කතුවරියට තග දැමූ රියර් අද්මිරාල්ට සමාජ මාධ්‍ය ඔස්සේ කනේ පාරක්

0

ශ්‍රී ලංකාවෙන් පිටුවහල් වී යන ලෙසට ජ්‍යෙෂ්ඨ මාධ්‍යවේදිනියකට තර්ජනය කළ රාජපක්ෂවාදී හිටපු නැව්පතියකුට සමාජ මාධ්‍ය ඔස්සේ දැඩි ප්‍රහාර එල්ල වී තිබේ.

“මෝටර් රථ රහිත දිනයක්” වැඩ සටහනට ට්විටර් පණිවුඩයක් මඟින් සිය නොකමැත්ත දැක්වු ඩේලී එෆ්ටී පුවත්පෙත් නියෝජ්‍ය කතුවරිය වන මේරියාන් ඩේවිඩ් හට හිටපු නාවික හමුදා මාණ්ඩලික ප්‍රධානි මෙන්ම හිටපු ආණ්ඩුකාරවරයකු ද වන මොහාන් විජේවික්‍රම ඇයට රටින් පිටව වන ලෙසට පිළිතුරු දී තිබුනි.

මේරියාන් ඩේවිඩ් “මෝටර් රථ රහිත දිනයක්” වැඩ සටහනට සිය නොකමැත්ත පළ කරමින් “නෑ, මම කාර් නැති කොළඹට සහාය දෙන්නේ නෑ. මොකෙක් හරි ලෙඩ අවලමෙක් හරි නැහැදිච්චි මෝඩයෙක් හරි අවලම් කතාවක් නැති නම් ගිරිය යටින් කරන සද්දයක් හරි නැතිව යාර 100 ක් වත් ඇවිදින්න නිදහසක් නෑ,” යි සඳහන් කර ඇත.

ඊට පිළිතුරු දෙමින් රියර් අද්මිරාල් මොහාන් විජේවික්‍රම ඇයට අණකර ඇත්තේ “කරුණාකර මේ රට දාලා යන්න, ඔහේ මේ රටට අයිති නෑ” යනුවෙන් පවසමිනි.

කෙසේ වෙතත් හිටපු නැව්පතිගේ පිළිතුරට බොහෝ පිරිස් දොස් නඟමින් ඇයට රටින් පිටවන්නැයි අණ කිරීමට ඔහුට ඇති අයිතිය කුමක්දැයි සාමජ මාධ්‍ය ඔස්සේ ප්‍රශ්න කර තිබෙනු දක්නට ලැබුනි.

හිටපු නාවික හමුදා මාණ්ඩලික ප්‍රධානි මෙන්ම රාජපක්ෂ පාලන සමයේදී නැගෙනහිර ආණ්ඩුකාර ධුරය දැරූ මොහාන් විජේවික්‍රම ගෝඨාභය රාජපක්ෂ ජනපති කිරීමට සංවිධානය කරනු ලබන වියත් මඟ වැනි වැඩ සටහන් වල මුල් පෙළේ ක්‍රියාධරයකු ලෙස දැක ගත හැක.

Facebook Comments

wedding people