පාර්ලිමේන්තුවේ බහුතර බලය තම ආණ්ඩුවට තිබුන ද ජනාධිපතිවරණයේ ජන වරමට ගරු කරමින් සිය ධුරයෙන් ඉල්ලා අස්වන බව අගමැතිවරයා ප්‍රකාශ කර තිබේ.
ප්‍රජාතන්ත්‍රවාදයට ගරු කරමින් නව ජනාධිපතිවරයාට නව ආණ්ඩුවක් පිහිටුවීමට අවකාශ සලසමින් තමා ඇතුළු අමාත්‍ය මණ්ඩලය ඉවත් වන බව 20 බදාදා නිවේදනයක් නිකුත් කරමින් අගමැති රනිල් වික්‍රමසිංහ පැවසීය.
“මම 19 වෙනිදා ගෝඨාභය රාජපක්‍ෂ ජනාධිපතිතුමා හමු වුණා. එතුමා සම පාර්ලිමේන්තුවේ ඉදිරි කටයුතු පිළිබඳව සාකච්ඡා කළා. පාර්ලිමේන්තුවේ බහුතරය අපට තිබුණත්, රාජපක්‍ෂ මහතාට ලැබුණු ජනවරම පිළිගෙන, එතුමාට අවශ්‍ය පරිදි ආණ්ඩුවක් පිහිටුවීමට ඉඩ සැලසීමට අප තීරණය කළා. මම ප්‍රජාතන්ත්‍රවාදය අගයනවා. ප්‍රජාතන්ත්‍රවාදයට ගරු කරනවා. ප්‍රජාතන්ත්‍රවාදීව කටයුතු කරනවා. ඒ අනුව යමින් නව ජනාධිපතිවරයාට නව ආණ්ඩුවක් පිහිටුවීමට අවකාශ සලසමින් අග්‍රාමාත්‍ය ධූරයෙන් ඉල්ලා අස්වීමට මම තීරණය කළා.”
පසුගිය වසර පහක කාලය තුළ මෙරටේ රටේ ප්‍රජාතන්ත්‍රවාදය, මානව නිදහස, අදහස් ප්‍රකාශ කිරීමේ හා තොරතුරු දැනගැනීමේ අයිතිය, සමානාත්මතාවය හා සංහිදියාව තහවුරු කරලීම උදෙසා සිය පාර්ශවය කටයුතු කළා සේම තිරසර සංවර්ධන මාවතකට දේශය යොමු කිරීමට ද කටයුතු කළ බවයි අගමැතිවරයා පවසන්නේ.
19 වන ව්‍යවස්ථා සංශෝධනය මගින් සියලූ ආයතන දේශපාලනීකරණයෙන් නිදහස් කළ බවත් පසුගිය ජනාධිපතිවරණය නිදහස්, ස්වාධීන හා සාධාරණ අන්දමින් පැවැත්වීමට හැකි වීම ඉන් ලද එක් ප්‍රතිඵලයක් බව ද හෙතෙම කියා සිටී.
තම පාර්ශවය කටයුතු කළ ආකාරය පිළිබඳව නිවැරදි විනිශ්චය අනාගතය විසින් ලබා දෙනු ඇති බව අගමැති වැඩි දුරටත් සඳහන් කර ඇත.
Facebook Comments
