රුහුණු ආර්ථික සංවර්ධනයේ කේන්ද්‍රස්ථානය බවට හම්බන්තොට පත් කරන බවත්, රුහුණු ආර්ථික සංවර්ධනය වෙනුවෙන් විශේෂ නීති සැකසීමට පියවර ගන්නා බව අගමැතිවරයා ප්‍රකාශ කර තිබේ.
එක් තිරසර ප්‍රතිපත්ති මාලාවක් ඔස්සේ ආර්ථිකය ඉදිරියට ගෙන යෑමේ ප්‍රතිඵලයක් ලෙස ශක්තිමත් සංවර්ධන පදනමක් සැකසී ඇති බව අගමැති රනිල් වික්‍රමසිංහ කියා සිටියේ 24 ඉරිදා හම්බන්තොට මිරිජ්ජවිල අපනයන සැකසුම් කලාපයේ නව තෙල් පිරිපහදුව සහ සිමෙන්ති කර්මාන්ත ශාලාවට මුල්ගල් තැබීමෙන් පසු උත්සව සභාව අමතමිනි.
තම උපන්දිනය වෙනුවෙන් ලැබුණු වටිනාම ත්‍යාගය හම්බන්තොට තෙල් පිරිපහදුව සහ සිමෙන්ති කර්මාන්ත ශාලාව බව ද අගමැතිවරයා ප්‍රකාශ කළේය.
“අද දිනයේදී මගේ උපන්දිනය වෙනුවෙන් සුභ පැතූ සියලූ දෙනාටම මම ස්තූතිය පළ කරනවා. එවැනි අවස්ථාවක ලැබුණු මෙම ආයෝජනය රටටම ලැබුණු හොඳම ත්‍යාගයක් ලෙස මා දකිනවා.” අගමැතිවරයා පැවසීය.
සුදු අලි බවට පත්ව තිබූ ව්‍යාපෘති ගණනාවක් යහපාලන රජයේ ආර්ථික ප්‍රතිපත්ති නිසා පෙරහැරේ යන අලි බවට පත් වී ඇති බව ද රනිල් වික්‍රමසිංහ අගමැතිවරයා පෙන්වා දුන්නේය.
හම්බන්තොට ඉදිවෙන ආයෝජන කලාපය හරහා රටේ සමස්ථ ආර්ථිකයම පරිවර්තනයකට ලක්වන බව කී අගමැතිවරයා “ධීවර කර්මාන්තය නවීකරණය වෙනවා. මත්තල, හම්බන්තොට හා මොණරාගල ප්‍රදේශ කේන්ද්‍ර කරගෙන ඉදිකෙරෙන අක්කර 12,000 ක ආයෝජන කලාපය තුළ විශාල සංචාරක කලාපත් ඉදි කෙරෙනවා. ඒ තුළ ගොල්ෆ් ක්‍රීඩාංගන පහකට අධික සංඛ්‍යාවක් ඉදිකිරීමට සැලසුම් සකස් කර තිබෙනවා.” යි සඳහන් කළේය.
රටේ ආර්ථික දියුණුව ඇති කිරීමට හැකියාව තිබෙන්නේ එක්සත් ජාතික පක්‍ෂයට පමණ බව අවධාරණය කළ අගමැති රනිල් වික්‍රමසිංහ මෙය එහි ආරම්භයක් බවත් තවත් වසර පහකින් රට සීඝ්‍ර සංවර්ධනයකට ගෙන යන බවට ද සහතික විය.
Facebook Comments
