රට පුරා ඇඳිරි නීතිය පැනවීමට තුඩු දුන් මුස්ලිම් විරෝධී ප්‍රචණ්ඩ ක්‍රියා නිසාවෙන් එක් පුද්ගලයෙකු මරුමුවට පත්ව තිබේ.
නාත්තන්ඩියේ පදිංචි වඩු කාර්මිකයකු වන 45 හැවිරිදි ෆවුසුල් අමීර් මරා දමා ඇති බව පොලිසිය විසින් තහවුරු කරන ලදී.
කලහකාරීන් විසින් කපා කොටා බරපතල ලෙස තුවාල ලද ඔහු මරුමුවට පත්ව ඇත්තේ මාරවිල රෝහලට ගෙන ඒමෙන් අනතුරුවය.
මැයි13 සඳුදා සවස 5 සිට ක්‍රියාත්මක වන පරිදි නැවත දැනුම් දෙන තුරු වයඹ පලාතට පොලිස් ඇඳිරි නීතියපනවනු ලැබුවත් මුස්ලිම් කඩ සාප්පු දේවස්ථාන වලට කල්ලි ගැසී පිරිස් පහර දුන් බව ප්‍රදේශවාසීහු පවසති.
පොලිසිය හා යුද හමුදා නිලධාරීන් බලා සිටියදී නාත්තන්ඩියේ ප්‍රහාර මෙහෙයවූවන් අතර විපක්ෂයේ ප්‍රාදේශීය දේශපාලකයකුගේ ආධරකරුවන් සහ භික්ෂුන් ද දක්නට ලැබුනු බව නම සඳහන් නොකරන ලෙස ඉල්ලා සිටි ප්‍රාදේශීය මාධ්‍යවේදියකු සිලෝන් නිව්ස් හා පැවසීය.
නාත්තන්ඩියේ තුම්මෝදර දේවස්ථානය දිසාවෙන් වෙඩි හඬ ඇසුනු බවද ඔහු වැඩිදුරටත් කියා සිටියේය.
වයඹ පළාතට පනවන ලද ඇඳිරි නීතිය මේතාක් ඉවත් කර නැත.
Facebook Comments
