මුස්ලිම් ජනයා කෙරෙහි සැකය හා අවමානය ඇති නොවන ලෙසට පුවත් වාර්තා කරන ලෙස ශ්‍රී ලංකා මානව හිමිකම් කොමිසම පාස්කු ඉරිදා ප්‍රහාරයෙන් දෙමාසයකට පසුව මුද්‍රිත මාධ්‍ය වලට නිර්දේශ කර තිබේ.
ඒ සඳහා ශ්‍රී ලංකාවේ කර්තෘවරුන් විසින් සම්මත කරගෙන ඇති ආචාරධර්ම පද්ධතියක් ඇති බව කොමිසම සිහිපත් කර දෙයි.
රටේ වත්මන් තත්ත්වය සලකා බලා ප්‍රමුඛත්වය දිය යුත්තේ ජනතාවගේ ආරක්ෂව තහවුරු කිරිමට හා වාර්ගික, ආගමික වර්ධනය කරවීමට බවයි ශ්‍රී ලංකා මානව හිමිකම් කොමිසමේ සභාපතිනි දිපිකා උඩුගමගේ අත්සනින් යුතුව නිකුත් කරන ලද නිර්දේශ මාලාවේ දැක්වෙන්නේ.
පාස්කු ඉරිදා ප්‍රහාරයෙන් පසුව මුස්ලිම් ප්‍රජාව ඉලක්ක කර ගිනිමින් සිදු වන වෙනස් කම් හේතුවෙන් ඔවුන්ගේ සාමාන්‍ය ජන ජිවිතයට බාධා එල්ල වී ඇති බවටයි මානව හිමිකම් කොමිසම පෙන්වා දෙන්නේ.
“එබැවින් මෙම සිද්ධි සම්බන්ධව ප්‍රවෘත්ති පළ කිරිමේදී වඩාත් සංවේදීව කටයුතු කිරිමේ අවශ්‍යතාවය අප පැහැදිලිව නිරික්ෂණය කරනු ලැබේ.” යනුවෙන් එම නිවේදනයේ සඳහන් කර ඇත.
පාස්කු ඉරිදා ප්‍රහාර වාර්තා කිරිමේදී මළ සිරුරු, තුවාල කරුවන් හා ලේ ගලා යන ආඳි සංවේදී ඡායාරූප පළ වීම අවම මට්ටමක පැවති බව මානව හිමිකම් කොමිසම එම මාධ්‍ය භාවිතාව පිළිබඳව සිය ප්‍රංශසාව පළ කර සිටී.
තම නිර්දේශ පිළිගනිමින් මෙවැනි සංවේදී අවස්ථාවන්හි දී ජනතා යහපත පිණිස මුද්‍රිත මාධ්‍ය කටයුතු කරනු ඇති බවටයි ශ්‍රී ලංකා මානව හිමිකම් කොමිසම වැඩි දුරටත් විශ්වාසය පළ කරන්නේ.
ශ්‍රී ලංකා මානව හිමිකම් කොමිසම විසින් නිර්දේශ ඉදිරිපත් කර ඇත්තේ මුද්‍රිත මාධ්‍ය සඳහා පමණක් වන අතර රූපවාහිනි හා සමාජ මාධ්‍ය සඳහා නිර්දේශ නිකුත් කළ වගක් දැන ගන්නට නැත.
Facebook Comments
