පාර්ලිමේන්තුව විසුරුවාලීමට එරෙහිව ගොනු කර ඇති පෙත්සම් වල විභාගය අවසන් වන තුරු මහ මැතිවරණය නොපත්වීමට අතුරු තහනම් නියෝගයක් නිකුත් කරන ලෙසට කර ඇති ඉල්ලීමට තීන්දුවක් ලබා දීම රටේ ඉහලම අධිකරණය විසින් එක් දිනයකට කල් දමා තිබේ.
ශ්‍රේෂ්ඨාධිකරණය එසේ කල් දීමට තීන්දු කර ඇත්තේ වගඋත්තර බැඳීමට නීතිපතිවරයා කල් ඉල්ලීම නිසාය.
ජනාධිපතිවරයා විසින් පාර්ලිමේන්තුව විසුරුවා මහ මැතිවරණයක් කැඳවීම ව්‍යවස්ථා විරෝධි යන්න ප්‍රකාශ කරන ලෙස ඉල්ලා 12 සඳුදා ශ්‍රේෂ්ඨාධිකරණයට පෙත්සම් දහයකට වැඩි ප්‍රමාණයක් ගොනු කර ඇත.
එක්සත් ජාතික පක්ෂය, ජනතා විමුක්ති පෙරමුණ, ද්‍රවිඩ ජාතික සන්ධානය, ශ්‍රී ලංකා මුස්ලිම් කොංග්‍රසය සහ සමස්ත ලංකා මුස්ලිම් කොංග්‍රසය මෙලෙස පෙත්සම් ගොනු කරන ලද දේශපාලන පක්ෂ වේ.
මැතිවරණ කොමිසමේ සාමාජිකයකු වන මහාචාර්ය රත්නජීවන් හූල් ද පාර්ලිමේන්තුව විසුරුවාලීම නීති විරෝධි බවට ප්‍රකාශ කරන ලෙස ඉල්ලා පෙත්සමක් ඉදිරිපත් කර ඇත.
මීට අමතරව හිටපු පාර්ලිමේන්තු මන්ත්‍රී මනෝ ගනේෂන්, විකල්ප ප්‍රතිපත්ති කේන්ද්‍රය සහ නීතිඥ අරුණ ලක්සිරි ඇතුළු පාර්ශ්ව විසින් පෙත්සම ඉදිරිපත් කර තිබේ.
පෙත්සම් අද දිනයේම විභාග කිරීමට අගවිනිසුරුවරයා තීන්දු කල අතර අගවිනිසුරු නලින් පෙරේරා, ප්‍රියන්ත ජයවර්ධන සහ ප්‍රසන්න ජයවර්ධන යන විනිසුරු මඩුල්ල හමුවේ පෙත්සම් සලකා බැලු බවයි අප වාර්තාකරු පවසන්නේ.
පෙත්සම්වල වගඋත්තරකරුවන් ලෙස ජනාධිපති මෛත්‍රිපාල සිරිසේන, අගමැති ධුරයේ දිවුරුම් දුන් මහින්ද රාජපක්ෂ, මැතිවරණ කොමිසම සහ එහි සාමාජිකයන් නම් කරනු ලැබ තිබේ.
Facebook Comments
