ජනාධිපතිවරයා විසින් බොදුබල සේනා නායක හිමියන් නිදහස් කිරීමට විරුද්ධව එහිමියන් නිසා පිඩාවට පත්වු මානව හිමිකම් ක්‍රියාධාරිනියක් රටේ ඉහළම අධිකරණයේ නඩු පවරා තිබේ.
සාක්ෂිකරුවන් හා වින්දිතයන් ආරක්ෂා කිරිමේ පනතට අනුව ගලගොඩ අත්තේ ඥානසාර හිමි නිදහස් කිරීමට පෙර තමන්ව දැනුවත් කළ යුතු බව සහ එහිමියන් නිදහස් නොකරන ලෙසට කරන ලද ඉල්ලීම ඉවත දැමු බවට ශ්‍රේෂ්ඨාධිකරයේ නඩු පැවරූ සන්ධ්‍යා එක්නැළිගොඩ චෝදනා කරන්නීය.
“ගලගොඩ අත්තේ ඥානසාර හිමිට සමාව දෙනවා නම් ජනාධිපතිවරයා මාව දැනුවත් කළ යුතුව තිබුනා. මම ඒ අයගෙන් සමාව ලබා දීමට ඉස්සෙල්ලා මම ඉල්ලා සිටියා සමාව දෙන්න එපා කියලා. ඒ සියලුම දේවල් නොසලකා හැරලා තමයි ජනාධිපතිවරයා මේ සමාව දීම කළේ ඉතින් ඒකට විරුද්ධව මම අධිකරණයේ පිහිට පැතුවා.”
සමාව ලබා දීමෙන් පසුව බොදුබල සේනා නායකයාගේ හැසිරීම ද සන්ධ්‍යා එක්නැළිගොඩගේ විවේචනයට ලක් විය.
ජනාධිපති සමාව ලැබු බොදු බල සේනා නායක හිමියන් මුස්ලිම් ආණ්ඩුකාරවරුන් දෙ‍දෙනකු හා ඇමැතිවරයෙකු එම ධුරයන්ගෙන් ඉවත් කරන ලෙසට ජනාධිපති උපදේශක පාර්ලිමේන්තු මන්ත්‍රී අතුරලියේ රතන හිමි ඇරඹු උපවාසායට සහාය පළ කර නුවර සිටි කොළඹ දක්වා පා ගමනක් ආරම්භ කළේය.
ඥානසාර හිමිගේ නායකත්වයෙන් ආරම්භ කරන ලද පා ගමන පටන් ගෙන සුලු මොහොතකින් ආණ්ඩකාරවරු දෙදෙනා සහ ආණ්ඩු‍ව නියෝජනය කරන සියලු මුස්ලිම් මැති ඇමැතිවරු සිය ධුරයන්ගෙන් ඉල්ලා අස්විය.
“මුස්ලිම් ඇමැතිවරුන් එම තනතුරු වලින් ඉවත් නොවුනා නම්. නුවර ඉදන් කොළඹට වෙනකම් මුස්ලිම් ප්‍රජාව සම්පුර්ණයෙන් විනාශ කරන්න තිබුනා. මුස්ලිම් ව්‍යාපාර මේ ස්වාමින් වහන්සේලා එකතුව සම්පුර්ණයෙන්ම විනාශ කරලා දාලා සමුල ඝාතනයක් කරලා ලොකු විනාශයක් මේ වෙනකොට සිද්ධ වෙන්න ඉඩ තිබුනා,” යැයි ඇය අනතුරු ඇඟවුවාය.
මේ වන විටත් අධිකරණයේ නඩු කිහිපයක් පවතින බොදුබල සේනා නායක ගලගොඩ අත්තේ ඥානසාර හිමියන් විදේශ ගත වී ඇති බව පවසන මනව හිමිකම් ක්‍රියාධාරිනි සන්ධ්‍යා එක්නැළිගොඩ එහිමියන්ට එසේ විදෙස් ගත වීමට අවසර ලබා දුන්නේ කෙසේ දැයි ආණ්ඩුවෙන් ප්‍රශ්න කර සිටි.
Facebook Comments
