කල බවයි ජනපති මාධ්‍ය අංශය පවසන්නේ.
එමෙන්ම 2015 අගෝස්තු මාසයේ සිට ති‍්‍රවිධ හමුදා නිලධාරින් ද යම් යම් පරික්ෂණ සම්බන්ධයෙන් අත්අඩංගුවට ගෙන, රිමාන්ඩ් භාරයට පත්කර තිබුණ ද ඔවුන් කිසිවෙකුට එරෙහිව නඩු පවරා නොමැති අතර, ප‍්‍රමාණවත් හේතු සාධක තිබේ නම් නඩු පැවරීමට කටයුතු කිරීම මිස, අනවශ්‍ය ලෙස ඔවුන් රිමාන්ඩ් භාරයේ රඳවා තබා ගැනීම හේතුවෙන් රජය අපකීර්තියට පත්වන බව ද ජනපති පෙන්වා දී ඇත.
රටේ ජාතික ආරක්ෂාව දුර්වල වී නොමැති බව සහතික කර ඇති ජනාධිපතිවරයා යුද්ධයක් නැති රටක හමුදාව පවත්වාගෙන යාමේදී ප‍්‍රතිසංවිධාන කිරීමක් සිදු වුව ද දුර්වල වීමක් සිදුව නොමැති බවයි වැඩි දුරටත් අවධාරණය කර ඇත්තේ.
Facebook Comments
